بيىل قازاق پوەزياسىنىڭ پاديشاھى, اقيىق اقىن مۇقاعالي ماقاتاەۆتىڭ 90 جىلدىق مەرەيتويى. ولەڭ ولكەسىنىڭ ايتۋلى وقيعاسىنا وراي نۇر-سۇلتان قالاسى اكىمدىگىنىڭ مۋزىكالىق جاس كورەرمەن تەاترى «عاشىق جۇرەك» پوەتيكالىق-مۋزىكالىق قويىلىمىن كورەرمەن نازارىنا ۇسىندى. كومپوزيتسيا اۆتورى ءارى رەجيسسەرى – امان عۇماروۆ.
تەاتر اكتەرلەرى قالا تۇرعىندارى مەن قوناقتارىنا ۇيلەسىمدىلىك پەن تارتىمدى رەجيسسەرلىك كومپونەنتتەردەن قۇرىلعان تاماشا مۋزىكالىق كەش سىيلادى.
– تەاترىمىزدىڭ كورەرمەندەرىن قازاق پوەزياسىنىڭ اقيىق اقىنى م.ماقاتاەۆتىڭ ولەڭدەرىمەن جاڭاشىل باعىتتا, جاستار كوزقاراسىندا تانىستىرۋدى ءجون سانادىق. «عاشىق جۇرەك» قويىلىمى ولەڭدەر ارقىلى اقىننىڭ بۇكىل بولمىسىن كورسەتەدى. قازىر قوعامدا «جاستار پوەزيانى وقىمايدى, ولەڭدى كوپ تۇسىنبەيدى» دەگەن كەرەعار ۇعىم بار. سوندىقتان دا وسى ساحنالانىپ جاتقان قويىلىم ەرەكشە شىنايى سەزىمدەردى تارقاتاتىن بولادى. جاس ۇرپاقتىڭ بويىندا اقىن شىعارماشىلىعى تۋرالى ەرەكشە وي قالىپتاستىرادى دەپ سەنەمىن, – دەدى تەاتر ديرەكتورى اسحات ماەميروۆ.
ءيا, پوەزيا مەن مۇقاعالي, اقىن ءوز ولەڭىندە تولعانعانىنداي, ەگىز ۇعىمعا اينالىپ كەتكەنى راس. ولەڭ دەسە, پوەزيا دەسە بىردەن ويىمىزعا كەلە قالاتىن تۇلعالاردىڭ ءبىرى دە وسى مۇقاعالي ەكەنى انىق. سوندىقتان دا حالقىمىزدىڭ اسىل پەرزەنتىنىڭ, ادەبيەتىمىزدەگى ۇلكەن سۋرەتكەردىڭ ەسىمى ارقاشان دا ەل ەسىندە ءجۇرۋى ءتيىس. وسى ماقساتتى ۇستانعان تالانتتى تەاتر ۇجىمى «عاشىق جۇرەك» قويىلىمى ارقىلى ولەڭسۇيەر كورەرمەننىڭ كوڭىل پەرنەسىنە بويلادى.
مۇقاعالي ماقاتاەۆتىڭ بەينەسىن تەاتر اكتەرى قازىبەك ەسقارا, ال ونىڭ دوسى ءشامىلدىڭ ءرولىن ەرنازار جاڭاتىلەك كەيىپتەدى. كوپشىلىك ساحنادا تەاتردىڭ جاس ارتىستەرى ونەر كورسەتتى. بولات جولداسوۆ مۋزىكاسىن ارلەگەن قويىلىمدا تەاتر وركەسترىنىڭ سۇيەمەلدەۋىمەن مۇزبالاق اقىننىڭ «ەسىڭە مەنى العايسىڭ!», «كۇن قايدا», «انا, سەن باقىتتىسىڭ», «جاپىراق جۇرەك جاس قايىڭ», «وتىزدان اسىپ بارامىن», «كۇرەڭ كۇز», «باقىت دەگەن», ء«سابي بولعىم كەلەدى», «قايران جەڭگەم», «قازاقستانىم» شىعارمالارى جانە ودان بولەك «التاي-اتىراۋ» پوەماسى, سونداي-اق «باقىت دەگەن نە ءوزى؟!», «شىدا, شىدا», «سۇيەدى ەكەم», ء«شامىل-اۋ» جانە تاعى دا باسقا پوەزيالارى وقىلدى.
سپەكتاكل سوڭىندا بەلگىلى جازۋشى, قازاقستاننىڭ ەڭبەك سىڭىرگەن قايراتكەرى ءشاربانۋ بەيسەنوۆا قويىلىمنان العان اسەرىمەن ءبولىسىپ, جاس تەاتر ۇجىمىنا جۇرەكجاردى لەبىزىن ءبىلدىردى:
– بۇگىن قازاقتىڭ قارا ولەڭىنىڭ ۇلكەن قۇدىرەتىن تانىتقان اقىن – مۇقاعالي ماقاتاەۆتىڭ شىعارماشىلىعى ءۇشىن, قۇرمەتى ءۇشىن, ارۋاعى ءۇشىن وسىنداي قويىلىم كورسەتىلدى. ادام ءوزى ولەڭدى تازارۋ ءۇشىن وقيدى دەپ ويلايمىن. ادامنىڭ ساناسىن, كوڭىل كۇيىن ءدال وسى ولەڭدەي, كۇيدەي تازارتاتىن قۇدىرەت جوق شىعار. سوندىقتان جاستارىمىز ولەڭ وقىپ وسسە, ءبىزدىڭ ادەبيەتىمىزدى تانىپ بىلسە, ەلىمىزدىڭ كەلەشەگى زور بولادى. ءبىز وسى تەاتر اشىلعاننان بەرى تۇراقتى كورەرمەنىنە اينالدىق, – دەدى جازۋشى.
وسىلايشا ۇلى اقىن شىعارمالارى تەاتر ساحناسى ارقىلى بولاشاققا ماڭگىلىك جول سالدى. ونى اقىن پوەزياسىن شابىتتانا وقىعان جاستاردىڭ جالىندى جانرى جانە ءبىر مارتە ايقىن سەزىندىرگەندەي. قويىلىمنان شىن مانىندە ءوزى جايلى ءوزى ايتىپ كەتكەن اقىن جۇرەگىنىڭ ءۇنىن ەستىگەندەي بولدىق. ول – مۇقاعاليدىڭ «عاشىق جۇرەگى»!