جامبىل وبلىسىندا ۇيتقىپ سوققان داۋىلدى جەلدىڭ سالدارىنان بىرقاتار نىساندارعا زاقىم كەلدى. تاراز قالاسى بويىنشا اباي, جامبىل داڭعىلدارى مەن قازىبەك بي, ق.ساتباەۆ, كوشەنەي كوشەلەرىندەگى جانە 15-ىقشاماۋدانداعى 10 كوپقاباتتى تۇرعىن ءۇيدىڭ 1405 شارشى مەتر شاتىرى زاقىمدالعان. قالالىق اكىمدىكتىڭ مالىمەتىنشە, شاتىرلاردى قالپىنا كەلتىرۋ جۇمىستارى مەردىگەرلەر تاراپىنان جەدەل ىسكە اسىرىلاتىن بولادى. سونداي-اق, 15-ىقشاماۋدانى №14 ءۇيدىڭ 20 شارشى مەتر بالكونى جانە 3 مەتر گاز قۇبىرىنا زالال كەلگەن, دەپ حابارلايدى Egemen.kz.
سونىمەن قاتار, بايزاق باتىر, اسقاروۆ, گەرتسەن كوشەلەرىندەگى 3 ەلەكتر باعاناسى قۇلاعان. بىراق, قۇلاعان باعانالاردى «تاراز جارىق» جاۋاپكەرشىلىگى شەكتەۋلى سەرىكتەستىگىنىڭ 3 بريگاداسى قالپىنا كەلتىرگەن. سول سياقتى, بايزاق باتىر, ا.اسقاروۆ, ا.پۋشكين, ءال-فارابي كوشەلەرىندە 6 جەردەن ەلەكتر جەلىلەرى ۇزىلگەن. ول دا «تاراز قالالىق ەلەكتر جۇيەلەرى» مەكەمەسى تاراپىنان جوندەلگەن. سونداي-اق, ەلەكتر جارىعىنىڭ وشۋىنە بايلانىستى, ديسپەتچەرلىك قىزمەتكە 5 ءوتىنىش ءتۇسىپ, بۇل جۇمىستار جەدەل بريگادالار تاراپىنان ىسكە قوسىلعان.
داۋىلدى جەلدىڭ سالدارىنان تاراز قالاسىنداعى كوشەلەردە 40-قا جۋىق تال قۇلاپ, ولاردى تازالاۋ جۇمىستارىنا «جاسىل ەل-تاراز» جاۋاپكەرشىلىگى شەكتەۋلى سەرىكتەستىگى تاراپىنان 4 بريگادا جانە 13 تەحنيكا تارتىلدى. ناتيجەسىندە, قۇلاعان 20 اعاش كەسىلىپ, شىعارىلعان. سونىمەن قاتار, قالا كوشەلەرىندەگى 20 باعدارشام ىستەن شىققان. ونى قالپىنا كەلتىرۋ جۇمىستارىنا «سمەۋ-اۆتوترانسسيگنال-2» جاۋاپكەرشىلىگى شەكتەۋلى سەرىكتەستىگى تاراپىنان 4 بريگادا ۇيىمداستىرىلعان. ال, ى.سۇلەيمەنوۆ كوشەسىنىڭ بويى مەن «پوبەدا» تۇرعىن القابىندا ەكى ايالداما قۇلاعان. قازىرگى تاڭدا ولاردى قالپىنا كەلتىرۋ جۇمىستارى جۇرگىزىلۋدە. قالا بويىنشا 42 بيلبورد, 5 پيلوننىڭ باننەرى, تۇڭعىش پرەزيدەنت ساياباعىنداعى تۋ جىرتىلعان. بۇل باننەرلەردى الىپ تاستاۋ جۇمىستارىمەن جارناما اگەنتتىكتەرى اينالىسۋدا. ال, قالاداعى جىلۋ بەرۋشى جانە تاسىمالداۋشى كوممۋنالدىق كاسىپورىندارعا ەشقانداي ءوتىنىش تۇسپەگەن.