اتىراۋدا مەيرامحانالاردىڭ جۇمىس ۋاقىتى وزگەرە مە؟

وڭىردە 700-گە جۋىق قوعامدىق تاماقتاندىرۋ ورنى بار. ولاردىڭ 400-دەن استامى اتىراۋ قالاسىندا, 300-گە جۋىعى اۋدانداردا تىركەلگەن. قازىر مەيرامحانالار مەن ءدامحانالار كەشكى ساعات 20:00-گە جۇمىس ىستەيدى. بۇل – وبلىستىڭ باس سانيتار دارىگەرىنىڭ تالابى.

اتىراۋ وبلىسىنىڭ كاسىپكەرلەر مەن جۇمىس بەرۋشىلەر وداعىندا قوعامدىق تاماقتاندىرۋ ورىندارىنىڭ جۇمىس ىستەۋ ۋاقىتىنا قاتىستى ماسەلە قارالدى. جيىنعا مەيرامحانالار مەن ءدامحانالاردىڭ يەلەرى, سونداي-اق اتىراۋ قالاسى مەن وبلىسىنىڭ باس سانيتارلىق دارىگەرلەرى قاتىستى. كاسىپكەرلەردىڭ سۇرايتىنى – جۇمىس ۋاقىتىن ساعات 20:00-دەن 00:00-گە دەيىن ۇزارتۋ.

«اتىراۋ وبلىسىنىڭ باس سانيتارلىق دارىگەرىنىڭ سوڭعى قاۋلىسىنا سايكەس مەيرامحانالار مەن ءدامحانالاردىڭ جۇمىسىنا ساعات 20:00-گە دەيىن عانا رۇقسات ەتىلگەن. الايدا كليەنتتەر كەشكى ساعات 20:00-دەن 22:00-گە دەيىن كوپ كەلەدى. بۇل – قىزمەتكەرلەر شتاتىن ۇستاۋ, كوممۋنالدىق تولەمدەردى مەن نەسيەلەردى تولەۋ, باسقا دا وپەراتسيالىق شىعىستاردى جابۋ ءۇشىن اقشا تابا الاتىن ۋاقىت» دەيدى كاسىپكەر نۇرلان مۇقىشەۆ.

كاسىپكەرلەر جۇمىس ۋاقىتىن شەكتەۋ شىعىنعا ۇشىراتقانىن العا تارتادى. ويتكەنى تابىستىڭ 90%-عا جۋىعى جۇما كۇنى كەشتە جانە دەمالىس كۇندەرى تۇسەدى ەكەن.

«دەمالىس كۇندەرى مەيرامحانالار مەن ءدامحانالار ءبىر ساعاتتا ايلىق تاۋار اينالىمىنىڭ 20%-ىن تابادى. سول سەبەپتەن, جەكە تۇرعان مەيرامحانالار مەن دامحانالارعا ءبىر ادامعا 5 شارشى مەتر جاعدايدا ساعات 00:00-گە دەيىن جۇمىس ىستەۋگە رۇقسات بەرۋدى سۇرايمىز» دەيدى قر قوعامدىق تاماقتانۋ قاۋىمداستىعىنىڭ كەڭەسشىسى ۆەرونيكا نۇرپەيىسوۆا.

وسىعان وراي وبلىستىڭ باس سانيتارلىق دارىگەرى مادەنيەت تاناۋوۆ بۇل ماسەلەنى ەكى تاۋلىك ىشىندە قاراۋعا ۋادە بەرىپ وتىر.

«ەگەر ءبىر اپتادا ايماقتاعى ەپيدەميولوگيالىق جاعداي ناشارلاماي, «سارى» ايماقتا قالۋ  جالعاسسا, ءبىز مەيرامحانالار مەن ءدامحانالاردىڭ جۇمىس ۋاقىتىن ساعات 00:00-گە دەيىن ۇزارتۋ مۇمكىندىگىن قاراستىرامىز» دەيدى مادەنيەت تاناۋوۆ.