«تويدىڭ بولعانىنان بولادىسى قىزىق» دەگەندەي وتانداسىمىز گەننادي گولوۆكين مەن مەكسيكانىڭ ماقتانىشىنا اينالعان ساۋل «كانەلو» الۆارەس اراسىنداعى ءۇشىنشى جەكپە-جەك قاشان وتەدى دەگەن سۇراق توڭىرەگىندە اڭگىمە قازىرگى تاڭدا قىزىپ تۇر. ءتىپتى تريلوگيا تاعدىرى تەك قازاقستاندىق بوكس جانكۇيەرلەرى عانا ەمەس, بۇكىل الەم كورەرمەندەرىنىڭ باس اۋرۋىنا اينالدى دەسەك تە بولاتىن شىعار.
2019 جىلدان بەرى ۇيىمداستىرىلۋى ىقتيمال دەگەن ءۇشىنشى ايقاس ءتۇرلى سەبەپتەرمەن ءالى كۇنگە دەيىن كەيىنگە ىسىرىلىپ كەلەدى. بۇل جەكپە-جەكتىڭ بىلتىر نە ءۇشىن وتپەگەنى بارشاعا بەلگىلى دەگەن ويدامىز. الەمدى شارپىعان كوروناۆيرۋس پاندەمياسىنا بايلانىستى 2020 جىلى بوكسشىلار ءۇشىن شارشى الاڭعا شىعۋ بىلاي تۇرسىن, جاتتىعۋ جاساۋدىڭ ءوزى مۇڭ بولدى. ويتكەنى بارلىق ەلدە كارانتيندىك شەكتەۋ ەنگىزىلىپ, سپورتتىق باسەكەلەردى وتكىزۋگە تىيىم سالىندى. ال كاسىپقوي بوكسشىلاردىڭ ءبىر شوعىرى جينالعان اقش ۆيرۋستىڭ وشاعىنا اينالعان سوڭ ول جاقتا, ءتىپتى, سپورت زالدا شىنىعۋدىڭ وزىنە شەكتەۋ قويىپ تاستادى. ءسويتىپ بىرقاتار بوكسشى بىلتىر بىردە-ءبىر رەت شارشى الاڭعا شىقپاي, جانكۇيەرلەرىن قۋانتا المادى. دەگەنمەن جىل سوڭىنا قاراي كارانتين تالابى جەڭىلدەي باستاعان سوڭ پروموۋتەرلەر ىسكە كىرىسىپ, قولاستىنداعى بوكسشىلارىنا بوكس كەشتەرىن ۇيىمداستىرا باستادى.
سولاردىڭ قاتارىندا قازىرگى تاڭداعى كاسىپقوي بوكستىڭ شوق جۇلدىزىنا اينالعان گەننادي گولوۆكين مەن ساۋل الۆارەس تە بار. ەكەۋى دە جەلتوقساندا, ياعني ءبىر ۋاقىتتا شارشى الاڭعا كوتەرىلىپ, بوكستى ساعىنعان كورەرمەندەرگە تاماشا شوۋ ۇسىندى. جەلتوقساننىڭ 19-ىندا گولوۆكين پولشانىڭ مىقتىسى كاميل شەرەمەتانى مەرزىمىنەن بۇرىن جەڭىپ, جىلدى ءساتتى قورىتىندىلاي الدى. ال اراعا ءبىر كۇن سالىپ الۆارەس بريتانيالىق بوكسشى كاللۋم سميتپەن جۇدىرىقتاسىپ, 12 راۋندقا سوزىلعان باسەكەدە تەك ۇپاي سانىمەن باسىم ءتۇستى. كەزدەسۋدەن كەيىن ەكى بوكسشى دا ءوز ويلارىن ورتاعا سالىپ, كەز كەلگەن بوكسشىمەن جۇدىرىقتاسۋعا تابەتتەرى اشىلىپ تۇرعانىن جەتكىزدى. سونداي-اق ەگەر پروموۋتەرلەر ءتيىمدى ۇسىنىس جاسايتىن بولسا, تريلوگياعا دا قارسى ەمەستىگىن ايتىپ قالدى.
جەلتوقسانداعى جەكپە-جەكتەن كەيىن بوكس ساراپشىلارى ەكى بوكسشى اراسىنداعى ءۇشىنشى كەزدەسۋ بيىل ءوتۋى مۇمكىن بە, الدە جوق پا؟ تريلوگيا كىمگە ءتيىمدى, كىمگە ءتيىمسىز دەگەن سۇراق توڭىرەگىندە ءوز وي-پىكىرلەرىن ايتىپ جاتىر. ءبىز دە وسى ماسەلەنىڭ باسىن اشۋ ماقساتىندا وتاندىق جانە شەتەلدىك مامانداردىڭ پىكىرىنە جۇگىنىپ كورگەن ەدىك.
امەريكالىق TALKsport پورتالىنىڭ رەداكتورى مايكل بەنسون گەننادي گولوۆكين مەن ساۋل الۆارەس اراسىنداعى ءۇشىنشى جەكپە-جەك بيىل كۇز مەزگىلىندە وتەتىنىنە سەنىمدى. «گولوۆكين مەن كانەلو» رينگكە ءبىر ۋاقىتتا ورالدى. GGG شەرەمەتانى سەنىمدى جەڭدى, ال الۆارەس كاللۋمعا ەش مۇمكىندىك قالدىرمادى. ارينە قارسىلاستارىن سالىستىرۋعا كەلمەيدى, بىراق ەكى بوكسشى دا بابىندا. ەكەۋىن ەكى ءتۇرلى شارشى الاڭدا كورگەندە كوپشىلىكتىڭ ولاردى ءبىر رينگتە كورۋگە ىنتاسى اشىلدى. بيىل DAZN پلاتفورماسىنىڭ ەڭ نەگىزگى جۇمىسى – GGG مەن «كانەلو» اراسىنداعى تريلوگيانى ۇيىمداستىرۋ بولماق. ويتكەنى بۇل شوۋدى وتكىزۋ بوكسشىلارعا, پلاتفورما مەن پروموۋتەرلەرگە دە پايدالى. سوندىقتان بۇل ايقاس وسى جىلدىڭ كۇز مەزگىلىنەن ۇزاققا سوزىلمايدى», دەيدى بەنسون.
ال ارداگەر سپورت ءجۋرناليسى, گولوۆكين مەن «كانەلو» اراسىنداعى العاشقى جەكپە-جەكتە ەلگە اقش-تان حابار تاراتقان نەسىپ ءجۇنىسباي ۇلى ءوزىنىڭ Facebook الەۋمەتتىك جەلىسىندەگى پاراقشاسىندا ەكى بوكسشى اراسىنداعى ءۇشىنشى باسەكە مۇلدە وتپەۋى مۇمكىن دەگەن پىكىر ءبىلدىردى. ونىڭ پايىمداۋىنشا, گەننادي الۆارەستەن ءۇشىنشى جەكپە-جەكتى قانشا سۇراعانمەن بۇل شايقاس بولا قويماس.
«ويتكەنى «كانەلو» گولوۆكيندى بۇگىندە وزىنە تەڭ قارسىلاس دەپ سانامايدى. مەنىڭ ويىم: گەناعا شاما كەلسە «كانەلومەن» شىقپاي-اق قويعانى دۇرىس. مەن بۇل جايلى 2-3 جىل بۇرىن دا ايتقانمىن. گولوۆكين – تالاسسىز تالانتتى, كۇشتى بوكسشى. بىراق ونىڭ مۇنداي قارسىلاسپەن شايقاساتىن كەزەڭى ءوتىپ كەتتى. ارينە, بۇل ۇمتىلىستىڭ ارتىندا تەڭىزدەي تولقىعان اقشا تۇر. بىراق اقشا كۇندەردىڭ كۇنىندە تاۋسىلادى, ال جەڭىلىپ قالسا, ول اتاق ماڭگىلىك ماڭدايىنا جازىلادى. بۇل مەنىڭ گولوۆكيندى بوكسشى رەتىندە جاقسى كورگەننەن كەيىن ايتقانىم. گولوۆكين دە الۆارەستىڭ دارەجەسىندە وسەر ەدى, ەگەر بوكستى باستاعاندا ونى بىردەن شىن مىقتىلارعا سالعاندا. اسىرەسە, گەرمانيادا وتكىزگەن العاشقى 4-5 جىلى مەن سياقتى كورىنگەنمەن شايقاسىپ, بوسقا كەتتى...», دەيدى. سونىمەن قاتار نەسىپ ءجۇنىسباي ۇلى «كانەلونىڭ» بۇگىنگى تاڭداعى عاجاپ بوكسىنىڭ تىلسىمى – تابيعات بەرگەن تالانت, تىنىمسىز جاتتىعۋمەن قاتار بوكسشى بولىپ, اياعىنا تۇرعاننان بەرى ناعىز مىقتىلارمەن شايقاسىپ كەلۋىندە ەكەنىن ايتادى.
بۇل پىكىردى بوكستان افينى وليمپياداسىنىڭ چەمپيونى, وتاندىق تەلەارنالاردان گولوۆكيننىڭ بوكسىنا ساراپشىلىق جاساپ جۇرگەن باقتيار ارتاەۆ تا قولدايتىنىن جەتكىزدى. وليمپيادا چەمپيونىنىڭ پىكىرىنشە, گولوۆكين «كانەلومەن» جەكپە-جەك وتكىزىپ ابىرويىن جوعالتقانشا, دەڭگەي جاعىنان شامالاس بوكسشىلارمەن جۇدىرىقتاسا بەرگەنى ءجون.
«مەنىڭشە, گەنناديدىڭ الۆارەسپەن جەكپە-جەك وتكىزبەگەنى دۇرىس سياقتى. سەبەبى گولوۆكين جىل وتكەن سايىن قارتايىپ, بۇرىنعىعا قاراعاندا كۇش-قايراتى سارقىلىپ جاتىر. ال «كانەلو» بولسا كەرىسىنشە, جىل سايىن كۇشىنە كۇش قوسىپ كەلەدى. ەگەر ءۇشىنشى باسەكە بولاتىن بولسا, گەنناديگە وتە قيىن بولادى. ول دا بۇل ايقاستىڭ وزىنە وڭاي سوقپايتىنىن بىلەدى دەپ ويلايمىن. بالكىم مەنىڭ ويىم قاتە شىعار, بىراق ەكى بوكسشى اراسىنداعى ەكىنشى جۇدىرىقتاسۋدىڭ ناتيجەسى مەنىڭ ءسوزىمدى قۋاتتاي تۇسەدى دەگەن ويدامىن. سونداي-اق كوزى اشىق جانكۇيەرلەر ءبىرىنشى جەكپە-جەك پەن ەكىنشىنىڭ ايىرماشىلىعى جەر مەن كوكتەي ەكەنىن دە بىلەدى. ەكىنشى ايقاستان الۆارەستىڭ الدەقايدا وسكەنىن كورۋگە بولادى. قورىتا ايتقاندا, ەكى بوكسشى اراسىنداعى ءۇشىنشى كەزدەسۋ وتپەيدى دەپ ەسەپتەيمىن», دەيدى ب.ارتاەۆ.
سپورت ءجۋرناليسى بەك تولەۋوۆ تريلوگيانىڭ تاعدىرى بۇعان دەيىن قارجى ماسەلەسىنە بايلانىستى شەشىمىن تاپپاي كەلسە, ەندى وعان سالماق دارەجەسى دە قوسىلعانىن ايتادى. ويتكەنى جۋىردا عانا مەكسيكالىق بوكسشىنىڭ باپكەرى, ءارى مەنەدجەرى ەددي رەينوسو ساۋل GGG-مەن تەك 168 فۋنتتا جۇدىرىقتاسادى جانە جەكپە-جەك شارتتارىن دا الۆارەس قويادى دەگەن بولاتىن.
«گولوۆكين مەن «كانەلونىڭ» ءۇشىنشى رەت كەزدەسۋىن كۇتىپ جۇرگەندەردىڭ باسىم كوپشىلىگى قازاقستاندىق بوكسشىنىڭ جانكۇيەرلەرى دەپ ويلايمىن. ويتكەنى GGG-ءدىڭ كارەراسى اياقتالۋعا جاقىن كەزدە مەكسيكالىقتى جەڭسە دەپ ارماندايدى. ال «كانەلونىڭ» ەسەبى تۇگەل. ول ءۇشىنشى رەت اسىعىستىق تانىتا قويماس. گولوۆكينگە بيىل جىلدىڭ سوڭىنا دەيىن شىعىپ ۇلگەرمەسە قيىن بولادى. وسى جىلى 39 جاسقا تولادى. 40 جاسىندا وزىنەن 8 جاس كىشى ءارى ناعىز بابىندا تۇرعان سپورتشىنى ۇرىپ قۇلاتۋ قيىن. وسى ارادا سالماققا قاتىستى ايتقىم كەلەدى. گولوۆكين سپورتتىق كارەراسىندا تەك 72 كيلودا جۇدىرىقتاسىپ كەلەدى. «كانەلو» تۇبەگەيلى ەكىنشى ورتا سالماققا (76,2 كگ) اۋىسىپ كەتتى. ەندى تريلوگيا ءۇشىن گەننادي جوعارى سالماققا اۋىسۋعا تاۋەكەل ەتە مە؟ وسى جاعى قىزىق بولىپ تۇر. بۇل كەزدەسۋ ەكەۋىنە دە ءبىر عانا جاعدايدا قاجەت. ول – تەك قارجى تابۋ تۇرعىسىنان. DAZN كومپانياسى ەكى بوكسشىمەن دە كەلىسىمشارتقا وتىرعان. ازىرگە ەكەۋىنەن دە دۇرىس تابىس ءتۇسىپ جاتپاعان كورىنەدى. امەريكالىقتار ءۇشىن گولوۆكين مەن كانەلونىڭ وتكىزىپ جۇرگەن جەكپە-جەكتەرى قىزىقسىز, قارسىلاستارى ءالسىز. ەگەر ءۇش تاراپ تا جاقسى اقشا تابۋدى كوزدەسە, تريلوگيانى وتكىزەرى انىق», دەيدى ول.
جالپى جانكۇيەرلەر قاۋىمىنىڭ باسىم بولىگى ەكى الىپتىڭ اراسىنداعى ەكى ايقاستىڭ قورىتىندىسى بويىنشا ەسەپ تەڭ دەپ ەسەپتەيدى. سەبەبى العاشقى باسەكەدە GGG باسىم بولعانىن ايتادى. ەندى كىمنىڭ شىن مىقتى ەكەنىن انىقتاۋ ءۇشىن جانە ادامداردا كۇمان قالماۋى ءۇشىن ءبارىبىر شەشۋشى كەزدەسۋ كەرەك سياقتى. سونىمەن قاتار 2020 جىلى ءجونى ءتۇزۋ جەكپە-جەك تاماشالاي الماعان كورەرمەندەر بيىل ەكى بوكسشى اراسىنداعى Big Drama Show-دى كورۋگە ابدەن قۇقىلى دەپ ەسەپتەيمىز.