پالەستينا ليدەرى ياسير ارافات ءوزىنىڭ اجالىنان ولگەن ەكەن. بۇل تۋرالى رەسەي فەدەرالدى مەديكو-بيولوگيالىق اگەنتتىك باسشىسى ۆلاديمير ۋيبانىڭ مالىمدەمەسىنە سىلتەمە جاساعان ريا «نوۆوستي» حابارلادى.
كوپتەگەن ەلدىڭ ماماندارى ءالى كۇنگە دەيىن ونىڭ ءولىمىنىڭ سەبەبى جونىندە ورتاق شەشىمگە كەلە الماۋدا. الايدا, وسى جولى رەسەي ماماندارى پالەستينا ليدەرىنىڭ ءوز اجالىنان ولگەنىنە تولىق سەنىمدى. «ياسير ارافات رادياتسيا اسەرىنەن ەمەس, ءوزىنىڭ اجالىنان قايتىس بولعان… بۇعان قاتىستى شۆەيتساريالىقتار ورشەلەنە مالىمدەمە جاساپ ەدى, بىراق ولار كەيىن ءبىزدىڭ تۇجىرىمىمىزبەن كەلىسىپ, رايلارىنان قايتتى, فرانتسۋزدار دا ءبىزدىڭ ۇيعارىمىمىزدى قولدادى», – دەدى ءباسپاسوز ءماسليحاتىندا ۆلاديمير ۋيبا.
بۇدان بۇرىن ياسير ارافاتتىڭ جەسىرى سۋحا ارافات ەرىنىڭ ۋلانىپ ولتىرىلگەنىن جوققا شىعارعان فرانتسۋز سوت-مەديتسينالىق ساراپتاماسىنىڭ قورىتىندىسىمەن كەلىسپەيتىنىن العا تارتىپ, ونىڭ ناتيجەلەرىن قايتا قاراتتىراتىنىن مالىمدەگەن بولاتىن. سول كەزدە مارقۇمنىڭ قانىندا راديواكتيۆتى پولوني-210 ەلەمەنتىنىڭ بيولوگيالىق ۇلگىدەگى قۇرامى كوتەرىڭكى ەكەنىن تاپقان شۆەيتساريالىق دارىگەرلەر انىقتاماسىمەن فرانتسۋز ماماندارىنىڭ تۇجىرىمى سايكەس كەلمەي قالعان.
پالەستينالىقتار 2004 جىلى پاريجدەگى گوسپيتالداردىڭ بىرىندە كەنەتتەن قايتىس بولىپ كەتكەن ارافاتتىڭ ءولىمىن ءالى كۇنگە دەيىن يزرايل ارنايى قىزمەتىنەن كورەدى. ال تەل-اۆيۆ مۇنداي ايىپتاۋدى مويىنداپ وتىرعان جوق.
ايدار ورىسباەۆ.
دەرەككوز: Ria.ru
فوتو: Dw.de