ەلوردادا سوڭعى 7 ايدا مونيتورينگتىك توپتار كارانتين شارالارىنىڭ ساقتالۋىن قاداعالاۋ بويىنشا 5 000-نان استام رەيد جۇرگىزدى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
2020 جىلعى 9 قازاننان باستاپ وسى جىلدىڭ 1 اقپانىنا دەيىنگى كەزەڭدە مونيتورينگتىك توپتار كارانتيندىك شارالاردىڭ ساقتالۋىن قاداعالاۋ بارىسىندا 373 بۇزۋشىلىق انىقتادى.
كارانتين رەجيمىن قاساقانا بۇزۋشىلارعا قاتىستى جينالعان ماتەريالدار مەكەمەنىڭ قىزمەتىن توقتاتۋ ماقساتىندا اكىمشىلىك سوتقا جىبەرىلەدى.
بۇگىنگى تاڭدا نۇر-سۇلتان قالاسىنىڭ مامانداندىرىلعان اۋدانارالىق اكىمشىلىك سوتىنىڭ شەشىمىمەن 12 قوعامدىق مەكەمەنىڭ قىزمەتى توقتاتىلدى. ولاردىڭ قاتارىندا "جانىم سول", "Tequila" كاراوكە-بارلارى, "زولوتو" مەيرامحاناسى, "Echo", "ستوريس", "Abba" لاۋندج-بارلارى, "Kango" باتۋت ورتالىعى, "GINZA" كاراوكە-مەيرامحاناسى, "تابىس" دۇكەنى بار. جوعارىدا اتالعان مەكەمەلەردىڭ قىزمەتى 1 ايعا توقتاتىلدى. "الانيا" تۇنگى كلۋبى سوت شەشىمىمەن 3 ايعا, "Respawn" كومپيۋتەرلىك كلۋبى 2 ايعا جابىلدى.
سونىمەن قاتار, وسى شوب سۋبەكتىلەرىنىڭ كارانتيندى بىرنەشە رەت بۇزعانى انىقتالدى. بۇعان قوسا زاڭدى تۇلعالاردىڭ جالعان دەرەكتەمەلەرىن نەمەسە باسقا تۇلعالارعا جالعا بەرىلگەنى تۋرالى فاكتىلەر بار. قوعامدىق مەكەمەلەردىڭ بۇرىنعى مەكەنجايلارىندا زاڭدى تۇلعالاردىڭ ءجيى اۋىسۋى بايقالادى.
وسىعان بايلانىستى نۇر-سۇلتان قالاسى بويىنشا كورونوۆيرۋستىق ينفەكتسيانىڭ پايدا بولۋى مەن تارالۋىنا جول بەرمەۋ جونىندەگى كوميسسيانىڭ كەزەكتى كەڭەسىندە مونيتورينگتىك توپتاردىڭ قۇرامىنا اقپاراتتى جەدەل ۇسىنۋ ءۇشىن نۇر-سۇلتان قالاسىنىڭ مەملەكەتتىك كىرىستەر دەپارتامەنتىنىڭ قىزمەتكەرلەرى قوسىمشا ەنگىزىلدى.
2021 جىلعى 1 اقپانداعى جاعداي بويىنشا نۇر-سۇلتان قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتىنىڭ اۋداندىق باسقارمالارىنا كارانتيندى بۇزعاندارعا قاتىستى بارلىعى 2 519 ماتەريال كەلىپ ءتۇستى. ونىڭ ىشىندە قر اقبتك-ءنىڭ 425-بابى بويىنشا 1 244 جەكە, لاۋازىمدى جانە زاڭدى تۇلعالار جالپى سوماسى 239 589 700 تەڭگەگە اكىمشىلىك جاۋاپكەرشىلىككە تارتىلدى.
قازىرگى ۋاقىتتا جالپى سوماسى 337 304 510 تەڭگەگە 1 612 اكىمشىلىك ايىپپۇل وتەلدى.