20 كەن ورنى العاش رەت مەملەكەتتىك تەڭگەرىمگە قويىلدى, الدىن الا دەرەكتەر بويىنشا 7,5 ملرد.تەڭگەدەن استام ينۆەستيتسيا گەولوگيالىق سالاعا تارتىلدى, قاراعاندىدا گەوحيميالىق زەرتحانا ىسكە قوسىلدى. قازاقستاننىڭ گەولوگيا سالاسىنداعى 2020 جىلعى جۇمىسىنىڭ وسى جانە باسقا دا قورىتىندىلارىن قر ەكولوگيا, گەولوگيا جانە تابيعي رەسۋرستار ۆيتسە-ءمينيسترى سەرىكقالي برەكەشەۆ مينيسترلىكتىڭ كەڭەيتىلگەن القا وتىرىسىندا جاريالادى.
ونىڭ ايتۋىنشا, وتكەن جىلى 56 نىساندا جەر قويناۋىن مەملەكەتتىك گەولوگيالىق زەرتتەۋ جۇرگىزىلدى, ونىڭ ناتيجەلەرى بويىنشا پايدالى قازبالاردى انىقتاۋعا ارنالعان پەرسپەكتيۆالى ۋچاسكەلەر انىقتالدى. اياقتالعان جۇمىستاردىڭ ناتيجەلەرى بويىنشا بولجامدى رەسۋرستاردىڭ ءوسۋى بويىنشا جوسپارلى كورسەتكىشتەرگە تولىق كولەمدە قول جەتكىزىلدى: التىن – 12,6 توننا, كۇمىس – 96 توننا, مىس – 65 مىڭ توننا, قورعاسىن – 968 مىڭ توننا, مىرىش – 1,1 ملن. توننا.
سونىمەن قاتار, ۆيتسە-مينيستر 2020 جىلى پايدالى قازبالار قورىنىڭ وسكەنىن حابارلادى. وسىلايشا, 111,5 توننا التىن, 55,4 مىڭ توننا ۋران, 13,8 ملن.توننا تەمىر كەنى جانە 31,7 ملن. توننا مۇناي ءوندىرىلدى.
«وتكەن جىلى «قازگەولوگيا» اق ينۆەستورلارمەن بىرلەسىپ جەر قويناۋىن گەولوگيالىق زەرتتەۋ قورىتىندىلارى بويىنشا التىن ءوندىرۋ بويىنشا «شەكارا», ءتۇستى جانە اسىل مەتالدار - «ارگو» پەرسپەكتيۆالى ۋچاسكەلەرىن انىقتادى. كومپانيادا بارلىعى 47 ينۆەستيتسيالىق جوبا جۇزەگە اسىرىلۋدا», - دەدى سەرىكقالي برەكەشەۆ.
ۆيتسە-مينيستر جىلدىڭ ماڭىزدى قورىتىندىلارىنىڭ ءبىرى رەتىندە 2021-2025 جىلدارعا ارنالعان گەولوگيالىق بارلاۋدىڭ مەملەكەتتىك باعدارلاماسىنىڭ جوباسىن ازىرلەۋدى اتادى, ول مەملەكەت باسشىسىنىڭ تاپسىرماسىنا سايكەس ۇلتتىق جوبا بولىپ قايتا قۇرىلاتىن بولادى.
«ۇلتتىق جوبا مينەرالدىق-شيكىزات بازاسىنىڭ باسەكەگە قابىلەتتىلىگىن تۇراقتى تولىقتىرۋ, دامىتۋ جانە قولداۋعا جاعداي جاساۋ ءۇشىن ەل اۋماعىنىڭ گەولوگيالىق زەرتتەلۋىن ارتتىرۋعا باعىتتالعان. ول مەملەكەتتىك بيۋدجەت جانە جەكە ينۆەستيتسيالار ەسەبىنەن جۇزەگە اسىرىلادى», - دەدى ەكولوگيا ءمينيسترىنىڭ ورىنباسارى.
جىل قورىتىندىلارىنىڭ ىشىندە «ەۋرازيا» جوباسى بويىنشا جۇمىستىڭ قايتا باستالعانىن ايتۋعا بولادى.
«جوبانىڭ نەگىزگى ماقساتى – تەرەڭدىگى ورتالىق بولىگىندە 18-20 كم جەتەتىن كاسپي ماڭى ويپاتىنىڭ تەرەڭدىك قۇرىلىسىن زەرتتەۋ. 15 كم دەيىنگى اسا تەرەڭ ۇڭعىمانى بۇرعىلاۋ گەولوگيالىق قيمانى زەرتتەۋگە جانە كومىرسۋتەكتەردى ىزدەستىرۋگە قاتىستى باسسەين الەۋەتىن باعالاۋعا مۇمكىندىك بەرەدى», - دەپ حابارلادى ۆيتسە-مينيستر.
سەرىكقالي برەكەشەۆتىڭ اقپاراتى بويىنشا 2020 جىلى «تسيفرلىق قازاقستان» مەملەكەتتىك باعدارلاماسى شەڭبەرىندە «قازاقستان رەسپۋبليكاسىنىڭ مينەرالدىق رەسۋرستارىنىڭ ۇلتتىق دەرەكتەر بانكى» اقپاراتتىق جۇيەسىن ەنگىزۋ بويىنشا جۇمىس جۇرگىزىلدى.
«جۇيەنىڭ جۇمىس ىستەۋى ينۆەستورلارعا گەولوگيالىق اقپاراتتىڭ ەلەكتروندى بازاسىنا قول جەتكىزۋگە مۇمكىندىك بەرەدى», - دەدى ول.
2021 جىلعا سالا الدىنا جەر قويناۋىن مەملەكەتتىك گەولوگيالىق زەرتتەۋدى جۇرگىزۋ, 70 وبەكتىدە رەسۋرستاردى ىزدەۋ جانە باعالاۋ, «قر مينەرالدىق رەسۋرستاردىڭ ۇلتتىق دەرەكتەر بانكى» اقپاراتتىق جۇيەسىن ىسكە قوسۋ جانە 2025 جىلعا دەيىن ورتالىق جانە باتىس وڭىرلەردە 2 كەرن ساقتاۋ قويماسىن سالۋ بويىنشا مىندەتتەر قويىلدى.