جاقىندا عانا تۇساۋى كەسىلىپ, ونەر الەمىنە قادام باسقان ەلوردانىڭ ەڭ جاس تەاترى – نۇر-سۇلتان قالاسى اكىمدىگىنىڭ مۋزىكالىق جاس كورەرمەن تەاترىندا ورىستىڭ ۇلى جازۋشىسى ف.دوستوەۆسكيدىڭ «ۇلدار» دراماسىنىڭ پرەمەراسى ءوتتى. ءۇش كۇن بويى كورەرمەنىن تەرەڭ ويدىڭ تۇڭعيىعىنا شومدىرعان دراما جازۋشىنىڭ «اعايىندى كارامازوۆتار» رومانىنىڭ جەلىسىمەن ساحنالاندى.
قويۋشى رەجيسسەر ەرنازار جاڭاتىلەكتىڭ ساراپتاۋىندا كورەرمەنىمەن قاۋىشقان ايتۋلى دراما جاسوسپىرىمدەر ومىرىنەن سىر شەرتەدى. ولاردىڭ ادامعا, قوعامعا, قورشاعان ورتاعا دەگەن كوزقاراستارى, كۇندەلىكتى ومىردەگى ءبىر-بىرىمەن قارىم-قاتىناستارى بالالىق پسيحولوگيانىڭ شەڭبەرىنەن شىقپاعانىمەن, جاسوسپىرىمدەر عانا ەمەس, ەرەسەك ادامدارعا دا وي سالاتىن كوركەم شەشىمدەرگە قۇرىلعان.
«اعايىندى كارامازوۆتار» – 1878-1880 جىلدارى جازىلعان ف.دوستوەۆسكيدىڭ سوڭعى رومانى. الەم ادەبيەتىندەگى ۇزدىك تۋىندىلاردىڭ ءبىرى رەتىندە باعالانادى. ف.دوستوەۆسكي ايتۋلى تۋىندىسىندا ادام ءومىرىنىڭ نەگىزگى ماسەلەلەرىن العا قويادى. ءار ادامنىڭ ءومىرى مەن بۇكىل ادامزات تاريحىنىڭ ءمانى, ادام بولمىسىنىڭ مورالدىق جانە رۋحاني نەگىزدەرى تۋرالى ماسەلەلەر قاراستىرىلعان.
قازىرگى قوعامنىڭ وزەكتى ماسەلەلەرىنىڭ ءبىرى – بالا تاربيەسى. ولاردىڭ كورەتىنى مەن ەستيتىنى, ەلىكتەۋى, ەر جەتۋى مەن بوي جەتۋى سىندى ماڭىزدى كەزەڭدەرىندە اتا-انالاردىڭ بالالارىنا ەرەكشە كوڭىل اۋدارىپ, قاداعالاپ وتىرۋى نەگىزىندەگى ويلاردى دا اتالعان قويىلىم العا تارتادى. ادامنىڭ اينالاسىنداعى ءاربىر جانعا سىيلاستىقپەن قاراپ, ولارعا لايىقتى تۇردە قۇرمەت كورسەتە ءبىلۋى – ادامگەرشىلىك پەن اقىل-پاراساتتىڭ اسقار بيىگى بولسا كەرەك. وسى تالاپ بيىگىنەن كەلگەندە, ءتور قالانىڭ مۋزىكالىق جاس كورەرمەن تەاترى ۇسىنعان «ۇلدار» قويىلىمىنىڭ كورەرمەنىنە بەرەر تاعىلىمى مول.
سپەكتاكلدە يليۋشا (بوزبالا) ءرولى تەاتر ارتىستەرى ەلامان يمانباەۆ پەن ءدىنيسلام نۇرماعامبەتوۆ, نيكولاي كراسوتكين – «دارىن» مەملەكەتتىك جاستار سىيلىعىنىڭ لاۋرەاتى اسىلحان تولەپوۆ پەن سالامات مۇقاشەۆ, الەكسەي كارامازوۆ – ابزال اراپوۆ, «دارىن» مەملەكەتتىك جاستار سىيلىعىنىڭ لاۋرەاتى ايان وتەپبەرگەن, سمۋروۆ – يمانعالي اقادىل, سنەگيرەۆ بەينەسى – التىنبەك سۇندەت پەن شىڭعىس تەلمانوۆ سىندى تالانتتى اكتەرلەر ويىنىندا ءساتتى ساراپتالدى.
استانالىق جاس كورەرمەندەر تەاترىنىڭ جاڭا جىلداعى ۇسىنىپ وتىرعان العاشقى پرەمەراسى كورەرمەندى مەيىرىمدىلىككە, ادامگەرشىلىككە, سەنىمدىلىككە شاقىرادى. مىسالى, يليۋشا كىم؟ ول تەكتەن-تەككە باتىر بولىپ كەتكەن جوق. بالا جۇرەك نامىس پەن كەكتىڭ اراسىن اجىراتا الماي قالدى. شىعارما قانداي جاعداي بولسا دا ادام بالاسى ءوزىنىڭ اسىل قاسيەتتەرىن جوعالتپاي, ادام بولىپ قالۋ كەرەكتىگىن دارىپتەيدى. قويىلىم سونىسىمەن دە قۇندى.