الماتى وبلىسى الاكول كولىندە بىلتىر باستالعان جاعالاۋدى بەكىتۋ جۇمىستارىن بيىل اياقتاۋ كوزدەلىپ وتىر. سونىڭ ناتيجەسىندە الاكول جاعالاۋى ۇزىندىعى 13,55 كم بولاتىن قورعانىس قۇرىلىسىمەن بەكەمدەنە تۇسپەك. ونىڭ 10,150 شاقىرىمى – اقشي, 3,4 كم كوكتۇما جاعىنان ورناتىلۋدا. جاعالاۋداعى قورعانىس دامباسى 3 مەترلىك تولقىنعا توتەپ بەرەدى, دەپ حابارلايدى Egemen.kz الماتى وبلىسى اكىمىنىڭ ءباسپاسوز قىزمەتىنە سىلتەمە جاساپ.
وبلىستىق قۇرىلىس باسقارماسىنىڭ مالىمەتىنە سۇيەنسەك, كولدىڭ ليتوديناميكالىق جۇيەسىن ساقتاي وتىرىپ, جاعالاۋدىڭ ودان ءارى بۇزىلۋىن بولدىرماۋ جانە وسى اۋماقتىڭ رەكرەاتسيالىق تارتىمدىلىعىن ارتتىرۋ جانە اقشي مەن كوكتۇمداعى عيماراتتار مەن قۇرىلىستاردى پايدالانۋ كەزىندەگى قاۋىپسىزدىكتى قامتاماسىز ەتۋ ماقساتىندا الاكول كولى بوگەتىنىڭ قۇرىلىسى جوباسى جۇزەگە اسىرىلادى. جوبانى ىسكە اسىرۋ ءوز كەزەگىندە جاساندى جاعاجايلار قۇرۋ ارقىلى جاعالاۋلاردى قورعاۋعا مۇمكىندىك بەرەدى, ال جاياۋ جۇرگىنشىلەر جاعالاۋىنىڭ قۇرىلىسى اقشي مەن كوكتۇم اۋماعىندا ورنالاسقان دەمالىس ايماقتارىنىڭ رەكرەاتسيالىق الەۋەتى مەن تارتىمدىلىعىن ايتارلىقتاي جاقسارتا تۇسپەك. بۇل ءوز كەزەگىندە ايماقتىڭ ەكونوميكالىق دامۋىنا ىقپال ەتەدى.
جاعالاۋداعى قورعانىس بوگەتى 3 م بيىكتىكتەگى تولقىندارعا توتەپ بەرۋگە لايىقتالعان, بۇل جاساندى بوگەت مالتاتاس جاعاجايىنىڭ قالىپتاستىرۋىنا بايلانىستى جاسالعان. جاساندى مالتاتاس جاعاجايى جاعالاۋ ايماعىندا تابيعي سۋ الماسۋدى ساقتاۋعا ىقپال ەتەدى, سۋ ءوزىنىڭ تازالىعى مەن مولدىرلىگىن ساقتايدى.
اتاپ وتسەك, ىسكە اسىرىلىپ جاتقان جوبا «قورشاعان ورتانى قورعاۋ وبەكتىلەرىن دامىتۋ» بيۋدجەتتىك باعدارلاماسى اياسىندا جۇزەگە اسىرىلىپ جاتىر. قۇرىلىس جۇمىستارىنىڭ جالپى قۇنى - 6,8 ملرد تەڭگە.
الاكول اۋداندىق اكىمدىگىنىڭ مالىمەتىنە قاراعاندا, ايدىندى الاكولدە 264 دەمالىس ورنى جۇمىس ىستەيدى. ولار كۇنىنە 23 مىڭنان استام ءتۋريستى قابىلداپ, قىزمەت كورسەتۋگە قاۋقارلى. ماسەلەن, وتكەن جىلى الاكول جاعالاۋىندا ساياباق پەن جاعاجاي ۆولەيبولى, فۋتبول جانە ۇلكەن تەننيس الاڭدارى جاسالىپ, قولدانىسقا بەرىلگەن ەدى. سول سياقتى كەڭ كولەمدى امفيتەاتر سالىنىپ, سۋبۇرقاق ىسكە قوسىلعان. جالپى 2020 جىلى كول جاعالاۋىندا دەمالۋشىلارعا 4 ملرد 790 ملن تەڭگەنىڭ قىزمەتى كورسەتىلگەن.