بۇگىن, اقوردادا قازاقستان رەسپۋبليكاسى تۇڭعىش پرەزيدەنتىنىڭ – ەلباسىنىڭ مەملەكەتتىك بەيبىتشىلىك جانە پروگرەسس سىيلىعىن, عىلىم مەن تەحنيكا سالاسىنداعى 2013 جىلعى مەملەكەتتىك سىيلىقتى, سونداي-اق «قازاقستاننىڭ ەڭبەك سىڭىرگەن قايراتكەرى» اتاعىن تاپسىرۋ ءراسىمى بولدى. بۇل تۋرالى اقوردا. كz حابارلادى.
مەملەكەت باسشىسى راسىمگە قاتىسۋشىلار الدىندا سويلەگەن سوزىندە بارشانى ەلىمىزدىڭ ەڭ باستى مەرەكەسى – تاۋەلسىزدىك كۇنىمەن قۇتتىقتادى.
– وسىناۋ ماڭىزدى كۇن قارساڭىندا, قالىپتاسقان ءداستۇر بويىنشا, ءبىز ءوز ەڭبەكتەرىمەن ەرەكشەلەنگەن ازاماتتاردى ماراپاتتاۋ ءراسىمىن وتكىزەمىز. بۇل ءداستۇردىڭ ءمانىن تەرەڭ ءتۇسىنۋ كەرەك. مەملەكەتتىك ناگرادالارعا ەلىمىزدىڭ دامۋىنا ەلەۋلى ۇلەسىن قوسقاندار يە بولادى. دەمەك, بۇل – جەكەلەگەن ازاماتتاردىڭ ەمەس, بۇكىل حالىقتىڭ ەڭبەگىنىڭ باعالانۋى, – دەدى قازاقستان پرەزيدەنتى.
نۇرسۇلتان نازارباەۆ بەيبىتشىلىك پەن تىنىشتىقتى ءوزىنىڭ ەڭ باستى بايلىعى سانايتىن ەلىمىز ءۇشىن پارلامەنت قازاقستان رەسپۋبليكاسى تۇڭعىش پرەزيدەنتىنىڭ – ەلباسىنىڭ مەملەكەتتىك بەيبىتشىلىك جانە پروگرەسس سىيلىعىن بەكىتكەنىن اتاپ ءوتتى.
– بيىلعى جىلى قۇرمەتتى ناگرادا ءبىزدىڭ بەلگىلى وتانداسىمىز, كورنەكتى اقىن, قوعام قايراتكەرى ولجاس ومار ۇلى سۇلەيمەنوۆكە بەرىلەدى. ول ەلىمىزدىڭ مادەني-رۋحاني دامۋىنا, حالىقارالىق ىنتىماقتاستىققا زور ۇلەس قوستى. تاۋەلسىزدىگىمىزدىڭ بارلىق كەزەڭىندە ول حالىق بىرلىگىن قولدادى, شەتەلدەردە قىزمەت اتقارا ءجۇرىپ قازاقستانداعى كەلىسىمنىڭ ۇلگىسى جايلى ايتتى. ولجاس سۇلەيمەنوۆتىڭ باسقارۋىمەن «نەۆادا-سەمەي» قوزعالىسى يادرولىق پوليگوندى جابۋ ىسىنە ماڭىزدى ۇلەس قوستى, – دەدى مەملەكەت باسشىسى.
قازاقستان پرەزيدەنتى بۇگىن تاعى بىرقاتار ازاماتتارعا عىلىم جانە تەحنيكا سالاسىنداعى 2013 جىلعى مەملەكەتتىك سىيلىق تاپسىرىلاتىنىن ايتتى.
– ماراپاتتاۋ – تاۋەلسىزدىگىمىزدى تۇعىرلى ەتۋگە ءوز ۇلەسىن قوسقان عالىمدار قىزمەتىن لايىقتى باعالاۋ. ناگراداعا الەمدىك دەڭگەيدەگى ماتەماتيكالىق پروبلەمالار شەشىمىن ۇسىنعان تىنىسبەك كالمەنوۆتىڭ ەڭبەگى لايىق دەپ تانىلدى. سونداي-اق, مەملەكەتتىك سىيلىق قازىرگى مەديتسيناعا وزىق تەحنولوگيالاردى ەنگىزگەن سەرىك اقشولاقوۆ باستاعان رەسپۋبليكالىق نەيروحيرۋرگيا عىلىمي ورتالىعىنىڭ عالىمدار توبىنا بەرىلەدى. ولار دەنساۋلىق سالاسىن دامىتۋدىڭ جانە كاسىبي شەبەرلىكتەرىن ارتتىرۋدىڭ ارقاسىندا كوپتەگەن ازاماتتىڭ ءومىرىن اراشالاپ قالدى. سونىمەن قاتار, كارتوگرافيالاۋ سالاسىندا ماڭىزدى ناتيجەلەرگە قول جەتكىزگەن ءبىر توپ گەوگراف عالىمدار ماراپاتتالادى. ولاردىڭ ەڭبەگىنىڭ ارقاسىندا ەلىمىزدىڭ تاماشا اتلاس كارتالارى جاسالدى, – دەدى نۇرسۇلتان نازارباەۆ.
ءراسىم سوڭىندا مەملەكەت باسشىسى لاۋرەاتتارعا ءسوزىن ارناي وتىرىپ, ولاردى ناگرادالارىمەن تاعى دا قۇتتىقتاپ, ەلىمىزدى دامىتۋ جولىنداعى قاجىرلى ەڭبەكتەرى ءۇشىن العىسىن ايتتى جانە بۇدان كەيىنگى جۇمىستارىنا جەمىس تىلەدى.
– مەن قازىر لاۋرەاتتاردىڭ تەك ءبىر توبىنا عانا ناگرادا تاپسىردىم, ال بۇكىل ەلىمىز بويىنشا جوعارى اتاققا لايىقتى باسقا دا ازاماتتار مەنىڭ اتىمنان ماراپاتتالاتىن بولادى. سىزدەرمەن بىرگە بارلىعىن لايىقتى ەڭبەگى ارقىلى العان مەملەكەتتىك ناگرادالارىمەن جانە سىيلىقتارىمەن قۇتتىقتايمىن. بۇگىنگى كۇنى ەل الدىنداعى قىزمەتى مەن قاجىرلى ەڭبەگى ءۇشىن بۇكىل رەسپۋبليكا بويىنشا ءبىر جارىم مىڭنان استام قازاقستاندىق وردەندەرمەن جانە مەدالدارمەن ماراپاتتالدى. قازاقستاننىڭ تاۋەلسىزدىكتىڭ 22 جىلى ىشىندە قول جەتكىزگەن بارلىق تابىستارى مەن جەتىستىكتەرىنە بارشا قازاقستاندىقتاردىڭ قىزمەتى ارقىلى قول جەتكىزىلىپ وتىر, ويتكەنى اركىم ءوزىنىڭ جۇمىسى سالاسىندا رەسپۋبليكانى دامىتۋعا مىسقالداي بولسا دا ۇلەسىن قوستى. بىزدەگى ىشكى تۇراقتىلىق, توزىمدىلىك, تۇسىنىكتىك پەن دوستىق ەلىمىزدى دامىتۋ ءۇشىن جاhاندىق جانە مىزعىماس مانگە يە. سوندىقتان ءبىز ەڭ ۇزدىك دەگەن قازاقستاندىقتاردىڭ ەڭبەگىن باعالادىق دەپ ويلايمىن. سىزدەر وتانىمىزدىڭ – قازاقستان رەسپۋبليكاسىنىڭ داڭقىن شىعارا وتىرىپ, باسقالارعا ۇلگى كورسەتەسىزدەر دەپ سەنەمىن, – دەدى نۇرسۇلتان نازارباەۆ.
و.سۇلەيمەنوۆ قازاقستان رەسپۋبليكاسى تۇڭعىش پرەزيدەنتىنىڭ — ەلباسىنىڭ مەملەكەتتىك بەيبىتشىلىك جانە پروگرەسس سىيلىعىنىڭ لاۋرەاتى اتاندى.
عىلىم مەن تەحنيكا سالاسىنداعى 2013 جىلعى مەملەكەتتىك سىيلىق قازاقستان رەسپۋبليكاسى ءبىلىم جانە عىلىم مينيسترلىگى عىلىم كوميتەتى «ماتەماتيكا جانە ماتەماتيكالىق مودەلدەۋ ينستيتۋتى» رمك باس ديرەكتورى ت.كالمەنوۆكە, رەسپۋبليكالىق نەيروحيرۋرگيا عىلىمي ورتالىعى, قازاقستان رەسپۋبليكاسى ءبىلىم جانە عىلىم مينيسترلىگى «پاراسات» ۇلتتىق عىلىمي-تەحنولوگيالىق حولدينگى» اق گەوگرافيا ينستيتۋتى, سونداي-اق «قازمورگەوفيزيكا» اق عىلىمي قىزمەتكەرلەرى توبىنا تاپسىرىلدى.
سونداي-اق, ءراسىم بارىسىندا رەسپۋبليكا الدىنداعى زور ەڭبەكتەرى ءۇشىن مادەنيەت پەن ونەر سالاسىنىڭ كورنەكتى وكىلدەرى «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىنا يە بولدى.