الماتى وبلىسى قۇس ەتى مەن جۇمىرتقا وندىرۋدە كوشباسشىلار قاتارىندا. قۇس ەتىن ەكسپورتتاۋ سوڭعى ءۇش جىلدا 2 ەسە وسكەن. بۇل تۋرالى الماتى وبلىسىنىڭ اكىمى اماندىق باتالوۆ ءوزىنىڭ تۇرعىندار الدىنداعى ەسەپ بەرۋ جيىنىندا ايتتى, دەپ حابارلايدى Egemen.kz الماتى وبلىسى اكىمىنىڭ ءباسپاسوز قىزمەتىنە سىلتەمە جاساپ.
وتكەن جىلى ىسكە قوسىلعان ىلە اۋدانىنداعى «ناۋرىزاگرو» جىلىنا 32 ملن دانا ينكۋباتسيالىق جۇمىرتقا شىعارسا, ۇيعىر اۋدانىنداعى «OTAN GreenFood» قۇس فابريكاسى جىلىنا 30 مىڭ توننا قۇس ەتىن وندىرەدى. ەتتى باعىتتاعى «پريما قۇس» جشس قۋاتى 37 مىڭ توننا بولاتىن قۇس فابريكاسىنىڭ قۇرىلىسىن باستالادى.
اماندىق باتالوۆ ەت وڭدەۋگە قاتىستى ترانسۇلتتىق كومپانيالاردىڭ قاتىسۋىمەن جۇزەگە اسىرىلاتىن جوبالارعا دا توقتالدى. ماسەلەن, «باۋمانن» نەمىس كومپانياسى «جەتىسۋ قوي» جوباسىن جۇزەگە اسىرا باستايدى. بۇل جىلىنا 30 مىڭ توننا ۇساق مال ەتىن تەرەڭ وڭدەيتىن جوبا بولماق.
امەريكالىق «تايسون فۋدس» كومپانياسى ءىرى قارا ەتىن وڭدەيتىن, قۋاتى جىلىنا 500 مىڭ باس مال ەتىن وڭدەۋگە قاۋقارلى ەت وڭدەۋ زاۋىتىن سالادى. ول ءۇشىن قاپشاعاي قالاسىنىڭ ماڭىنان جەر ۋچاسكەسى ءبولىندى.
- ءبىز بۇل نىسانداردى تەزىرەك سالىپ ءبىتىرۋى ءۇشىن ينۆەستورلارعا جان-جاقتى كومەك كورسەتۋىمىز كەرەك, - دەدى ا. باتالوۆ.