كەشە پرەمەر-مينيستر سەرىك احمەتوۆتىڭ توراعالىعىمەن وتكەن ۇكىمەت وتىرىسىندا 2014-2016 جىلدارعا ارنالعان ناقتىلانعان رەسپۋبليكالىق بيۋدجەتتى جۇزەگە اسىرۋ تۋرالى قاۋلى قابىلداندى.
كەشە پرەمەر-مينيستر سەرىك احمەتوۆتىڭ توراعالىعىمەن وتكەن ۇكىمەت وتىرىسىندا 2014-2016 جىلدارعا ارنالعان ناقتىلانعان رەسپۋبليكالىق بيۋدجەتتى جۇزەگە اسىرۋ تۋرالى قاۋلى قابىلداندى.
الداعى ءۇش جىل كەزەڭدەگى رەسپۋبليكالىق بيۋدجەت تۋرالى زاڭعا مەملەكەت باسشىسى جەلتوقساننىڭ باسىندا قول قويعان بولاتىن. ال اتالمىش قاۋلى سول زاڭنىڭ ورىندالۋىن جۇزەگە اسىرادى.
قاۋلى جوباسى تۋرالى ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ باياندادى. ءمينيستردىڭ مالىمەتىنشە, بيۋدجەت كودەكسىنىڭ تالاپتارىنا سايكەس قالىپتاستىرىلعان قاۋلى جوباسىندا وبلىستار جانە استانا مەن الماتى بيۋدجەتتەرىنە اعىمداعى نىسانالى ترانسفەرتتەر مەن نەسيەلەر سومالارىن ءبولۋ, قاراجاتتىڭ ءبىر ءبولىگىن «بيزنەستىڭ جول كارتاسى-2020», «جۇمىسپەن قامتۋدىڭ جول كارتاسى-2020» جانە «مونوقالالاردى دامىتۋ-2020» باعدارلامالارى بويىنشا ءبولۋ, مەملەكەتتىك ورگاندارعا بەرىلگەن 2014 جىلعا ارنالعان بيۋدجەتتىڭ ۋاقتىلى اتقارىلۋىن قامتاماسىز ەتۋ جونىندەگى جانە باسقا دا تاپسىرمالار ەسكەرىلگەن.
بۇدان باسقا, قاۋلى جوباسىندا مەملەكەتتىك مىندەتتەر, باسىمدىقتى رەسپۋبليكالىق بيۋدجەتتىك ينۆەستيتسيالار, كەيىنگە قالدىرۋ شارتتارىمەن رەسپۋبليكالىق بيۋدجەت جوباسىنا ەنگىزىلگەن اسا ماڭىزدى جانە جەدەل ورىنداۋدى تالاپ ەتەتىن مىندەتتەر تىزبەسى كورسەتىلگەن.
قۇجاتتا, سونداي-اق, 2014 جىلدىڭ بيۋدجەتىن مەرزىمىندە ورىنداۋدى قامتاماسىز ەتۋ بويىنشا مەملەكەتتىك ورگاندارعا تاپسىرمالار مازمۇندالعان.
ۇكىمەت باسشىسى پرەمەر-مينيستر كەڭسەسىنە ەكونوميكا جانە بيۋدجەتتىك جوسپارلاۋ مينيسترلىگىمەن بىرلەسە وتىرىپ, اتالعان قاۋلىنىڭ جوباسىنا قول قويۋدى دايارلاۋدى تاپسىردى. «بۇنىڭ الدىندا كەلىسىلگەندەي, بيۋدجەتتىك باعدارلامالاردىڭ اكىمشىلەرى جىل سوڭىنا دەيىن 2014-2018 جىلدارعا ارنالعان وزدەرىنىڭ بارلىق ستراتەگيالىق جوسپارلارىن بەكىتۋى قاجەت», دەدى س.احمەتوۆ. پرەمەر-مينيستر, سونىمەن قاتار, اعىمداعى جىلى ۇكىمەتتىڭ قورىتىندى وتىرىسى 24 جەلتوقساندا وتەتىنىن ايتا كەلە, 18 جەلتوقسانعا دەيىن بارلىق مەملەكەتتىك ورگانداردىڭ باسشىلارىنا جوبالاردىڭ شەشىمىن ۇكىمەتتىڭ وتىرىسىنا ەنگىزۋدى قامتاماسىز ەتۋدى جۇكتەدى.
دينارا بىتىكوۆا,
«ەگەمەن قازاقستان».