دجوكوۆيچ تاعى دا دارا شىقتى

مەلبۋرندەگى تۋرنير كارانتين كەزىندە ۇيىمداستىرىلعاندىقتان, سپورتشىلارعا دا, جارىستىڭ باسى-قاسىندا جۇرگەندەرگە دە قاتاڭ تالاپ­تار قويىلدى. ماسەلەن, جىل باسىندا وزگە جارىستارعا قاتىس­قان 30-عا جۋىق تەننيسشى اۋس­تراليا بيلىگىنىڭ ەرەجەسى بويىنشا 14 كۇندىك مىندەتتى كارانتينگە جات­قىزىلدى. ۇيىمداستىرۋشى تاراپ سپورتشىلاردى كارانتين تا­لاپتارىن قاتاڭ ساقتاۋعا ۇگىتتە­گەنىمەن, ءدال تۋرنير باستالاتىن كەزدە مەلبۋرندەگى قوناقۇي كۇ­زەت­شىلەرىنىڭ بىرىنەن كوروناۆيرۋس انىقتالىپ, جارىستىڭ ءوتۋ-وت­پەۋى ماسەلە رەتىندە قويىل­دى. دەگەن­مەن Australian Open باسشى­لارى قانداي جاعداي بولسا دا, ءبىر ادام 500 ادامعا اسە­رىن تيگىزبەۋى كەرەك ەكەنىن, اۋس­تراليا اشىق چەمپيوناتى ءوز ۋاقىتىندا ۇيىمداستىرىلاتىنىن ايتىپ, جارىسقا قاتىسۋشىلار مەن جانكۇيەرلەردى سەندىردى.

دجوكوۆيچتىڭ قارقىنى قاتتى

اۋستراليا اشىق چەمپيو­ناتىنىڭ التى, «ۇلكەن دۋلىعا» ساناتىنداعى جارىستاردىڭ 20 دۇركىن جەڭىمپازى شۆەيتساريالىق رودجەر فەدەرەر جاراقاتىنا باي­لانىستى بۇل جارىستان تىس قال­عان سوڭ, جانكۇيەرلەر بيىلعى في­نال نادال مەن دجوكوۆيچ ارا­سىن­دا وتەدى دەپ بولجاعان بولاتىن. الايدا «قۇمداۋىت كورتتىڭ كورولى» شيرەك فينالدا گرەكيالىق ستەفانوس تسيتسيپاستى ەكى سەتتە جەڭىپ تۇرىپ, كۇتپەگەن جەردە 7:6, 6:4, 7:5 ەسەبىمەن جەڭىلىپ قالدى.

ال دجوكوۆيچ بولسا, شيرەك فينالدا الەمنىڭ جەتىنشى راكەتكاسى گەرمانيالىق الەكساندر زۆەرەۆتى ءتورت سەتتە 3:1 ەسەبىمەن, جارتىلاي فينالدا جارىستىڭ دەبيۋتانتى بولسا دا, ەرەكشە ويىنىمەن ماماندار مەن جانكۇيەرلەر كوزىنە تۇسە بىلگەن رەسەيلىك اسلان كاراتسەۆتى 3:0 ناتيجەسىمەن ەش قيىندىقسىز جەڭدى. فينالدا سەربيالىق سپورتشىنى تاعى ءبىر رەسەيلىك تەننيسشى, الەمنىڭ ءۇشىنشى راكەتاسى – دانيل مەدۆەدەۆ كۇتىپ تۇرعان-دى. بىراق مەدۆەدەۆ تە الەمنىڭ ءبىرىنشى راكەتكاسىنا ەش قارسىلىق كورسەتە المادى. راس, العاشقى سەتتە دجو­كوۆيچ ءبىراز قيىندىققا تاپ بولىپ, تەك تايبرەيكتە 7:5 ەسەبىمەن عانا باسىم ءتۇستى. ال قالعان ەكى سەتتە سەربيالىق تەننيسشى اسا قات­تى قينالا قويعان جوق – 6:2, 6:2. ءسويتىپ نوۆاك دجوكوۆيچ قاتا­رىنان ءۇشىنشى رەت, جالپى توعى­زىنشى مارتە اۋستراليا اشىق چەمپيوناتىندا باس جۇلدەنى جەڭىپ, رەكورد ورناتتى.

بۇل – دجوكوۆيچتىڭ «ۇل­كەن دۋلىعا» ساناتىنداعى جارىس­تار­داعى 18-ءشى جەڭىسى. وسىلايشا, ول 20 رەت جەڭىس تۇعىرىنا كوتەرىلگەن رودجەر فەدەرەر مەن رافاەل نادالعا ءبىر تابان جاقىنداي ءتۇستى. سونىمەن قاتار مەلبۋرندەگى فينالدا دجوكوۆيچ ءىرى جارىستارداعى 101-ءشى جۇلدەسىن ولجالادى. كەيىن­گى جىلدارى ەرەكشە تالانتىمەن كوزگە ءتۇسىپ, مامانداردىڭ ىس­تىق ىقىلاسىنا بولەنىپ كەلە جاتقان رەسەيلىك تەننيسشى دا­نيل مەدۆەدەۆ بولاشاق الەم جۇل­دىزىنا بالانۋدا. وتكەن ماۋ­سىمنىڭ قورىتىندى Masters باسە­كەسىندە جەڭىس تۇعىرىنا كوتە­رىلگەن ول جارتىلاي فينالدا دجو­كوۆيچتەن ايلاسىن اسىرىپ كەتكەن بولاتىن. قازىرگى تاڭدا مەدۆەدەۆتىڭ ەنشىسىندە Masters ساناتىنداعى 9 ءتۋرنيردىڭ باس جۇلدەسى بار. 25 جاستاعى سپورتشى بۇگىنگە دەيىن ەكى مارتە «ۇلكەن دۋلىعا» ساناتىنداعى ءتۋرنيردىڭ فينالىندا ونەر كورسەتىپ ۇلگەردى.

دۇنيە ءجۇزىن دۇرلىكتىرگەن پاندەميانىڭ سالدارى وزگە سالالار سەكىلدى, سپورتتى دا اينالىپ وتكەن جوق. سول سەبەپتى بيىلعى Australian Open دوداسىنىڭ جۇلدە قورى بىلتىرعىمەن سالىستىرعاندا ءبىرشاما ازايعان. تۋرنيردە توپ جارعان نوۆاك دجوكوۆيچ نورمان برۋكس اتىنداعى كۋبوك پەن 2 113 375 دوللار كولەمىندە سىياقى الدى. ول وتكەن جىلى 4,12 ملن دوللار تابىسقا كەنەلگەن بولا­تىن. ال فيناليست دانيل مەد­ۆەدەۆ 1,5 ملن دوللارمەن قانجىعاسىن مايلادى.

وساكا وزىپ تۇر

 ايەلدەر اراسىنداعى Australian Open 2021 جارىسىندا ناومي وساكا ۇزدىك اتاندى. 23 جاستاعى جاپون قىزى تۋرنير بارىسىندا بەكەرگە وسى جارىستىڭ ءفاۆوريتى سانالماعانىن دالەلدەدى. ايتۋلى دودانىڭ ءبىرىنشى كەزەڭىنەن باس­تاپ تەك قانا ۇزدىكتەرمەن كۇش سىناسقان وساكا الدىمەن الەمنىڭ 40-راكەتكاسى رەسەيلىك اناستاسيا پاۆليۋچەنكوۆانى 6:1, 6:2, ەكىنشى كەزەڭدە فرانتسيالىق كارولين گارسيانى (46) 6:2, 6:3, ءۇشىنشى اينالىمدا تۋنيس وكىلى ونس جابەردى (31) 6:3, 6:2 ەسەبىمەن ايقىن جەڭدى. ال 1/8 في­نالدا وسى ءتۋرنيردىڭ بىلتىرعى ءفيناليسى يسپانيالىق گاربينە مۋگۋرۋسادان ءۇش سەتتە (4:6, 6:4, 7:5) ايلاسىن اسىرسا, شيرەك فينالدا تايۆاندىق شۋۆەي سەنى ەكى سەتتە (6:2, 6:2) قاپى قالدىردى. جارتىلاي فينالدا وسى ءتۋرنيردىڭ ءتورت دۇركىن جەڭىمپازى, ايگىلى امەريكالىق تەننيسشى سەرەنا ۋيليامستى ەكى سەتتە (6:3, 6:4) تىزە بۇكتىردى. وسىن­داي جارقىن جەڭىسىنەن كەيىن الەم­دىك تەننيس جانكۇيەرلەرى مەن سپورت ماماندارى جاپون قىزىنا قاراتا «ايەلدەر تەننيسىنىڭ جاڭا كوشباسشىسى», «جاڭا پاتشايىم», «جاپون پاتشايىمى» دەگەن جىلى سوزدەرىن ارنادى.

ءسويتىپ بىلتىر الەم­دىك سپورتشىلار ارا­سىندا ەڭ كوپ تابىس تاپقان (37,4 ملن اقش دول­­لارى) وساكا اۋس­ترا­ليا اشىق چەم­پيو­ناتىنىڭ في­نالىندا تاعى ءبىر اقش وكى­لى دجەن­نيفەر برەي­دي­مەن باس جۇلدەنى سا­راپقا سالدى. ءبىر-بىرىنە جاقسى تا­نىس تەننيسشىلەر بىلتىرعى US Open جارىسىنىڭ جارتىلاي فينا­­لىنان كەيىن تاعى دا كورتتا كەز­دەستى. اقش اشىق چەمپيوناتىندا برەيديدى قاپى قالدىرعان وساكا بۇل جولى دا ايانىپ قالعان جوق. ەكى سەتكە سوزىلعان فينالدىق ماتچ جاپونيالىق سپورتشىنىڭ جەڭىسىمەن اياقتالدى. ەسەپ – 6:3, 6:4.

وسىلايشا, ناومي وساكا «ۇل­كەن دۋلىعا» ساناتىنداعى جا­رىستاردىڭ فينالىنا ءتورتىنشى مارتە شىعىپ, سونىڭ بارلىعىندا جەڭىس تۇعىرىنان كورىندى. تاعى ءبىر ايتا كەتەرلىگى, جاپونيالىق سپورتشى – كەيىنگى ءبىر جىل كولەمىندە جەڭىلىستىڭ نە ەكەنىن بىلمەي كەلە جاتقان ساناۋلى سپورتشىلاردىڭ ءبىرى. ول بىلتىر 7 اقپاندا فەدە­راتسيا كۋبوگى اياسىنداعى جارىس­تا يسپانيالىق سارە سورريبەس-تورموعا ەسە جىبەرگەن بولاتىن.

ءۇشىنشى اينالىم – سوڭعى مەجە

كەيىنگى جىلدارى قازاق­ستان­دىق تەننيسشىلەر مەل­­بۋرن­دەگى جا­رىس­تا ءجيى بوي كورسەتىپ جۇرگە­نىمەن, جان­كۇيەر­لەردىڭ كوڭى­لىنەن شى­عاتىنداي ناتي­­جەگە قول جەتكىزە الماۋدا. بۇعان دەيىن جازعانىمىزداي, بي­ىل­عى اۋس­­تراليانىڭ اشىق بىرىن­شىلى­گىنە قاتىسقان التى بىردەي سپورت­شىمىزدىڭ تەك ەكەۋى عانا ءۇشىنشى اينالىمعا جەتسە, كەيبىرى ءبىرىنشى كەزەڭدە ءسۇرىندى. جالپى, قازاقستاندىق سپورتشىلار ءۇشىن Australian Open ءتۋرنيرى ءۇشىنشى كەزەڭنەن كەيىن مارەسىنە جەتەتىن سياقتى. ويتكەنى ءار جىلدارى وسى دودادا باق سىناعان گالينا ۆوسكوبوەۆا (2009, 2012), ياروسلاۆا شۆەدوۆا (2015), زارينا دياس (2015, 2016, 2020, 2021), يۋليا پۋتينتسەۆا (2016, 2020, 2021) جانە ەلەنا رىباكينا (2020) ءۇشىنشى اينالىمنان ارىگە بارا الماي ءجۇر. جەرلەستەرىمىزدىڭ اراسىندا ەڭ ۇزدىك كورسەتكىش ميحايل كۋكۋشكينگە تيەسىلى. 2012 جىلى ول ءتورتىنشى اينالىمعا دەيىن جەتكەن ەدى. ال بيىل ەكىنشى كەزەڭدە ءسۇرىندى.