ەلىمىزدە جۇمىرتقا مەن قۇس ەتى قىمباتتاپ جاتىر

سەنات دەپۋتاتى سۇلتان دۇيسەمبينوۆ وسى ماسەلەنى شەشۋ جولدارىن پرەمەر-ءمينيستردىڭ اتىنا جولداعان ساۋالىندا كوتەردى.

دەپۋتاتتىڭ ايتۋىنشا, كەيىنگى كەزەڭدە كوپتەگەن جەم-ءشوپ ءتۇرى 1,5-2 ەسە قىمباتتاعان. سونىمەن قاتار قازاقستان شەتەلدەن اسىل تۇقىمدى قۇستاردى, ۇنەمى قىمباتتاپ بارا جاتقان دارۋمەندىك قوسپالار مەن باسقا دا كەرەك-جاراقتى ساتىپ الۋعا ءماجبۇر.

«سوڭعى ۋاقىتتا قۇس ونىمدەرىنىڭ باعاسى تۇراقتى تۇردە ءوسىپ كەلەدى. ونىڭ تاعى ءبىر سەبەبى, قۇس ەتىنىڭ نەگىزگى بولىگى رەسەي مەن بەلارۋس ەلىنەن اكەلىنەدى. سونىمەن قاتار بىزدە قۇس تۇقىمدارى جوق. ولاردى شەتەلدەن الدىرۋعا ءماجبۇر. ودان بولەك ءتيىستى قۇرال-جابدىقتار مەن قاجەتتى دارۋمەندەر دە وزگە ەلدەن كەلەدى. بىزدە جەم-شوپتەن باسقا ەشتەڭە جوق دەۋگە دە بولادى», دەدى سەناتور.

باعانىڭ وسۋىنە اكەلەتىن ماسەلەلەردى شەشۋ ءۇشىن قۇس وسىرۋشىلەرگە مەملەكەت تاراپىنان قولداۋ قاجەت.

سۇلتان دۇيسەمبينوۆ كەيبىر وتاندىق قۇس فابريكالارى قازىر جابىلۋ الدىندا تۇرعانىن اتاپ ءوتتى. سەناتور وسىعان بايلانىستى سالا كاسىپكەرلەرى ءۇشىن ۇكىمەت لايىقتى جاعداي جاساۋى ءتيىس دەپ سانايدى.

«ولاردىڭ ىشىندە 5 جىلعا نەسيە كانيكۋلىن ۇيىمداستىرۋعا جاردەمدەسۋ, ساقتاندىرۋ سىياقىلارى جارناسىن سۋبسيديالاۋ جانە اسىل تۇقىمدى قۇستى ساتىپ الۋ, جەم-ءشوپ قورىن قۇرۋ, اكىمشىلىك توسقاۋىلداردى جويۋ جانە جوسىقسىز باسەكەلەستىكتەن قورعاۋ بار», دەدى سۇلتان دۇيسەمبينوۆ.