ەكى تاۋلىك ىشىندە وبلىستا 572 مەديتسينا قىزمەتكەرى كوروناۆيرۋس ينفەكتسياسىنا قارسى ۆاكتسينا قابىلدادى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
وڭىرگە رەسەيلىك «سپۋتنيك-V» ۆاكتسيناسىنىڭ 1300 دوزاسى جەتكىزىلىپ, بارلىق اۋداندارعا تاراتىلدى. وڭىردە ەرىكتى تۇردە ۆاكتسينا سالۋ كەزەڭ-كەزەڭمەن ءجۇرىپ جاتىر.
ايتا كەتەيىك, تۇركىستان وبلىسىندا كوروناۆيرۋس ىندەتىنە قارسى 20 ەكپە ەگۋ نۇكتەسى اشىلعان. سونىمەن قاتار ۆاكتسينالارعا ارنالعان ارنايى مۇزداتقىش كامەرالارى ورناتىلعان. بۇگىندە Covid-19 قارسى ۆاكتسينا ەگىلگەن ازاماتتاردىڭ دەنساۋلىعى جاقسى. ەكپەدەن كەيىن اۋرۋحاناعا تۇسكەن جاعدايلار تىركەلمەگەن.
1 اقپاننان باستاپ جۇقپالى ىندەتكە قارسى ەرىكتى تۇردە ەكپە سالۋ ناۋقانى باستالدى. ۆاكتسينا ەڭ الدىمەن ينفەكتسيا جۇقتىرۋ قاۋپى بار سانالاتىن مەديتسينا ماماندارىنا سالىنادى. ياعني, جۇقپالى اۋرۋلار اۋرۋحانالارى مەن جانساقتاۋ ءبولىمى, قارقىندى تەراپيا بولىمشەلەرىنىڭ دارىگەرلەرى, جەدەل جاردەم قىزمەتكەرلەرى مەن ەمحانالارداعى ماماندار. ەكپە قابىلداعان ازاماتتار ءۇش كۇن بويى دارىگەردىڭ باقىلاۋىندا بولادى.