مەملەكەت باسشىسى 1,5 جىلدىڭ ىشىندە ۇلتتىق كەڭەس مۇشەلەرىمەن 26 كەزدەسۋ وتكىزدى. بۇل تۋرالى ۇلتتىق قوعامدىق سەنىم كەڭەسىنىڭ 5-وتىرىسىندا قر پرەزيدەنتىنىڭ كومەكشىسى ەرلان قارين ايتتى, دەپ حابارلايدى Egemen.kz
«قازىرگى ۋاقىتتا ۇلتتىق كەڭەس تاراپىنان قوعام بەلسەندىلەرى, ساراپشىلار جانە مەملەكەتتىك ورگاندارمەن ءوزارا ارەكەت ەتۋ, ۇسىنىستار ازىرلەۋ جۇمىستارى ءوز جالعاسىپ تابۋدا. قازان ايىندا وتكەن ۇلتتىق كەڭەستىڭ 4-وتىرىسىندا مەملەكەت باسشىسى بەرگەن تاپسىرمالاردى جۇزەگە اسىرۋ بويىنشا 21 تارماقتان تۇراتىن ارناۋلى ءىس-شارالار جوسپارى قابىلدادى. بەرىلگەن تاپسىرمالاردىڭ ءتيىستى تۇردە ورىندالۋى حاتشىلىق تاراپىنان باقىلاۋعا الىندى. وعان قوسا, ۇلتتىق كەڭەس مۇشەلەرى ۇسىنىستارىنىڭ نەگىزىندە ازىرلەنگەن تاپسىرمالاردىڭ ىكە اسۋ بارىسى حاتشىلىقتىڭ ەرەكشە نازارىندا. اتاپ ايتقاندا, قاڭتار ايىنىڭ باسىندا ساياسي رەفورمالاردىڭ ءبىرىنشى توپتاماسى اياسىندا سوڭعى زاڭ قابىلدانعان بولاتىن. ول – ءولىم جازاسىنىڭ كۇشىن جويۋعا باعىتتالعان «ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتىك حاتتامانى راتيفيكاتسيالاۋ تۋرالى» قر زاڭى», دەدى ەرلان قارين.
ونىڭ ايتۋىنشا, ساياسي رەفورمالاردىڭ ەكىنشى توپتاماسى بويىنشا قازىرگى ۋاقىتتا 5 زاڭ جوباسى, ءبىر پرەزيدەنت جارعىسى ازىرلەنىپ وتىر. ساياسي رەفورمالاردىڭ ءۇشىنشى توپتاماسى اياسىندا الداعى ۋاقىتتىڭ وزىندە ءۇش زاڭ جوباسىن ازىرلەۋ قاراستىرىلعان. ولاردىڭ ىشىندە ساياسي پارتيالاردىڭ ماجىلىسكە ءوتۋ شەگىن 7-دەن 5 پايىزعا دەيىن تومەندەتۋ, ساياسي بيۋلەتەندەرىنە «بارىنە قارسىمەن» دەگەن جازۋدى ەنگىزۋ جانە باسقا دا باستامالار ۇلتتىق كەڭەس مۇشەلەرىنىڭ ۇسىنىستارىن ەسكەرە وتىرىپ ازىرلەندى.
«بۇدان بولەك مەملەكەتتىك ورگاندار مەن ۇلتتىق كەڭەس مۇشەلەرى اراسىندا ءوزارا ارەكەت ەتۋ جۇمىستارى جالعاستىرىلدى. 2020 جىلى ونلاين فورماتتا ۇلتتىق كەڭەس مۇشەلەرى مەن مينيسترلىك باسشىلارىنىڭ 13 كەزدەسۋى وتكىزىلدى. كەزدەسۋلەر بارىسىندا ۇلتىق كەڭەس مۇشەلەرى مينيسترلىكتەردىڭ جەكەلەگەن قىزمەت سالالارى جۇمىسىن ودان ارى جەتىلدىرۋ بويىنشا ءوز ۇسىنىستارىمەن ءبولىستى. ۇسىنىلعان ماسەلەلەردى ودان ءارى بىرلەسىپ پىسىقتاۋ ءۇشىن كەڭەستىڭ بىرقاتار مۇشەسى مينيسترلىكتەر جانىنداعى جۇمىس توپتارىنا شاقىرىلدى», دەدى ول.
سونىمەن قاتار ول بيىل مەملەكەت باسشىسىنىڭ ۇلتتىق كەڭەس مۇشەلەرى قابىلداۋ تاجىريبەسى دە جالعاسقانىن ايتتى.
«ۇلتتىق كەڭەس قۇرىلعاننان بەرى 1,5 جىلدىڭ ىشىندە مۇنداي 26 كەزدەسۋ ۇيىمداستىرىلدى. بۇل كەزدەۋلەردە ايتىلعان ماسەلەلەر مەن ۇسىنىستار حاتشىلىقتىڭ تاراپىنان باقىلاۋعا الىنعان. ۇلتتىق كەڭەس قىزمەتىنىڭ ناتيجەلەرىن قورىتىندىلاۋ جانە ديالوگ الاڭىن ءتيىمدى ناسيحاتتاۋ ماقساتىندا 2020 جىلدىڭ قاراشا ايىندا ۇلتتىق كەڭەس كز ۆەب-سايتى ىسكە قوسىلدى. بۇدان باسقا ۇلتتىق كەڭەس قۇرىلعان ساتتەن باستاپ ونىڭ Telegram, Instagram, Facebook الەۋمەتتىك جەلىلەرىندە اككاۋنتى جۇمىس ىستەيدى. اتالعان جۇمىستاردىڭ بارلىعى ۇلتتىق كەڭەستىڭ ءتيىمدى قىزمەت ەتۋىنە ىقپال ەتەدى جانە ارى قاراي دا بۇلباعىتتاردا جۇمىس جۇرگىزىلەدى», دەدى ەرلان قارين.
ەسكە سالساق, پرەزيدەنتتىڭ قاتىسۋىمەن ۇلتتىق قوعامدىق سەنىم كەڭەسىنىڭ وتىرىسى ءوتىپ جاتىر.