قاراعاندى مەديتسينالىق ەرىكتىلەر مەكتەبى يگى جوبانى قولعا الدى. ەندى ۆولونتەر بولۋدى جۇرەك قالاۋىمەن تاڭداعان جاستار بۇل جەردە العاشقى كومەك كورسەتۋ, وكپە-جۇرەك رەانيماتسياسىن جۇرگىزۋ, ناۋقاسقا كۇتىم جاساۋ, پاتسيەنتتى تاسىمالداۋ سىندى ءىس-ارەكەتتەردىڭ قىر-سىرىن وقىپ, ۇيرەنەتىن بولدى.
وسى شارۋانىڭ ءبارىن «قازاقستان مەديتسينا جاستارى» رقۇ وبلىستىق فيليالىنىڭ توراعاسى, قاراعاندى مەديتسينا ۋنيۆەرسيتەتىنىڭ بەسىنشى كۋرس ستۋدەنتى, ەرىكتى دارىن ءابىلجانوۆ ۇيلەستىرىپ ءجۇر.
مۇنداي مەكتەپتەر بۇگىنگى كۇندە الماتى, نۇر-سۇلتان جانە شىمكەنت قالالارىندا اشىلىپ, جۇمىس ىستەپ جاتقان كورىنەدى. بۇل ۇردىستەن قاراعاندىلىق جاستار دا تىس قالماي, قاراعاندى مەديتسينا ۋنيۆەرسيتەتىنىڭ رەكتورى راۋشان دوسماعامبەتوۆاعا وقۋ ورنىنىڭ بازاسىندا ۆولونتەر-دارىگەرلەر مەكتەبىن اشۋ تۋرالى ۇسىنىس حات جىبەرگەن. ول جاستاردىڭ يدەياسىن قولداپ, كوپ ۇزاماي كەنشىلەر استاناسىندا ەرىكتىلەر مەكتەبى پايدا بولدى. الداعى ۋاقىتتا بۇل ۇيىم مەكتەپ بىتىرگەن ەرىكتىلەردى كومەككە ءزارۋ جاندارعا جىبەرىپ وتىرماقشى.
– مۇنداي مەكتەپ نەلىكتەن قاجەت؟ بىرىنشىدەن, بۇل العاشقى مەديتسينالىق كومەك كورسەتۋدى جاقسارتادى جانە جاس مەديتسينا قىزمەتكەرلەرىن دايارلاۋ ساپاسىن ارتتىرادى. ءبىز كوۆيد-ناۋقاستاردى كۇتۋگە كومەكتەسەمىز, ياعني مەديتسينا قىزمەتكەرلەرىنىڭ ەموتسيالىق جانە فيزيكالىق جۇكتەمەسى ازايادى. ءبىزدىڭ دايىندىعىمىز كەز كەلگەن ادامعا قيىن جاعدايدا ساسپاي, كومەكتەسۋگە سەپتىگىن تيگىزەدى, – دەيدى دارىن ءابىلجانوۆ.
مەديتسينالىق ەرىكتىلەر مەكتەبىندە ءبىر كۋرس اياسىندا ونلاين-رەجىمدە 15 تەوريالىق ساباق جانە 5 وفلاين تاجىريبەلىك ساباق وتەدى. تاجىريبە الۋ ءۇشىن ەرىكتىلەر مەديتسينالىق ۋنيۆەرسيتەتتىڭ سيمۋلياتسيالىق جانە ءبىلىم بەرۋ تەحنولوگيالارى ورتالىعىنا بارادى. مۇندا ولار تاجىريبەلى دارىگەرلەردىڭ, وقىتۋشىلاردىڭ كومەگىمەن تەوريالىق داعدىلاردى مەڭگەرەدى.
قازىردىڭ وزىندە اتالعان مەكتەپتىڭ تىڭداۋشىسى بولۋعا 100-دەن استام ەرىكتى جاس نيەت بىلدىرگەن. اناتوميا تۋرالى نەگىزگى ءبىلىمى بار ستۋدەنتتەر مامانداندىرىلعان كۋرستاردان وتەدى, ال مەديتسينالىق ءبىلىمى جوق ەرىكتىلەرگە ىندەت جۇقتىرعان پاتسيەنتتەرگە دۇرىس كۇتىم جاساۋ ۇيرەتىلەدى.
وسى يگى جوبانىڭ جەتەكشىسى دارىن ءابىلجانوۆتىڭ ايتۋىنشا, الداعى ۋاقىتتا مىڭنان استام ەرىكتىنى وقىتۋ جوسپارلانعان. بولاشاق مەديك ماماندار ەكى ايعا سوزىلاتىن كۋرستى بىتىرگەننەن كەيىن «قازاقستان مەديتسينا جاستارى» رەسپۋبليكالىق قوعامدىق ۇيىمىنان سەرتيفيكات الىپ, ۆولونتەرلىك جۇمىسقا كىرىسۋ مۇمكىندىگىنە يە بولادى.
قاراعاندى وبلىسى