قىزىلوردا وبلىسىندا مۇگەدەكتىك بويىنشا زەينەتاقى رەسىمدەپ بەرۋگە ۋادە ەتكەن الاياق ايەل ۇستالدى, دەپ حابارلايدى Egemen.kz Polisia.kz سايتىنا سىلتەمە جاساپ
قىزىلوردا قالالىق پوليتسيا باسقارماسىنىڭ قىزمەتكەرلەرى جەدەل-ىزدەستىرۋ ءىس-شارالارى بارىسىندا وبلىس ورتالىعىنىڭ 35 جاستاعى تۇرعىنىن قۇرىقتادى. ول وبلىس تۇرعىنىنا مۇگەدەكتىك بويىنشا زەينەتاقى رەسىمدەۋگە جاردەمدەسۋگە ۋادە ەتكەن.
جابىرلەنۋشى الاياقتىڭ سوزىنە سەنىپ, وعان 180 مىڭ تەڭگە كولەمىندە قاراجات تولەگەن. ءوزىنىڭ ايلا-امالدارى مەن جوسپارلارىن جۇزەگە اسىرۋ ماقساتىندا كۇدىكتى ازاماتشا وعان الەۋمەتتىك قامسىزداندىرۋ مەكەمەسىنىڭ قىزمەتكەرى ەكەنىن ايتقان.
قازىرگى تاڭدا كۇدىكتى ازاماتشانىڭ الاياقتىقتىڭ بۇدان باسقا دا ەكى دەرەگىنە قاتىستىلىعى انىقتالدى. وعان قاتىستى قازاقستان رەسپۋبليكاسى قىلمىستىق كودەكسىنىڭ 190-بابى 3-بولىگىنىڭ 4-تارماعىمەن (بىرنەشە رەت جاسالعان الاياقتىق) سوتقا دەيىنگى تەرگەپ-تەكسەرۋ امالدارى جۇرگىزىلۋدە.
كۇدىكتى ءوز كىناسىن تولىق مويىندادى.
ايدا ورالبەك