تاۋ مىنەزى قاتەلىكتى كەشىرمەيدى. وسكەمەننەن ريددەرگە شاڭعى تەبۋگە بارعان ساياحاتشىلاردىڭ ءبىرى وقىستا كوز جۇمدى. ولار ءۇلبى وزەنىنىڭ ءور جاعىنداعى تاۋدان سىرعاناپ كەلە جاتقاندا, كەنەت كوشكى ءجۇرىپ, شاڭعىشىنىڭ ءبىرىن باسىپ قالعان.
– دەرەۋ كومەككە وبلىستىق توتەنشە جاعدايلار دەپارتامەنتىنىڭ جەدەل قۇتقارۋ جاساعىنىڭ قۇتقارۋشىلار توبى ەۆروكوپتەر-145 تىكۇشاعىمەن شىقتى. قۇرامىندا كينولوگ تا بار. تاعى بەس ادامنان قۇرالعان توپ جول تالعامايتىن كولىكپەن وسكەمەننەن شىقتى. وعان قوسا ريددەردىڭ قۇتقارۋشىلارى مەن 4 ۆولونتەر جۇمىلدىرىلدى, - دەدى قازاقستان رەسپۋبليكاسى توتەنشە جاعدايلار مينيسترلىگىنىڭ رەسمي وكىلى تالعات ءۋالي.
الايدا, تىكۇشاق كۇننىڭ بۇلتتى بولۋى مەن اق تۇتەك بورانعا بايلانىستى قونۋعا ءماجبۇر بولعان. وسى ۋاقىت ىشىندە ساياحاتشىلار بايلانىسقا شىققان. وكىنىشكە وراي, ولار قار كوشكىنى باسىپ قالعان جىگىتتىڭ دەنەسىن تاۋىپ العانىن حابارلاعان. ساياحاتشىلار بەرگەن كوورديناتقا قۇتقارۋشىلار مەن ۆولونتەرلار قالىڭ قاردا قيا بەتكەيمەن ازەر جەتكەن. قاردا جۇرەتىن تەحنيكا بولماعاندا, ءتىپتى اۋرەگە تۇسەر ەدى. ونىڭ ۇستىنە قاراڭعى دا ءتۇسىپ كەتكەن.
ال 1979 جىلى تۋعان ازاماتتىڭ دەنەسىن تاۋ باسىنان ءتۇسىرۋ قۇتقارۋشى توپ ەرتەسىندە قايتا شىقتى. ولاردىڭ قۇرامىندا 8 ۆولونتەر, ەكى قۇتقارۋشى, ءبىر كريمينالدىق پوليتسەي بار ەدى. جول كورسەتۋ ءۇشىن بە, ءۇش ساياحاتشى دا شاڭعى تەپكەن قىردى بەتكە الدى.وسى ۋاقىتقا دەيىن تجد قۇتقارۋشىلارى بىرنەشە كۇن قاتارىنان تۇرعىندارعا الدىن الا تاۋداعى كوشكىن قاۋپى تۋرالى ەسكەرتۋ جاساعان.