قالالىق ەمحانالار ۆاكتسينالاردى قويمادان ەكپە سالدىراتىن مەكەمەلەرگە تاسىمالداۋعا ارنالعان 20 مۇزداتقىش جانە 82 جىلۋ كونتەينەرىمەن قامتاماسىز ەتىلگەن. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتەن بەلگىلى بولدى, دەپ حابارلايدى Egemen.kz.
باستاپقى كەزەڭدە ۆاكتسيناتسيا №2, №4, №6, №7, №9 قالالىق ەمحانالارىندا جۇرگىزىلەدى.
ءبىرىنشى كەزەڭدە (اقپان) تاۋەكەل توبىنا جاتاتىن مەديتسينا قىزمەتكەرلەرى (جۇقپالى اۋرۋلار اۋرۋحانالارى, جەدەل جاردەم قىزمەتكەرلەرى, العاشقى مەديتسينالىق كومەك كورسەتۋ ۇيىمدارى, كوپسالالى اۋرۋحانالاردىڭ قابىلداۋ بولىمدەرى) قىزمەتكەرلەرى ۆاكتسيناتسيالانادى. ودان ءارى مۇعالىمدەر, پوليتسيا قىزمەتكەرلەرى, قورعانىس مينيسترلىگى, ىشكى ىستەر مينيسترلىگى جانە ت.ب. وسىلايشا كەزەڭ-كەزەڭ بويىنشا بارلىق حالىق قامتىلاتىن بولادى.
«بۇگىنگى تاڭدا العاشقى مەديتسينالىق-سانيتارلىق كومەك ۇيىمدارىندا ەگۋ كابينەتتەرى, كۇتۋ زالدارى دايىندالدى, وندا ۆاكتسيناتسيالانعان ادامدار ۆاكتسيناتسيادان كەيىن 30 مينۋت ىشىندە ءتيىستى تالاپتاردى ساقتاي وتىرىپ, مەديتسينالىق باقىلاۋدا بولۋى كەرەك», - دەپ تولىقتىردى ت. مۇراتوۆ.
سونداي-اق, مۇراتوۆتىڭ ايتۋىنشا, يممۋنداۋ جانە ۆاكتسيناتسيا ماسەلەلەرى بويىنشا تۇرعىنداردىڭ سۇراقتارىنا جاۋاپ بەرۋ ءۇشىن "جەدەل جەلى" تەلەفون نومىرلەرى بولىنگەن.
سونىمەن قاتار, ۆاكتسينا سالۋعا بولمايتىن جايتتار دا بار. ياعني ۆاكتسينانىڭ كەز-كەلگەن كومپونەنتىنە جوعارى سەزىمتالدىق, انامنەزدەگى اۋىر اللەرگيالىق رەاكتسيالار, جۇكتىلىك جانە بالا ەمىزۋ كەزەڭى.
بالالارعا جانە 65 جاستان اسقان ادامدارعا ۆاكتسينا سالىنبايدى. ۆاكتسيناتسيا ەرىكتى نەگىزدە جۇرگىزىلەدى.