استانادا «نۇر وتان» پارتياسىنىڭ قولداۋىمەن «جاس تۇلپار» جاستار سىيلىعى يەگەرلەرىن سالتاناتتى ماراپاتتاۋ ءوتتى. ايگىلى «جاس تۇلپار» قوزعالىسىنىڭ 50 جىلدىعى مەن ەل تاۋەلسىزدىگى مەرەكەسىنە وراي العاش رەت وتكىزىلگەن بۇل شارانى «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك قۇتتىقتاۋ سوزبەن اشتى.
استانادا «نۇر وتان» پارتياسىنىڭ قولداۋىمەن «جاس تۇلپار» جاستار سىيلىعى يەگەرلەرىن سالتاناتتى ماراپاتتاۋ ءوتتى. ايگىلى «جاس تۇلپار» قوزعالىسىنىڭ 50 جىلدىعى مەن ەل تاۋەلسىزدىگى مەرەكەسىنە وراي العاش رەت وتكىزىلگەن بۇل شارانى «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك قۇتتىقتاۋ سوزبەن اشتى.
«نۇر وتان» پارتياسىنىڭ جاڭا ساياسي دوكتريناسىندا «جاستاردى وتانشىلدىقتىڭ ارقاۋىندا تاربيەلەۋ ارقاشاندا قازاقستاننىڭ تابىسقا جەتۋى مەن ءوركەندەۋىنىڭ كەپىلى بولماق», دەپ كورسەتىلگەن. سوندىقتان جاستار اراسىندا ءتول مادەنيەتتى دامىتۋ مەن وتانشىلدىقتى نىعايتۋعا قوسقان ۇلەسى ءۇشىن تۇڭعىش رەت پارتيا تاراپىنان «جاس تۇلپار» سىيلىعىن تابىستاۋ تۋرالى شەشىم قابىلداندى», دەدى ب.بايبەك.
سونىمەن, «جاس تۇلپار» سىيلىعىنىڭ تۇڭعىش يەگەرلەرى دەپ تومەندەگى ازاماتتار تانىلدى.
نۇرلان ءالىمجان. اكتەر, سازگەر, ءانشى. قازاقستاندىقتارعا ەل پرەزيدەنتى جايلى ءتۇسىرىلگەن «ەلباسى جولى» اتتى كينوەپوپەيانىڭ باستى كەيىپكەرى رەتىندە تانىلعان تالانت يەسى.
دانيار ەلەۋسىنوۆ. بوكستان ەلىمىزدىڭ بىرنەشە دۇركىن چەمپيونى. 2013 جىلى الماتىدا وتكەن الەم چەمپيوناتىندا 69 كيلوعا دەيىنگى سالماقتا الەم چەمپيونى اتانىپ, ەل مەرەيىن ۇستەم ەتكەن ساڭلاق.
جانسايا ابدىمالىك. وقۋشىلار اراسىنداعى ۇزدىك شاحماتشى تيتۋلىنىڭ يەگەرى. جەتى جاسىندا ءبىرىنشى رازرياد نورماسىن ورىنداعان ول 2008 جىلى 20 جاسقا دەيىنگى قىزدار اراسىندا ەلىمىزدىڭ ابسوليۋتتىك چەمپيونى بولدى. ءدال سول جىلى ج.ابدىمالىك يراندا وتكەن ازيا چەمپيوناتىندا جەڭىسكە جەتىپ, شاحمات تاريحىندا ەڭ جاس ازيا چەمپيونى اتاندى. سونداي-اق, ول وتكەن جىلى ماۋسىمدا قىزدار اراسىنداعى ەڭ جاس گروسسمەيستەر اتاعىن يەلەندى.
يبراگيم ەسكەندىر. «جاس وتان» جاستار قاناتىنىڭ بەلسەندىسى, پاتريوتتىق اندەر بايقاۋلارىنىڭ جەڭىمپازى. ونىڭ جۇرەگىنەن شىققان «كوك تۋدىڭ جەلبىرەگەنى», «امانات», «بىرلىك ۇرانى», «ءلايلا», «عاشىقتىڭ ءتىلى», «قىزدى نەگە جىلاتتىڭ؟» اندەرى حالىققا كەڭىنەن تانىمال. ونىڭ «كوك تۋدىڭ جەلبىرەگەنى» ءانى لوندون وليمپياداسى كەزىندە سپورتشىلارىمىز بەن جانكۇيەرلەرگە پاتريوتتىق رۋح سىيلاپ, سەنىم وتىن جالىنداتتى.
تۇرار ارتىقباەۆ. پوليتسيا كاپيتانى, شىمكەنت قالاسىندا ۋچاسكەلىك ينسپەكتور بولىپ قىزمەت ىستەيدى. مەملەكەتتىك ماراپات – «ەرلىگى ءۇشىن» مەدالىنىڭ يەگەرى. ءوزىنىڭ قىزمەتتىك ءمىندەتىن ورىنداۋ كەزىندە ەرلىككە بارىپ, قىلمىسكەردىڭ جولىنا توسقاۋىل قويۋ ءۇشىن اتىلعان وققا كەۋدەسىن توسقان بولاتىن.
ەركىن بەيسەكەنوۆ. اقتوبەدە ءورت ءسوندىرۋ جانە اپاتتىق-قۇتقارۋ جۇمىستارى قىزمەتىندە ءورت ءسوندىرۋشى-قۇتقارۋشى بولىپ قىزمەت ەتەدى. «ەرلىگى ءۇشىن» جانە ءىىى دارەجەلى «ءىىم-گە ادال قىزمەتى ءۇشىن» مەدالدارىمەن ماراپاتتالعان. 2013 جىلدىڭ شىلدەسىندە ءتۇن ىشىندە تۇرعىن ۇيلەردىڭ ءبىرىندە بولعان ورتتەن 4 بالانى اراشالاپ قالعان ول ءوزى دە ءۇش بالانىڭ اكەسى.
ارتۋر سۋلەيمانوۆ. شىعارماشىلىق لاقاپ اتى – Emir France. ءارتىس, الماتى قالاسىنىڭ Blow Money لەيبلىنىڭ رەپەرى. ونىڭ بەينەكليپتەرى ۇلكەن سۇرانىسقا يە بولىپ, عالامتوردا تاماشالاۋشىلاردىڭ سانى ءبىرنەشە ەسەگە ارتقان. اتاپ ايتساق, UpGrade feat-پەن بىرلەسىپ جازعان شىعارمالارى: «Kazakhstan» – 230 384 رەت, «كيەلi مەكەن» – 78 359 رەت قارالىپتى.
جۇلدەلەردى مىرزاتاي جولداسبەكوۆ, قۋانىش سۇلتانوۆ, مۇرات اۋەزوۆ, ءماۋلەن اشىمباەۆ, بەكبولات تىلەۋحان سىندى ەلىمىزگە بەلگىلى ازاماتتار تابىس ەتتى. «جاس تۇلپار» سىيلىعى كاسىبي ەرەن تابىسى ءۇشىن 35 جاسقا دەيىنگى قازاقستاندىقتارعا جىلىنا ءبىر رەت بەرىلمەك.
ءابدىراحمان قىدىربەك,
«ەگەمەن قازاقستان».
سۋرەتتەردى تۇسىرگەن
ەرلان وماروۆ,
«ەگەمەن قازاقستان».