بريتاندىق پارلامەنتتە قۇراما كورولدىكتىڭ ورتالىق ازيا ەلدەرىمەن ىنتىماقتاستىعىن كەڭەيتۋ ماسەلەلەرىنە ارنالعان ونلاين-كونفەرەنتسيا ءوتتى, دەپ حابارلايدى Egemen.kz
كەزدەسۋدى ەڭ ىقپالدى پارلامەنتتىك بىرلەستىكتەردىڭ ءبىرى – پارلامەنتارالىق وداعىنىڭ بريتاندىق توبى (پوبت) ۇيىمداستىردى. پىكىرالماسۋدىڭ مودەراتورى بريتان پارلامەنتىنىڭ قاۋىمدار پالاتاسىنىڭ مۇشەسى جانە پوبت قازىناشىسى الەكس سوبەل بولدى.
كەزدەسۋگە بريتان پارلامەنتىنىڭ 20-عا جۋىق مۇشەسى, ونىڭ ىشىندە قازاقستانمەن ىنتىماقتاستىق جونىندەگى جالپىپارتيالىق پارلامەنتتىك توبىنىڭ توراعاسى بوب ستيۋارت, سونداي-اق قۇراما كورولدىكتە اككرەديتتەلگەن ورتالىق ازيا ەلدەرىنىڭ ەلشىلەرى قاتىستى.
قازاقستان ەلشىسى ەرلان ىدىرىسوۆ بيىلعى جىل قازاقستان رەسپۋبليكاسى مەن باسقا دا ورتالىق ازيا ەلدەرى تاۋەلسىزدىگىنىڭ 30 جىلدىعى ەكەندىگىن ايتتى.
وتاندىق ديپلوماتتىڭ ايتۋىنشا, وسى جىلدار ىشىندە ەلىمىز ءوزىن الەمدىك قوعامداستىقتىڭ سەنىمدى سەرىكتەسى رەتىندە كورسەتە ءبىلدى. ول سونداي-اق قازاقستاندا جۇرگىزىلىپ جاتقان, ەلدىڭ ساياسي ينستيتۋتتارىن ودان ءارى دەموكراتيالاندىرۋعا جانە دامىتۋعا باعىتتالعان ساياسي رەفورمالار مەملەكەتتىڭ ۇدايى ەۆوليۋتسيالىق دامۋى باعىتىنىڭ جالعاسى ەكەنىن نەگىزگە الدى.
ەكونوميكالىق رەفورمالار تۋرالى ايتا كەلە, ە.ىدىرىسوۆ ەل ءۇشىن باسىمدىق رەسۋرسقا تاۋەلدىلىكتەن ارىلۋ ماقساتىندا ەكونوميكانى ودان ءارى ءارتاراپتاندىرۋ بولىپ تابىلاتىنىن اتاپ ءوتتى. بۇل تۇرعىدا اۋماعىندا بريتاندىق قۇقىق نورمالارى قولدانىلاتىن «استانا» حالىقارالىق قارجى ورتالىعى – قازاقستان اۋماعىندا تانىلعان حالىقارالىق قارجى جانە ساۋدا حابىن دامىتۋ ءۇشىن ستراتەگيالىق قۇرال, سونداي-اق «بەلدەۋ جانە جول» باستاماسىن قوسا العاندا, جاڭا ينۆەستيتسيالىق جوبالاردى ىسكە اسىرۋ ءۇشىن ماڭىزدى دەمەۋ.
پارلامەنتارالىق وداعىنىڭ بريتاندىق توبى 1889 جىلى قۇرىلعان. توپ ميسسياسى – ۇلىبريتانيانىڭ حالىقارالىق قاتىناستارىن كەڭەيتۋگە, ساۋدا مەن تۇراقتى ەكونوميكالىق دامۋعا, بەيبىتشىلىك پەن قاۋىپسىزدىكتى ساقتاۋدىڭ ءتيىمدى جاھاندىق تەتىكتەرىنە پارلامەنتتىك قولداۋ كورسەتۋگە باعىتتالعان.
توپتىڭ قۇرامىنا ۇلىبريتانيانىڭ بارلىق ساياسي پارتيالارىن وكىلدىك ەتەتىن قاۋىمدار پالاتاسى مەن لوردتار پالاتاسىنىڭ دەپۋتاتتارى كىرەدى.