الماتى وبلىسىندا ەرلەر اراسىندا ۆولەيبولدان رەسپۋبليكالىق «ۇشقوڭىر» ءتۋرنيرى ءوتىپ, جۇلدەلى ورىنداردىڭ تورتەۋىن دە شىعىسقازاقستاندىق ويىنشىلار يەلەندى.
ءداستۇرلى ءتۋرنيردىڭ ماقساتى – ادەتتەگىدەي: حالىقتى سالاماتتى ءومىر سالتىن ۇستانۋعا شاقىرۋ. سونىمەن قاتار ۇزدىك كوماندالاردى, ۇزدىك ويىنشىلاردى انىقتاپ, بۇدان دا ۇلكەن جارىستارعا دايىنداۋ. «ۇشقوڭىر» ءتۋرنيرىنىڭ ءبىر ەرەكشەلىگى – اۋەسقوي ويىنشىلار عانا قاتىستى.
ەلباسىنىڭ تۋعان جەرى شامالعانداعى «ۇشقوڭىر» سپورت كەشەنىندە وتكەن ءدۇبىرلى دودادا قازاقستاننىڭ وڭىرلەرىنەن كەلگەن 12 كوماندا باق سىناستى. قارسىلاس كوماندالار ءتورت توپقا ءبولىنىپ, تورتەۋىنەن دە سۋىرىلىپ شىعىستىڭ ويىنشىلارى شىقتى. جارىس ناتيجەسىندە IV ورىن تارباعاتايدىڭ جىگىتتەرىنەن قۇرالعان «جىگەر» كومانداسىنا بۇيىردى. III ورىندى كۇرشىم اۋدانىنان كەلگەن «باراق باتىر» كومانداسى قانجىعاعا باستى. II ورىندى شىعىسقازاقستاندىق «شەكارا شىعىس» كومانداسى الدى. ال I ورىندى كۇرشىم, كاتونقاراعاي, تارباعاتاي, زايسان اۋدانىنىڭ سپورتشىلارىنان قۇرالعان «ىنتىماق» كومانداسى ەنشىلەدى.
ويىندا ادىلەت قادىرحانوۆ, ايدار اسحاتوۆ, شالقار كالىموۆ, ءبىرجان وسپانوۆ سىندى ۆولەيبولشىلار شەبەرلىكتەرىمەن ەرەكشەلەندى. ويىنشىلاردىڭ دايىندىقتارىنا جاتتىقتىرۋشىلاردىڭ دا تەر توككەنى بەلگىلى.
– ويىن وتە تارتىستى ءوتتى. قىزىلوردا, تاراز, الماتى وبلىستارىنان الاكول, رايىمبەك اۋداندارىنان كەلگەن كوماندالاردىڭ دا دايىندىعى مىقتى بولدى. ءاۋ دەگەندە-اق شىعىستىقتار ءار توپتان ءبىرىنشى بولىپ شىعىپ, ءوزارا سايىسقا ءتۇستى. دوپ دوداسىنىڭ وتۋىنە ۇيىتقى بولعان «ال-ازيم» قوعامدىق ورتالىعىنا, تورەشىلەرگە راقمەت. وسىنداي جارىستاردا ويىنشىلار شىڭدالا بەرەدى, – دەيدى جاتتىقتىرۋشى مەيىر رامازانوۆ.
بۇعان دەيىن دە اتالمىش تۋرنيردە شىعىسقازاقستاندىق «مۇزتاۋ» كومانداسى ءبىرىنشى ورىن, كۇرشىم اۋدانىنىڭ «باراق باتىر» كومانداسى ەكىنشى ورىن العان بولاتىن.