ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ قاراعاندى وبلىسىنا جۇمىس ساپارى بارىسىندا «قاراعاندى-وسەتر» بالىق شارۋاشىلىعىنىڭ جۇمىسىمەن تانىستى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
«قاراعاندى-وسەتر» جشس 2013 جىلى قۇرىلدى. كاسىپورىن جابىق تسيكلدى سۋمەن قامتۋ تسيكلىندا جۇمىس ىستەيدى. ازىرگە 15 قىزمەتكەرى بار شارۋاشىلىقتىڭ قۋاتى جىلىنا 45 توننا تاۋارلى بالىق پەن 4 توننا ۋىلدىرىقتى قۇرايدى. 2020 جىلى 15 توننا تاۋارلى بالىق ساتىلعان.
م.مىرزاعاليەۆ پەن ءوڭىر اكىمى جەڭىس قاسىمبەك كاسىپورىننىڭ جۇمىسىمەن – دياگنوستيكا, چيپتەۋ, سويۋ, قايتا وڭدەۋ پروتسەستەرىمەن تانىسىپ كوردى.
ايتا كەتەيىك, قر ەكولوگيا, گەولوگيا جانە تابيعي رەسۋرستار مينيسترلىگى 2030 جىلعا دەيىنگى بالىق شارۋاشىلىعىن دامىتۋدىڭ مەملەكەتتىك باعدارلاماسىن ازىرلەگەن. سونىڭ نەگىزىندە قاراعاندى وبلىسىندا سالانى دامىتۋدىڭ وڭىرلىك باعدارلاماسى قابىلداندى. باعدارلاما اياسىندا كاسىپورىن بالىق شارۋاشىلىعى سالاسىندا ەكى جوبانى جۇزەگە اسىرماق. ءبىرى بايىتىلعان جەم ءوندىرىسى زاۋىتىن, ەكىنشىسى قاراسور كولىندە اكۆامادەنيەتتى دامىتۋ ورتالىعىن قۇرۋ. جوسپار بويىنشا ول ينكۋباتسيالىق تسەحى, تاۋارلى فورەل وسىرەتىن شارۋاشىلىعى, كارپ جانە سيگا تۇقىمداس تاۋارلى بالىق وسىرەتىن ورتالىعى, بالىق وڭدەۋ تسەحى جانە جوو-لارمەن بىرگە سالاعا مامان دايىندايتىن مەكتەبى بار تولىق تسيكلدى كەشەن بولماق.
«جىلىنا 1500 توننا تاۋارلى بالىق وندىرگىمىز كەلەدى. بالىق وتىرعىزۋ ماتەريالدارى ءوندىرىسىن 36 ملن دانا سيگا, 1,5 ملن دانا سيگا, 3,5 ملن دانا فورەل دەپ ەسەپتەپ وتىرمىز. جوباعا 1,52 ملرد تەڭگە ينۆەستيتسيا تارتىلىپ, 100 جاڭا جۇمىس ورنى قۇرىلادى», دەدى كاسىپورىن باسشىسى دميتري ابيلدين.
جالپى ەلىمىزدىڭ بالىق شارۋاشىلىعى سالاسىنىڭ پوتەنتسيالى – جىلىنا 600 مىڭ توننا بالىق. سالانى دامىتۋ باعدارلاماسىنا سايكەس, كورسەتكىشتىڭ 45%-ىنا 2030 جىلى, قالعان 55%-ىنا 2040 جىلى قول جەتكىزىلەدى. 2030 جىلعا قاراي 270 مىڭ توننا تاۋارلى بالىق ءوسىرۋ جوسپارلانىپ وتىر. بارلىعى 545 جاڭا بالىق شارۋاشىلىعى قۇرىلادى جانە جۇمىس ىستەپ تۇرعان 323 شارۋاشىلىق تولىق جوبالىق قۋاتىن ورىندايدى.