ەمحانا كەشەنى ەلوردانىڭ حالىق كوپ شوعىرلانعان اۋدانىندا, جامبىل جانە سەيفۋللين كوشەلەرىنىڭ قيىلىسىندا قونىس تەپكەن. بۇل نىسان ەلباسىنىڭ تىكەلەي باستاماسىمەن ومىرگە كەلگەن «100 مەكتەپ, 100 اۋرۋحانا» مەملەكەتتىك باعدارلاماسى شەڭبەرىندە پايدالانۋعا بەرىلىپ وتىر. №10 امبۋلاتوريالىق-ەمحانا العاشقى كەزەڭدە ءبىر اۋىسىمدا 500 ادامعا قىزمەت كورسەتىپ, 65 مىڭ قالا تۇرعىنىن مەديتسينالىق قىزمەتپەن قامتاماسىز ەتۋگە ارنالعان. بولاشاقتا ەمحانانىڭ الەۋەتى ءبىر اۋىسىمدا 750 ادامعا, جالپى, 95 مىڭ قالا تۇرعىنىنا مەديتسينالىق قىزمەت كورسەتپەك.
ەمحانا كەشەنى ەلوردانىڭ حالىق كوپ شوعىرلانعان اۋدانىندا, جامبىل جانە سەيفۋللين كوشەلەرىنىڭ قيىلىسىندا قونىس تەپكەن. بۇل نىسان ەلباسىنىڭ تىكەلەي باستاماسىمەن ومىرگە كەلگەن «100 مەكتەپ, 100 اۋرۋحانا» مەملەكەتتىك باعدارلاماسى شەڭبەرىندە پايدالانۋعا بەرىلىپ وتىر. №10 امبۋلاتوريالىق-ەمحانا العاشقى كەزەڭدە ءبىر اۋىسىمدا 500 ادامعا قىزمەت كورسەتىپ, 65 مىڭ قالا تۇرعىنىن مەديتسينالىق قىزمەتپەن قامتاماسىز ەتۋگە ارنالعان. بولاشاقتا ەمحانانىڭ الەۋەتى ءبىر اۋىسىمدا 750 ادامعا, جالپى, 95 مىڭ قالا تۇرعىنىنا مەديتسينالىق قىزمەت كورسەتپەك.
حالىق سانى كۇننەن-كۇنگە قاۋلاپ ءوسىپ وتىرعان مەگاپوليسىمىزدە ەمحانا جەتىمسىزدىگى كوپتەن بەرى تىلگە تيەك ەتىلىپ كەلەدى. وسى پروبلەمانى جەڭىلدەتۋ ماقساتىندا پايدالانۋعا بەرىلىپ وتىرعان جاڭا ەمحانا بۇرىن №4 قالالىق ەمحاناعا قاراستى 45 مىڭ ادامعا جانە №5 قالالىق ەمحاناعا قاراستى 20 مىڭ ادامعا قىزمەت كورسەتەتىن بولادى. ءسويتىپ, №4, №5 قالالىق ەمحانالاردىڭ جۇمىس اۋقىمى بەلگىلەنگەن ستاندارتتارعا سايكەس شاقتالىپ, جالپى, سول جاعالاۋدىڭ تۇرعىندارىنا مەديتسينالىق قىزمەت كورسەتۋ ساپاسىن ارتتىرۋعا قولايلى جاعداي جاسايدى.
№10 ەمحانادا 22 جوعارى ءبىلىمدى دارىگەر جۇمىس ىستەيتىن بولادى. ەمحانا بۇگىنگى وزىق تەحنولوگياعا نەگىزدەلگەن زاماناۋي مەديتسينالىق قۇرال-جابدىقتارمەن جاراقتاندىرىلعان. كەشەن جالپى كولەمى 20 661,8 شارشى مەتردى قۇرايتىن, ءۇش بلوكتان تۇراتىن 5 قاباتتى عيماراتتا ورنالاسقان. ونىڭ قۇرامىنا ەمدىك-الدىن الۋ جانە كونسۋلتاتسيالىق-دياگنوستيكالىق بولىمدەر, وتباسى دەنساۋلىعى ورتالىعى, امبۋلاتوريالىق حيرۋرگيا ورتالىعى, قالپىنا كەلتىرۋ تەراپياسى, جاستار دەنساۋلىعى ورتالىقتارى كىرەدى.
جاڭا ەمحانادا قالامىزدا جۇمىس ىستەيتىن №5 جانە №8 ەمحانالارداعى سياقتى ناۋقاستاردىڭ سانىن وڭتايلاندىرۋعا جانە تىركەۋ ءبولىمىنىڭ جۇمىس ۇدەرىسىن قالىپقا كەلتىرەتىن ەلەكتروندىق كەزەك جۇيەسى ەنگىزىلگەن. بۇل جۇيە ناۋقاستارعا قىزمەت كورسەتۋ ساپاسىن ارتتىرىپ, ەمحاناداعى كەزەك رەتىن ازايتادى. ودان باسقا, اتالعان ەمحانادا «Smart Astana» جوباسى شەڭبەرىندە قالا تۇرعىندارىمەن جۇمىس ىستەۋ ءۇشىن بىرىڭعاي مەديتسينالىق اقپاراتتىق Call-ورتالىعىن اشۋ بويىنشا قاناتقاقتى جوبا جوسپارلانۋدا. ونىڭ قىزمەتكەرلەرى دەنساۋلىق ساقتاۋ سالاسىندا ازاماتتاردىڭ شاعىمدارى مەن ارىزدارىن قاراپ, قابىلدايدى, حالىققا انىقتامالىق جانە كونسۋلتاتسيالىق كومەك كورسەتەدى. «Smart Astana» جوباسىنىڭ نەگىزگى تاپسىرماسى, تۇرعىندارعا ساپالى مەديتسينالىق قىزمەت كورسەتۋدى جاقسارتۋعا كومەگىن تيگىزەتىن ءبىر اقپاراتتىق جولدا استانا قالاسىنىڭ بارلىق مەديتسينالىق مەكەمەلەرىنىڭ بىرىگۋى بولىپ تابىلادى.
جاڭا دەنساۋلىق ساقتاۋ مەكەمەلەرىنىڭ اشىلۋى قالا ەمحانالارىنىڭ جۇكتەمەسىن ەداۋىر تومەندەتۋگە مۇمكىندىك بەرەدى. ەسكە سالا كەتسەك, 2012 جىلدىڭ سوڭىندا امانات كوشەسىندە اۋىسىمىنا 500 ادامعا قىزمەت كورسەتەتىن ەمحانا جانە 250 ادامعا ارنالعان ەمحاناسى بار كوپسالالى بالالار اۋرۋحاناسى اشىلعان بولاتىن. اعىمداعى جىلدىڭ قاراشاسىندا №1 پەريناتالدىق ورتالىق بازاسىندا 250 ادامعا ارنالعان بمسك ورتالىعى اشىلعان. اتقارىلعان شارالار كەشەنى 2014 جىلدىڭ ورتاسىندا قازاقستاننىڭ استاناسىندا امبۋلاتوريالىق-ەمحانالىق جۇيە جۇكتەمەسى بويىنشا ماسەلە تولىق شەشىمىن تاباتىندىعىنا نەگىز بولادى.
سونىمەن بىرگە, تاۋەلسىزدىك مەرەكەسى قۇرمەتىنە جۇما كۇنى استانا قالاسىنىڭ اكىمى يمانعالي تاسماعامبەتوۆ سالتاناتتى جاعدايدا قالالىق جەدەل مەديتسينالىق جاردەم ستانساسىنا (قجمجس) 23 جاڭا جەدەل جاردەم اۆتوكولىگىن تاپسىردى. ۇستىمىزدەگى جىلدىڭ 1 جەلتوقسانعا دەيىنگى جاعداي بويىنشا قجمجس-نىڭ بالانسىندا 74 جەدەل جاردەم ماشيناسى بولاتىن. ونىڭ تۇراقتى تۇردە 62-ءسى پايدالانىلىپ كەلدى. قالعاندارى كۇردەلى جوندەۋدى قاجەت ەتەتىن ەسكى كولىكتەر ەدى. قجمجس-نىڭ بازاسى بىردەن 23 جاڭا ماشينامەن تولىعۋىنا بايلانىستى قالا تۇرعىندارىن جەدەل مەديتسينالىق جاردەم قىزمەتىمەن قامتاماسىز ەتۋ ساپاسى جاقساردى.
جاڭا 23 جەدەل جاردەم ماشينالارىنىڭ 6-ۋى جالپى قۇنى 113,928 ميلليون تەڭگە بولاتىن Hyundai ماركالى اۆتوموبيلدەر بولسا, 17-ءسى جالپى قۇنى 227,37 ميلليون تەڭگە بولاتىن «گازەل» ماركالى اۆتوموبيلدەر. بۇل جەدەل جاردەم كولىكتەرى بۇگىنگى زاماننىڭ وزىق مەديتسينالىق جابدىقتارىمەن جاراقتاندىرىلعان. جاڭا اۆتوموبيلدەر رەسپۋبليكالىق بيۋدجەتتەن ارنايى بولىنگەن قارجى ەسەبىنەن الىندى. قالالىق جەدەل مەديتسينالىق جاردەم ستانساسىنىڭ اۆتوكولىك كەشەنىنىڭ جاڭا ماشينالارمەن تولىعۋى قالا تۇرعىندارىنا كورسەتىلەتىن جەدەل مەديتسينالىق جاردەم ساپاسىنىڭ جاڭا دەڭگەيدە كوتەرىلۋىنە مۇمكىندىك بەرەدى.
جىلقىباي جاعىپار ۇلى,
«ەگەمەن قازاقستان».
سۋرەتتى تۇسىرگەن
ەرلان وماروۆ.