رەسەي حوككەي فەدەراتسياسى پرەزيدەنتى ۆلاديسلاۆ ترەتياك پەن سوچي-2014 ۇيىمداستىرۋ كوميتەتىنىڭ باسشىسى دميتري چەرنىشەنكو مۇز ايدىنىندا وينالاتىن شايبالاردى كوپشىلىك نازارىنا ۇسىندى. بۇل تۋرالى يتار-تاسس حابارلادى.
شايبالاردىڭ تانىستىرىلىمى حوككەيدەن رەسەي – فينليانديا قۇرامالارى اراسىندا وتكەن كەزدەسۋدىڭ ءبىرىنشى ءۇزىلىسى كەزىندە ءباسپاسوز ورتالىعىندا ءوتتى.
«ءبىز شايبالاردى حالىقارالىق حوككەي فەدەراتسياسىنىڭ بارلىق تالاپتارىنا ساي دايىندادىق. ەنى 2,52 جانە ديامەترى 7,62 سانتيمەتردى قۇراعان شايبالاردىڭ سالماعى 170 گراممنان اسپايدى», – دەدى دميتري چەرنىشەنكو.
شايبالاردا سوچي وليمپياداسىنىڭ سيمۆولى بەينەلەنگەن. ول شايبا بەتىنىڭ 35 پايىزىن جاۋىپ تۇرادى. بۇل سۋرەتتەر حوككەي ويىندارى وتكىزىلەتىن ەكى الاڭعا ارنالىپ ەكى ءتۇرلى تۇسكە بويالعان. ماسەلەن, «ۇلكەن» مۇز ايدىنىندا كوماندالار كۇلگىن ءتۇستى شايبامەن ويناسا, «شايبا» سارايىنداعى ويىنداردا تەك كوك ءتۇستى شايبالار قولدانىلادى. سونداي-اق سلەدج-حوككەي ويىندارىنا ارنالىپ, پاراليمپيادالىق كوميتەتتىڭ بەلگىسى سالىنعان شايبالار دا دايىندالعان.
«شايبا – حوككەي ويىنىنداعى ەڭ ماڭىزدى بولشەكتەردىڭ ءبىرى. حوككەي جانكۇيەرلەرىنىڭ اراسىندا ولاردان كوللەكتسيا جينايتىندار دا كوپ كەزدەسەدى. ءىرى جارىستاردىڭ كۋاگەرى بولعان ادامنىڭ سپورت مەرەكەسىنىڭ ءبىر بولشەگىن وزىندە ساقتاپ قالعىسى كەلەتىنى تۇسىنىكتى, – دەدى حوككەي فەدەراتسياسىنىڭ پرەزيدەنتى ۆلاديسلاۆ ترەتياك. – نازارلارىڭىزعا ۇسىنىلىپ وتىرعان شايبالار ءبىزدىڭ قۇراما جەڭىسىنىڭ سيمۆولى بولىپ, تريبۋناداعى جانكۇيەرلەردىڭ ءداستۇرلى «شايبۋ-شايبۋ» دەگەن ايقايلارى ءجيى ەستىلىپ تۇرسىن دەيمىز!».
سوچي-2014 ۇيىمداستىرۋ كوميتەتىنىڭ ءباسپاسوز قىزمەتى 22 جەلتوقسان كۇنى www.tickets.sochi2014.com سايتى نەمەسە ۇيالى تەلەفونعا ارنالعان «سوچي 2014» باعدارلاماسى ارقىلى ايەلدەر حوككەيىنە ءۇش نە ودان كوپ بيلەت ساتىپ العان العاشقى 500 ادامعا وليمپيادا شايباسى سىيعا تارتىلاتىنىن مالىمدەدى.
ايدار ورىسباەۆ.
دەرەككوز: Itar-tass.com
فوتو: Ntv.ru