كونفەسسياارالىق جانە وركەنيەتارالىق ديالوگتى دامىتۋ جونىندەگى ن.نازارباەۆ ورتالىعى قازاقستان رەسپۋبليكاسى تاۋەلسىزدىگىنىڭ 30-جىلدىعى قارساڭىندا حالىقارالىق دەڭگەيدەگى تەماتيكالىق كونفەرەنتسيالار توپتاماسىن ىسكە قوستى, دەپ حابارلايدى Egemen.kz.
بۇگىن «PeaceTalks» ديسكۋسسيا الاڭى شەڭبەرىندە ء«دىني ليدەرلەردىڭ تۇراقتى الەم دامۋىنا قول جەتكىزۋدەگى ءرولى» تاقىرىبىنداعى وسى جىلعى العاشقى حالىقارالىق ونلاين-كونفەرەنتسياسى ءوتتى.
ءىس-شارا جۇمىسىنا قازاقستان مەملەكەتتىك ورگاندارى مەن ءدىني بىرلەستىك وكىلدەرى, الەمدىك جانە ءداستۇرلى دىندەر ليدەرلەرىنىڭ سەزى حاتشىلىعىنىڭ مۇشەلەرى, الدىڭعى قاتارلى شەتەلدىك ساراپشىلار جانە ساۋد ارابياسى كورولدىگى, مىسىر اراب رەسپۋبليكاسى, ۆاتيكان, ءۇندىستان, ۇلىبريتانيا, رەسەي فەدەراتسياسى, وزبەكستان مەن يران يسلام رەسپۋبليكاسى حالىقارالىق ۇيىمدارىنىڭ جەتەكشى سپيكەرلەرى قاتىستى.
ونلاين-كونفەرەنتسيانى اشۋ بارىسىندا قر اقپارات جانە قوعامدىق دامۋ ۆيتسە-ءمينيسترى مارات ءازىلحانوۆ قاتىسۋشىلارعا كونفەسسياارالىق جانە وركەنيەتارالىق ديالوگتى دامىتۋ جونىندەگى ن.نازارباەۆ ورتالىعىنىڭ جاڭا باسقارما توراعاسى سارسەنباەۆ بۋلات سەرعازى ۇلىن تانىستىرىپ ءوتتى.
ءوز سوزىندە ۆيتسە-مينيستر بەيبىتشىلىك پەن كەلىسىم ءۇشىن ماڭىزدى جاعداي ءدىني كوشباسشىلاردىڭ ورىن ىستەرىن بىرلەستىرۋ, ولاردىڭ ءبىر-بىرىمەن شىنايى قارىم-قاتىناسى جانە كونسترۋكتيۆتى ارەكەتتەردەگى قولداۋلارى ەكەندىگىن ەرەكشەلەدى.
ءوز كەزەگىندە, باسقارما توراعاسى بۋلات سارسەنباەۆ ونلاين-كونفەرەنتسيانىڭ اشىلۋىندا بۇگىن ءبىزدىڭ عالامشارىمىزدا وركەنيەتتەردىڭ قاۋىپسىزدىگى مەن ۇيلەسىمى قاتار ءومىر ءسۇرۋ ارحيتەكتۋراسىن قۇرۋ جانە دامىتۋدىڭ جاھاندىق بولاشاعىنا قاتىستى ءتۇرلى كوزقاراستارىمەن الماسۋ مۇمكىندىگىمىز بار ەكەندىگىن ايتىپ ءوتتى.
«قازىرگى زامان سىن-قاتەرلەرى قاۋىپسىزدىك پەن دامۋدىڭ جاڭا پاراديگمالارىن قۇرۋدى تالاپ ەتەدى. ونىڭ نەگىزىندە سەرىكتەستىك, ءوزارا سىيلاستىق, تولەرانتتىق جانە ءوزارا تۇسىنۋشىلىك ۇستانىمدارى بولۋ كەرەك. الەمدىك جانە ءداستۇرلى دىندەر ليدەرلەرىنىڭ سەزى بىرەگەي الاڭ بولا تۇرا, ءوزىن ءدىني كوشباسشىلار وكىلدەرى اراسىندا ديالوگتى جىلجىتۋداعى ىقپالدى پلاتفورماسى رەتىندە تانىستىردى. ەندى بۇل قاعيدالاردىڭ بارلىق جەردە ورتاق بولۋى ماڭىزدى», – دەدى مودەراتور.
حالىقارالىق سپيكەرلەر الەمدىك جانە ءداستۇرلى دىندەر ليدەرلەرىنىڭ سەزى اياسىندا الەمدەگى دىندەر مەن مادەنيەتارالىق ديالوگتى ىلگەرىلەتۋدەگى قازاقستان رەسپۋبليكاسىنىڭ ايرىقشا ءرولىن اتاپ ءوتتى. حالەد اكاشە, پاپالىق كەڭەستىڭ يسلام ىستەرى بويىنشا بيۋروسىنىڭ باسشىسى جانە مۋحاممەد مەحدي تاسحيري, يران يسلام رەسپۋبليكاسى دىنارالىق ديالوگ حالىقارالىق ورتالىعىنىڭ توراعاسى قازىرگى جاھاندانۋ زامانىنداعى شىندىقتار تەك ءدىن ليدەرلەرىنىڭ عانا ەمەس, سونىمەن قاتار مەملەكەت باسشىلارىنىڭ تۇجىرىمدامالارى مەن ءىس-ارەكەتتەرىنە دە بايلانىستى دەگەن ورتاق پىكىرگە كەلدى.
وزەكتى سۇراقتاردى تالقىلاۋدى جالعاستىرا ساراپشىلار الەمدىك جانە ءداستۇرلى دىندەردىڭ جاھاندىق ديالوگىن دامىتۋداعى مەملەكەتتەردىڭ حالىقارالىق باستامالار ماڭىزدىلىعىنا توقتالدى. رەسەي-اراب زەرتتەۋ جانە اقپارات ورتالىعىنىڭ توراعاسى مادجيد ابدۋلازيز ات-تۋركي جانە دوركينگ قالاسى اعىلشىن شىركەۋىنىڭ وكىلى دجو بەيلي ۋەللس قاتىسۋشىلاردى وشپەندىلىك پەن توزبەۋشىلىك سەبەبىنەن پايدا بولعان زورلىق وقيعالارىن بولدىرماۋ جانە مىزعىماس تۇراقتىلىققا جەتۋدەگى الەمدىك قاۋىمداستىقتىڭ بەلسەندى ارەكەتتەرىنە بارىنشا قولداۋ كورسەتۋگە شاقىردى.
سپيكەرلەر پاندەميا زارداپتارىنا قاراماستان دىنارالىق قارىم-قاتىناستاردى كۇشەيتۋدە مەملەكەتتەر قولداۋ كورسەتىپ, رۋحاني قۇندىلىقتاردى ناسيحاتتاۋدا ءوزىنىڭ فۋندامەنتالدىق جانە تاجىريبەلىك ۇلەسىن ەنگىزۋ قاجەتتىلىكتەرى تۋرالى ويلارىمەن ءبولىستى. وسىعان بايلانىستى, «سومايا ۆيدياۆيحار» ءۇندى ۇيىمىنىڭ وكىلى, رۋدراكشا ساكريكار الەمدە دىنارالىق ديالوگتى كۇشەيتۋ جانە ونى ءارى قاراي دامىتۋ ءدىني كوشباسشىلاردىڭ باستى ميسسياسى ەكەندىگىنە كونفەرەنتسيا قاتىسۋشىلارىنىڭ نازارىن اۋداردى.
حالىقارالىق ونلاين-كونفەرەنتسيانىڭ قورىتىندىسى بويىنشا قاتىسۋشىلار دىنارالىق ديالوگتى نىعايتۋ سۇراقتارى بويىنشا بولاشاقتاعى جەمىستى سەرىكتەستىكتى, «PeaceTalks» ديسكۋسسيالىق الاڭىنىڭ شەگىندە تاجىريبەلىك ۇسىنىستاردى ازىرلەۋ تۋرالى كەلىسىمگە قول جەتكىزدى.