اتىراۋ قالاسىنىڭ ىرگەسىندە بىرنەشە ەلدى مەكەن بار. سونىڭ ءبىرى – تومارلى. جاقىندا وسى اۋىلدا تىگىنشىلىككە وقىتاتىن ورتالىق اشىلدى. وعان قاجەتتى ورىندى اتىراۋ قالاسىنىڭ اكىمدىگى ۇسىندى. ال تىگىن ماشينالارىن وبلىستىق ءماسليحاتتىڭ دەپۋتاتى, «ازاماتتىق اليانس» قوعامدىق بىرلەستىگىنىڭ جەتەكشىسى الىبەك سەمعاليەۆ ساتىپ الىپ بەردى.
مۇنداي ورتالىق كىشكەنتاي بالالارىن تاربيەلەپ وتىرعان, مۇمكىندىگى شەكتەۋلى ايەلدەردى جۇمىسپەن قامتۋعا جول اشادى. كەيىن ولار ءوز كاسىبىن اشىپ, وتباسىلىق بيۋدجەتىنە تابىس تۇسىرەتىن قادام جاسايدى, دەيدى الىبەك سەمعاليەۆ.
اتالعان ورتالىق جەتەكشىسى گۇلسىم بيتاشەۆانىڭ ايتۋىنشا, تىگىنشىلىك كۋرسىنا 15 ايەل جازىلىپتى. ونىڭ ىشىندە ءۇش ايەل – ءىى توپتىڭ, ءبىر ايەل – ءىىى توپتىڭ مۇگەدەگى. ۇشەۋى – كوپ بالالى انا. ولار تەگىن ءدارىس الادى.
– قازىر كيىم تىگۋ دە بيزنەستىڭ ءبىر تۇرىنە جاتادى. ويتكەنى بۇل – شىعارماشىلىق, ديزاينەرلىك يدەيانى جۇزەگە اسىرۋعا مۇمكىندىك بەرەدى. بۇل قىزمەت ءتۇرى تابىس تابۋدىڭ كوزى بولا الادى. مۇندا ايەلدەر وتباسى مۇشەلەرى ءۇشىن قاجەتتىڭ ءبارىن تىگۋدى ۇيرەنەدى. كيىمنىڭ تۇرلەرىن ءپىشۋ دە, تىگۋ دە – ىنتالى جاننىڭ قولىنان كەلەتىن ءىس. قازاقتىڭ ۇلتتىق كيىمدەرىن زامان تالابىنا ساي جاڭارتىپ تىگۋ ءتاسىلىن مەڭگەرەدى, – دەيدى گ.بيتاشەۆا.
اتىراۋ وبلىسى