ەلباسى نۇرسۇلتان نازارباەۆ «تاۋەلسىزدىك – ءتاڭىردىڭ ءبىزدىڭ ۇرپاققا بەرگەن ۇلكەن باقىتى, حالقىمىزدىڭ ماڭگىلىك قۇندىلىعى. ءبىز بۇگىنگە دەيىنگى بارلىق جەتىستىكتەرىمىزگە تاۋەلسىزدىكتىڭ ارقاسىندا قول جەتكىزدىك. تاۋەلسىزدىك – بۇل ءبىزدىڭ باستى بايلىعىمىز, باعا جەتپەس جەتىستىگىمىز», دەپ كەمەل وي ءتۇيىپ, نۇرلى بولاشاقتى ناقتىلاعانى ءمالىم.
ەلباسى نۇرسۇلتان نازارباەۆ «تاۋەلسىزدىك – ءتاڭىردىڭ ءبىزدىڭ ۇرپاققا بەرگەن ۇلكەن باقىتى, حالقىمىزدىڭ ماڭگىلىك قۇندىلىعى. ءبىز بۇگىنگە دەيىنگى بارلىق جەتىستىكتەرىمىزگە تاۋەلسىزدىكتىڭ ارقاسىندا قول جەتكىزدىك. تاۋەلسىزدىك – بۇل ءبىزدىڭ باستى بايلىعىمىز, باعا جەتپەس جەتىستىگىمىز», دەپ كەمەل وي ءتۇيىپ, نۇرلى بولاشاقتى ناقتىلاعانى ءمالىم.
«ءوزىن ءوزى بيلەگەن ەل باقىتتى» دەپ ارمانداعان قازاققا تاريح تاۋەلسىزدىكتىڭ مارتەبەلى بيىگىنە كوتەرىلۋ قۇرمەتىن سىيلاعانى تەگىن بولماعان شىعار. شاڭ باسقان مۇراعاتتار مەن ەل جادىندا ساقتالعان ەرلىك, ورلىك رۋحتاعى جىرلارعا ۇڭىلسەك, ەلىمىزدىڭ تاۋەلسىزدىككە جەتۋ جولىندا قانشا بەلەستەن ءوتىپ, سانسىز قيىندىق كورىپ, نەندەي قۇرباندىققا بارعاندىعىن زەردەلەي الامىز. ارينە, بۇل وتكەننىڭ ەنشىسىندە قالدى دەسەك تە, سوم بىلەكتىڭ كۇشىمەن, اق نايزانىڭ ۇشىمەن ەلىن, جەرىن قورعاعان اتا-بابامىزدىڭ ەرەن ەرلىگى, اسقاق ارمانى ەكەنى حاق. ەگەمەندى ەل بولۋ جولىنداعى حالقىمىزدىڭ قايىسپاس قايسارلىعى, ەڭ باستىسى – ءار ۇرپاق ءوز كەزەگىندە اتا-بابا اماناتىن امان ساقتاپ, كەلەر ۇرپاق وكىلىنە وتكىزۋ پارىزىن ءمىنسىز اتقارعاندىعى عالامات قوي. اقىلدىڭ كەنى, داناگوي قارتتارىن تىڭداپ, قۇدىرەتتى كۇش يەسى ءھام قاسيەتتى ابىزدارىمەن دە ماقتانا الاتىن قازاق تاريحى بايلىعىمەن دە, قۇندىلىعىمەن دە بۇگىنگى ۇرپاق بويىندا ماقتانىش سەزىمىن ۇيالاتادى.
تاۋەلسىزدىك! وسى ءبىر قاسيەتتى ءسوزدى قايتالاعان سايىن جانىڭ تەبىرەنەدى, ەلىمىزدىڭ ارعى-بەرگى تاريحى ويىڭا ورالادى. سوناۋ اتتيلا مەن ەلتەرىس قاعاننان, كۇلتەگىن مەن تۇنىكوك جىراۋدان جالعاسىپ, كەشەگى جانىبەك پەن كەرەي ىرگەسىن قالاعان قازاق حاندىعىنىڭ مۇراتىن جالعاستىرۋشى ابىلاي حانمەن ماقتانبايتىن قازاق كەمدە-كەم. ويتكەنى, ەل تاۋەلسىزدىگىنىڭ ءبىر باستاۋى قازاقتىڭ تۇتاستىعىن ساقتاپ قالۋعا زور ەڭبەك سىڭىرگەن ابىلاي حان ەمەس پە؟! ءۇش ءجۇزدىڭ باسىن قوسىپ, تولە بي, قازىبەك بي, ايتەكە بي سىندى داناگويلەرمەن كەڭەسە وتىرىپ, اڭىراقاي شايقاسىندا قازاقتىڭ كوك تۋىن جەلبىرەتكەن وسى ابىلاي حان عوي.
سىناپتاي سىرعىعان ۋاقىت اعىسىمەن كەڭەستىك ءداۋىر وكتەمدىگىن جۇرگىزگەن كەزدە سول ءبىر زوبالاڭ جىلداردىڭ كەسىرىنەن ۇلتى ءۇشىن قۇربان بولعان ارىستارىمىزدىڭ اياۋلى ارمانى, كوزدەگەن ماقساتى دەربەس ەل بولىپ, ءوز شاڭىراعىن قۇرۋ ەمەس پە ەدى؟! بەرىلەسەك, كەشەگى 16 جەلتوقسانداعى اق قار, كوك مۇزدىڭ ۇستىندە تۇرىپ, جۇرەگىن ەلىنە دەگەن ماقتانىشپەن سۋارعان قايرات, ءلاززات سىندى جاستارىمىزدىڭ ەلىم, جەرىم دەپ قىرشىنىنان قيىلعان عۇمىرى وسىنىڭ دالەلى. ەندەشە, بۇگىنگى تاۋەلسىزدىك تاڭىمەن بىرگە كۇننىڭ شۋاعىنا بولەنە بەيقام ۇيىقتاپ, جادىراپ وياناتىن جاس ۇرپاقتىڭ كەلەشەگى جارقىن بولىپ, باقۋاتتى عۇمىر كەشۋى – اتا-بابانىڭ وشپەس, ەرەن ەڭبەگى, باتىرلىعى, ەرجۇرەكتىگى مەن ەلىنە دەگەن سۇيىسپەنشىلىگىنىڭ قايتا جانعان شامشىراعى دەۋگە نەگىز جەتكىلىكتى.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ قۇرىپ, تاۋەلسىزدىگىن تورتكۇل دۇنيەگە پاش ەتكەن قازاقستان دەربەس, تاۋەلسىز ەل بولۋدىڭ بارلىق كەزەڭدەرىنەن ءوتتى. بۇگىنگى قازاقستان رەسپۋبليكاسى – اتا زاڭى قۇزىرلى, كوك تۋى جەلبىرەگەن, ەلتاڭباسى ايبىندى, ءانۇرانى اسقاق اسقارالى ەل. ءبىز ۇلتتىق ۆاليۋتاسى بار, قارجى جۇيەسى قالىپتاسقان, شەتەلدەرمەن ساۋدا-ساتتىعى جاقسى ۇيلەسىم تاپقان جانە ەكسپورتقا ءوز ءونىمىن شىعارا الاتىن, جان-جاعىنا جالتاقتامايتىن, وزگەلەردىڭ وكتەمدىگىنە كونبەيتىن, ەتەك-جەڭىن جيناعان, قاجەت بولسا وزگە ەلگە اقىل ايتىپ, ونەگە بولا بىلگەن تۇعىرلى بيىككە ساناۋلى جىلدا جەتكەن جەڭىمپاز ەل بولعانىمىزبەن ماقتانۋعا ءتيىسپىز.
تاۋەلسىز بولۋ – باقىت. تاۋەلسىزدىككە قولى جەتكەن ەلدەر الدىندا ودان دا بيىك ماقساتتار تۋىندايدى. ول – قول جەتكەن تابىستاردىڭ باياندى بولۋى. ول ءۇشىن تاۋەلسىزدىكتى نىعايتىپ, ەلىمىزدىڭ ەركىندىگىن ەڭبەكپەن ەسەلەۋىمىز قاجەت. قازاقستان تاياۋداعى جىلدار ىشىندە الەمدىك باسەكەگە بارىنشا قابىلەتتى 30 ەلدىڭ قاتارىنا كىرۋى ءتيىس. بۇل دەگەنىمىز – باسەكەگە توتەپ بەرۋ. الەمدىك باسەكەگە توتەپ بەرۋدىڭ باستى شارتى – كۇشتى رۋح پەن ءبىلىم. تاۋەلسىزدىكتىڭ جيىرما ەكى جىلىندا قازاقستانداعى جوعارى ءبىلىم بەرۋ جۇيەسىنىڭ مازمۇنى دا, باعىتى دا, ماڭىزى دا وزگەرىپ, جاڭا سيپاتقا يە بولدى. ەلباسىنىڭ جۇرگىزىپ وتىرعان سىندارلى ساياساتىنىڭ ارقاسىندا ءبىلىم سالاسىندا كوپتەگەن رەفورمالار جۇزەگە اسىپ, تىڭ يدەيالارعا دەم بەرىپ, جاڭاشا بەتبۇرىس جولىنا ءتۇستى. تاۋەلسىزدىكتىڭ العاشقى جىلدارىندا قابىلدانعان «بولاشاق» باعدارلاماسىنىڭ ءوزى مەملەكەتىمىز ءۇشىن قانشاما ماڭىزى بولدى. بيىل, مىنە, بۇل باعدارلامانىڭ جۇزەگە اسقانىنا دا 20 جىل تولىپ, ءبىلىم جۇيەسىنىڭ لوكوموتيۆىنە اينالدى. ءىلىم مەن ءبىلىمنىڭ دامۋى – ادامزات وركەنيەتىنىڭ ولشەمى, دەسەك بۇل جولدا دا ەلباسى كورەگەندىك تانىتتى. ويتكەنى, قاشاندا ءبىلىمى كۇشتى ەل وزادى, ءبىلىمى ءالسىز ەل وعان قىزمەت ەتەدى. بۇل – دالەلدى قاجەت ەتپەيتىن زاڭدىلىق.
ءابدىماناپ بەكتۇرعانوۆ,
ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ رەكتورى,
زاڭ عىلىمدارىنىڭ دوكتورى, پروفەسسور.
تالدىقورعان.