قازاقستان مەن وزبەكستان ەكى ەلدىڭ قالالارىن جالعايتىن تەمىرجول سالۋدى جوسپارلاپ وتىر, دەپ حابارلايدى Egemen.kz
كەشە, 12 اقپاندا يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى سايديكرام نيازحودجاەۆپەن كەزدەستى.
تاراپتار ەكىجاقتى ىنتىماقتاستىقتى تەرەڭدەتۋ پەرسپەكتيۆالارىن تالقىلادى. ونىڭ ىشىندە ينفراقۇرىلىمدىق جوبالارعا ەرەكشە نازار اۋداردى.
قازاقستان مەن وزبەكستان ەكى ەلدىڭ تۋريستىك الەۋەتىن ارتتىرۋعا مۇمكىندىك بەرەتىن جوعارى جىلدامدىقتى تۇركىستان – شىمكەنت – تاشكەنت تەمىرجول جولاۋشىلار قاتىناسىن جۇزەگە اسىرۋ بويىنشا جۇمىستار جۇرگىزۋدە. بۇدان باسقا, وزبەكستان اۋماعىنا شىعاتىن ماقتارال – داربازا جاڭا جەلىسىن سالۋ جوسپاردا بار. ول جوبا سارىاعاش وتكەلى پۋنكتىنىڭ جۇكتەمەسىن ەداۋىر ازايتادى.
سونىمەن قاتار, تۇركىستاننان تاشكەنتكە دەيىن سوزىلاتىن جاڭا جوعارى جىلدامدىقتى ماگيسترالدى ىسكە قوسۋ كوزدەلىپ وتىر.
سونداي-اق, مينيستر مەن ەلشى اۋە قاتىناسى جايىن تالقىلادى. كوروناۆيرۋس پاندەمياسىنا قاراماستان, ەكى ەل اراسىنداعى رەيستەر تۇراقتى ورىندالۋدا. بولاشاقتا ولاردىڭ سانىن ۇلعايتۋ, سونداي - اق وزبەكستاننىڭ ۇرگەنچ, سامارقاند, نۇكىس قالالارىنان قازاقستاننىڭ تۇركىستان, اقتاۋ جانە تاراز قالالارىنا جاڭا باعىتتار اشۋ جوسپاردا بار.
ينفراقۇرىلىمدىق جوبالاردان بولەك كەزدەسۋگە قاتىسۋشىلار ونەركاسىپتىك جوبالارعا نازار اۋداردى. تاراپتار قازاقستانداعى ماشينا جاساۋ سالاسىنا ماماندانعان, سونداي-اق وزبەكستان اۋماعىندا فارماتسەۆتيكالىق ءونىم شىعاراتىن بىرلەسكەن كاسىپورىندار قۇرماقشى. سونداي-اق, شىمكەنتتە دارىلىك زاتتار جانە گيگيەنالىق بۇيىمدار شىعاراتىن زاۋىت سالۋ جوسپارلانىپ جاتىر.