وسكەمەندەگى پاترۋلدىك پوليتسيا قىزمەتكەرلەرىنە «102» ارناسىنان تۇنگى ۋاقىتتا تىنىشتىقتى بۇزعان ازاماتتارعا شارا قولدانۋ بويىنشا شاقىرتۋ تۇسكەن. وكىنىشكە وراي, جەدەل جەتكەن پوليتسەيلەردىڭ ءبىرى جاراقات العان.
جاياۋ ءپاترۋلدى پوليتسيا باتالونىنىڭ قىزمەت ينسپەكتورلارى پوليتسيا اعا لەيتەنانتى نۇرجان كاكەەۆ پەن بەكارىس ابدولدانوۆ كوپقاباتتى ءۇيدىڭ 9-شى قاباتىندا ەكى جىگىتتىڭ ىشىمدىك ءىشىپ, ءبىر-بىرىنە داۋىس كوتەرە سويلەسىپ تۇرعاندارىن كورەدى.
پوليتسيا قىزمەتكەرلەرى ولارعا ءتۇسىندىرۋ جۇمىستارىن جۇرگىزىپ, تۇنگى ۋاقىتتا تۇرعىنداردىڭ مازاسىن الماۋىن وتىنگەن. الايدا, ءتارتىپ ساقشىسىنىڭ ەسكەرتۋىنە قۇلاق اسپاعان ەكى جىگىت دورەكىلىك تانىتقان. سول ساتتە ەر ازاماتتىڭ ءبىرى كۇتپەگەن جەردەن پوليتسەيدىڭ موينىنا پىشاق سۇعىپ العان. ءسويتىپ, سىرتقا قاراي قاشا جونەلگەن.
العان دەنە جاراقاتىنا قاراماستان پوليتسيا اعا لەيتەنانتى كاكەەۆ نۇرجان سەرىكتەسىمەن بىرگە ءتارتىپ بۇزعان ازاماتتىڭ سوڭىنا تۇسەدى. سىرتقا شىعىپ پىشاعىن وندى-سولدى سەرمەگەن ازاماتتى ءتارتىپ ساقشىلارى رەزىڭكە تاياقشامەن قولىنان سوعىپ, پىشاعىن جەرگە قۇلاتادى.
قولعا تۇسكەن 24 جاستاعى ەر ادام تەرگەۋ يزولياتورىنا قاماۋعا الىندى. وعان قاتىستى قر قك 380-بابىنىڭ 2-ءبولىمى بويىنشا قىلمىستىق ءىس قوزعالدى. پوليتسيا اعا لەيتەنانتى نۇرجان كاكەەۆكە قاجەتتى وتا جاسالدى. دارىگەرلەردىڭ ايتۋىنشا, ومىرىنە قاۋىپ تونەتىندەي قاۋىپ جوق.
وسكەمەن