بۇگىن نۇر-سۇلتان قالاسىندا ءىرى كولەمدە پارا الۋ كەزىندە جوعارعى سوت سۋدياسى ۇستالدى, دەپ حابارلايدى Egemen.kz جوعارعى سوتتىڭ رەسمي سايتىنا سىلتەمە جاساپ.
سىبايلاس جەمقورلىققا قارسى ءىس-قيمىل اگەنتتىگى مەن جوعارعى سوتىنىڭ ىشكى قاۋىپسىزدىك قىزمەتى بەلگىلى ءبىر ۋاقىت ىشىندە بىرلەسكەن ءىس-شارالار جۇرگىزدى. ناتيجەسىندە 11 اقپاندا نۇر-سۇلتان قالاسىندا ءىرى كولەمدەگى اقشانى الۋ كەزىندە جوعارعى سوتتىڭ سۋدياسى ۇستالعان.
«قاراجات ونىڭ جوعارى سوت كەڭەسىندە جۇمىس ىستەگەن كەزىندە تۇركىستان وبلىسى اۋداندىق سوتىنىڭ سۋدياسىن باسقا سوتقا اۋىستىرۋعا جاردەم كورسەتكەنى ءۇشىن بەرىلگەن. سونداي-اق تۇركىستان قالاسىندا اقشانى بەرىپ جىبەرگەن اۋداندىق سوتتىڭ سۋدياسى ۇستالدى. تەرگەۋ امالدارىنىڭ جۇرگىزىلۋىنە بايلانىستى باسقا اقپارات جاريالانبايدى», دەلىنگەن حابارلامادا.