كەشە اقوردادا ەلباسى نۇرسۇلتان نازارباەۆ قازاقستان رەسپۋبليكاسىنىڭ ۇلتتىق مەرەكەسى – تاۋەلسىزدىك كۇنى قارساڭىندا ءبىر توپ ازاماتقا مەملەكەتتىك, قوعامدىق جۇمىستار مەن عىلىم مەن ونەردە قول جەتكىزگەن ايرىقشا تابىستارى ءۇشىن مەملەكەتتىك سىيلىقتار مەن اتاقتار تاپسىردى.
كەشە اقوردادا ەلباسى نۇرسۇلتان نازارباەۆ قازاقستان رەسپۋبليكاسىنىڭ ۇلتتىق مەرەكەسى – تاۋەلسىزدىك كۇنى قارساڭىندا ءبىر توپ ازاماتقا مەملەكەتتىك, قوعامدىق جۇمىستار مەن عىلىم مەن ونەردە قول جەتكىزگەن ايرىقشا تابىستارى ءۇشىن مەملەكەتتىك سىيلىقتار مەن اتاقتار تاپسىردى.
ەلباسى ن.نازارباەۆ الدىمەن جينالعانداردى ەلىمىزدىڭ ەڭ باستى مەرەكەسى – تاۋەلسىزدىك كۇنىمەن قۇتتىقتادى. قازاقتا «ەڭبەگىنە قاراي قۇرمەتى» دەگەن قاناتتى ءسوز بار. قالىپتاسقان ءداستۇر بويىنشا مەن بۇگىن – قازاقستاننىڭ ۇلىق مەرەكەسىنىڭ قارساڭىندا ەلىمىزگە ايرىقشا ەڭبەك سىڭىرگەن ازاماتتارعا مەملەكەتتىك ماراپاتتار تاپسىرامىن, دەي كەلىپ, پرەزيدەنت مەملەكەتتىك سىيلىق مەملەكەتتىڭ ءوسىپ-وركەندەۋىنە جان اياماي ۇلەس قوسىپ جۇرگەن ازاماتتارعا بەرىلەتىنىن اتاپ كورسەتتى. ونى جەكە ازاماتتىڭ عانا ەمەس, تۇتاس ەلىمىزدىڭ تابىسى دەپ ساناۋ كەرەك. بۇگىنگى باعىندىرعان بيىكتەرىڭىز ءار ۋاقىتتا سىزدەر ءۇشىن باياندى بولسىن.
وسىلاي دەگەن ەلباسى مەملەكەتتىك سىيلىق العان ازاماتتاردى شىن جۇرەكتەن قۇتتىقتادى. ودان ءارى ول تاتۋلىق پەن تىنىشتىقتى باستى بايلىعى دەپ سانايتىن ەلدىڭ پارلامەنتى قابىلداعان قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ «بەيبىتشىلىك جانە پروگرەسس سىيلىعى» بار ەكەنىن ەسكە سالىپ, 2013 جىلعى سول سىيلىق اتاقتى اقىن, قوعام قايراتكەرى ولجاس سۇلەيمەنوۆكە تاپسىرىلاتىنىن ايتتى. و.سۇلەيمەنوۆ ەلىمىزدىڭ مادەني-رۋحاني ءومىرىنىڭ ءوسىپ-وركەندەۋىنە, حالىقارالىق ىنتىماقتاستىقتى دامىتۋعا, تاۋەلسىزدىك جىلدارىندا حالقىمىز بىرلىگىنىڭ نىعايۋىنا, قازاقستانداعى تاتۋلىق پەن تىنىشتىقتى دۇنيەجۇزىنە پاش ەتۋگە سۇبەلى ۇلەس قوسىپ كەلە جاتقان ايتۋلى ازاماتىمىز, دەي كەلىپ, ول قۇرعان «نەۆادا-سەمەي» قوزعالىسىنىڭ يادرولىق سىناق پوليگونىن جابۋعا ۇلكەن كومەك كورسەتكەنىن دە اتاپ ءوتتى.
ودان ءارى پرەزيدەنت عىلىم مەن تەحنيكا سالاسىندا بەرىلەتىن مەملەكەتتىك سىيلىقتار تاپسىرىلاتىنىنا دا توقتالدى. تاۋەلسىزدىكتى تۇعىرلى ەتۋگە عالىمدارىمىزدىڭ قوسقان ۇلەسى دە قوماقتى, دەدى وسى ورايدا مەملەكەت باسشىسى. سونىڭ ىشىندە سىيلىق حالىقارالىق دەڭگەيدەگى ماتەماتيكالىق پروبلەمالاردى شەشۋگە ۇسىنعان عىلىمي ءمانى زور ەڭبەگى ءۇشىن تىنىسبەك كالمەنوۆكە, قازىرگى مەديتسينا سالاسىنداعى وزىق تەحنولوگيالاردى ەنگىزۋگە قول جەتكىزگەن سەرىك اقشولاقوۆ باسقاراتىن «رەسپۋبليكالىق نەيروحيرۋرگيا عىلىمي ورتالىعىنىڭ» ۇجىمىنا, ماڭىزى زور عىلىمي قولدانبالى سالا – كارتوگرافيالاۋ ءىسىندەگى جەمىستى جۇمىستارى ءۇشىن وسى سالانىڭ ءبىر توپ گەوگراف-عالىمدارىنا بەرىلەتىنىن جەتكىزدى. ەل يگىلىگى ءۇشىن تەر توگىپ, ىزدەنىستەر ارقىلى زور جەتىستىكتەرگە جەتكەن ادامدار قاشاندا ەرەكشە ىلتيپاتقا لايىق. سونىڭ دالەلى – ولاردىڭ ەلدىڭ زور ماراپاتتارىنا قول جەتكىزگەندىگى. وسىلاي دەي كەلىپ, ەلباسى لايىقتىلاردى ناگرادتادى.
وزىنە تۇڭعىش پرەزيدەنتتىڭ «بەيبىتشىلىك جانە پروگرەسس سىيلىعى» تاپسىرىلعاننان كەيىن اقىن ولجاس سۇلەيمەنوۆ ەلباسىنا وزىنە كورسەتىلگەن قۇرمەت ءۇشىن ۇلكەن العىسىن ايتتى. مەن پرەزيدەنتتىڭ وسى سىيلىعىندا كورسەتىلگەن جۇمىستارىمدى, قۇداي بۇيىرتسا, ودان ءارى دە جالعاستىرامىن, دەدى ول.
ايتا كەتەرلىگى, «رەسپۋبليكالىق نەيروحيرۋرگيا عىلىمي ورتالىعى» ۇجىمىندا مەملەكەتتىك سىيلىققا يە بولعاندار اراسىندا بولىمشە مەڭگەرۋشىلەرى تالعات كەرىمباەۆ, ەربول ماحامبەتوۆ, ايسا نۇرپەيىسوۆ, مارات راباندياروۆ, نۇرجان رىسكەلديەۆ, اتلاستىق كارتوگرافيالاۋ سالاسىنداعى عىلىمي جۇمىستار توپتاماسى ءۇشىن سىيلىق العاندار قاتارىندا «پاراسات» اق گەوگرافيا ينستيتۋتىنىڭ ديرەكتورى احمەتقالي مەدەۋ, باس عىلىمي قىزمەتكەر فاريدا اكيانوۆا, عىلىمي-مەتوديكالىق ورتالىقتىڭ جەتەكشىسى ءاليا بەيسەنوۆا, لابوراتوريا جەتەكشىسى ۆيكتور بلاگوۆەششەنسكي, ت.ب. بولدى.
سونىمەن قاتار, ەلباسى ن.نازارباەۆ وسى كۇنى ادەبيەت پەن كوركەمونەردىڭ ءبىر توپ وكىلدەرىنە «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىن بەردى. ولاردىڭ اراسىندا انشىلەر قاراقات ءابىلدينا, سەمبەك جۇماعاليەۆ, ارتىستەر نۇرلان ءالىمجانوۆ, ۆەنەرا نىعماتۋلينا, بالەتمەيستەر ءاليلا ءالىشوۆا, جۋرناليست ەرلان بەكحوجين, جازۋشى سماعۇل ەلۋباەۆ, اقىن ۇلىقبەك ەسداۋلەت, ديزاينەر تيمۋر سۇلەيمەنوۆ جانە ت.ب. بولدى.
ماراپاتتاۋ ءراسىمى اياقتالعان سوڭ ەلباسى ن.نازارباەۆ ولاردى جوعارى ناگرادالارىمەن قۇتتىقتاپ, دەنساۋلىق جانە شىعارماشىلىق جاڭا تابىستار تىلەدى. سونىمەن قاتار, ءوزىنىڭ جارلىعىمەن تاۋەلسىزدىك كۇنى مەرەكەسىنە وراي 1500-دەن استام ادامنىڭ ماراپاتتالعانىن, ولارعا ناگرادالارىن پرەزيدەنتتىڭ اتىنان جەرگىلىكتى جەرلەردە اكىمدەر مەن ورتالىق ورگانداردىڭ باسشىلارى تاپسىراتىنىن ايتتى. بارشاڭىزدىڭ ماراپاتتارىڭىز قۇتتى بولسىن, دەدى ەلباسى ءسوزىنىڭ سوڭىندا.
جاقسىباي سامرات,
«ەگەمەن قازاقستان».
سۋرەتتى تۇسىرگەندەر
س.بوندارەنكو, ب.وتارباەۆ.