كەشە نۇر-سۇلتان قالاسىنداعى ۇلتتىق مۋزەيدە مەملەكەت جانە قوعام قايراتكەرى, قازاقستاننىڭ ەڭبەك سىڭىرگەن قىزمەتكەرى, پروفەسسور تولەۋبەك مۇقاشەۆتىڭ «بالالىق شاققا ساياحات» اتتى جەكە كورمەسى ءوتتى, دەپ حابارلايدى Egemen.kz baq.kz سايتىنا سىلتەمە جاساپ.
2014-2020 جىلدار ارالىعىندا پارلامەنت سەناتىنىڭ دەپۋتاتى بولعان تولەۋبەك مۇقاشەۆ زەينەتكە شىققان سوڭ بۇرىننان ارمانداپ جۇرگەن العاشقى كورمەسىن وتكىزۋدى قولعا العان ەكەن.
«بۇل كورمە ءوزىمىز تۋىپ-وسكەن جەردى, تابيعاتىمىزدى, بالالىق شاقتىڭ الاڭسىز ۋاقىتىن ۇمىتىپ, كۇندەلىكتى قاربالاسپەن ءومىرىن وتكىزىپ جاتقان جاندارعا ەسكە ءتۇسىرۋ ماقساتىندا ۇيىمداستىرىلدى. جاس كەزىمنەن باستاپ ءاردايىم سۋرەت سالىپ ءجۇردىم. قازىر زەينەتكە شىعىپ, بوس ۋاقىتىم كوبەيگەن سوڭ وسىنداي كورمە وتكىزۋدى قولعا الدىم»,- دەيدى ەكس-سەناتور.
ول سۋرەت ارقىلى ويىنداعىسىن, جەتكىزگىسى كەلەتىنىن ايتتى.
«العاش رەت وسىنداي كورمە ۇيىمداستىرىپ وتىرمىن. شابىتىمنان تۋىنداعان سۇيىسپەنشىلىكتى باسقالارعا, كەلە جاتقان ۇرپاققا كورسەتسەم دەيمىن. كورمە ولاردى تابيعاتتى قۇرمەتتەۋگە, تۋعان جەردى باعالاۋعا ناسيحاتتايدى دەگەن ويدامىن», دەيدى پروفەسسور.
ەلوردا تۇرعىندارى مەن قوناقتارى كورمەنى ەكى اي بويى تاماشالاي الادى.