سەناتور زەرتتەۋ ۋنيۆەرسيتەتتەرىندەگى رەفورمانى سىنادى

«قازىر ءبىز ءوزىمىزدىڭ عىلىمي جوبالارىمىزعا شەتەلدىك عالىمداردى تارتا الماعاندىقتان, شەتەلدىك تەحنولوگيالاردىڭ ترانسفەرتىن  قامتاماسىز ەتە الماي وتىرمىز. سەبەبى ءبىزدىڭ سەرىكتەستەرىمىز 3 جىل مەرزىمدە اۋىل شارۋاشىلىعىندا ماڭىزدى عىلىمي ناتيجەلەرگە قول جەتكىزۋدىڭ مۇمكىن ەمەستىگىن تۇسىنەدى. دەمەك, اگرارلىق عالىمدارىمىزدى ءبىز ءوزىمىز تىعىرىققا تىرەپ وتىرمىز. ارينە, وسىدان كەيىن ءوندىرىستىڭ سۇرانىسىن وتەي المايتىن, «شيكى» عىلىمي جوبالار پايدا بولادى», دەپ اتاپ ءوتتى دەپۋتات.

سەناتور قازاقستاندىق عىلىمنىڭ دامۋ پروبلەمالارى تۋرالى ايتا كەلىپ, 2020 جىلعى جاھاندىق يننوۆاتسيالىق يندەكستە ءبىزدىڭ ەلىمىز رەسەي, بەلارۋس, ارمەنيا جانە مونعوليادان ارتتا قالىپ, 77-ورىنعا يە بولعانىن ەسكە سالدى. ال 2019 جىلى قازاقستاندا يننوۆاتسيالىق ءونىم كولەمى ەلدىڭ ءىجو-ءنىڭ 1,6% - ىن قۇرادى. سالىستىرا قاراعاندا رەسەيدە بۇل كورسەتكىش 8 ەسە, ال تەحنولوگيالىق دامىعان ەلدەردە 20-30 ەسە جوعارى.

اقىلبەك كۇرىشباەۆتىڭ پىكىرىنشە, كوپتەگەن رەفورمالارعا قاراماستان, ەلىمىزدە عىلىم مەن جوعارى ءبىلىم بەرۋدە جۇيەلى وزگەرىستەر جۇرگىزىلگەن جوق. سەناتور قازاقستان ءالى كۇنگە دەيىن الەمدىك عىلىمي جانە ءبىلىم بەرۋ كەڭىستىگىنە ىقپالداسا المادى دەپ سانايدى.

«بىزدە قۇرىلعان بىرنەشە عىلىمي-زەرتتەۋ ۋنيۆەرسيتەتتەرىنىڭ جۇمىس ىستەۋ مازمۇنى ەمەس, تەك ماڭدايشاسىنداعى جازۋى وزگەردى. ال سالالىق مينيسترلىكتەر ءتىپتى باسقا جولمەن ءجۇر. ولار وزدەرىنە باعىنىشتى ۋنيۆەرسيتەتتەردىڭ عىلىمي الەۋەتىن نىعايتۋدىڭ ورنىنا, ولاردىڭ ۇستىنەن نەشە ءتۇرلى اكىمشىلىك قۇرىلىمداردى ويلاپ تابۋدا. مۇنداي جۇيە ەشبىر دامىعان ەلدە جوق», دەدى سەناتور.

ول عىلىمدى دامىتۋ جانە ساپالى عىلىمي الەۋەتتى قالىپتاستىرۋداعى ماڭىزدى مىندەتتەردى شەشۋ ءۇشىن ءبىلىم جانە عىلىم مينيسترلىگىنە نازار اۋدارۋدى سۇرادى.