جۋىردا رەسەيدىڭ فيتوسانيتارلىق قىزمەتى قازاقستاندا وسىرىلگەن قىزاناقتان ۆيرۋس تابىلدى دەپ حابارلاعان بولاتىن. ەلىمىزدىڭ اۋىل شارۋاشىلىعى مينيسترلىگى بۇل اقپاراتتى جوققا شىعاردى.
– 2020 جىلدىڭ جەلتوقسان ايىندا رەسەيدىڭ ۆەتەرينارلىق جانە فيتوسانيتارلىق قاداعالاۋ جونىندەگى فەدەرالدىق قىزمەتى (روسسەلحوزنادزور) «Green Capital Kazakhstan», «Green Land Alatau» جشس ونىمدەرىندە قىزاناق جەمىستەرىنىڭ قاۋىپتى ۆيرۋسى (Tomato brown rugose fruit virus نەمەسە ToBRFV) انىقتالعانىن, «Greenhouse-Qaztomat» جشس وندىرەتىن قىزاناقتى ءوز ەلدەرىنىڭ اۋماعىنا ەنگىزۋگە شەكتەۋ قويعانى تۋرالى حابارلاما جىبەردى. وسىعان بايلانىستى قازاقستان رەسپۋبليكاسى اۋىل شارۋاشىلىعى مينيسترلىگى اگروونەركاسىپتىك كەشەندەگى مەملەكەتتىك ينسپەكتسيا كوميتەتى شۇعىل تۇردە رەسمي تەكسەرۋ ۇيىمداستىردى, – دەپ حابارلادى مينيسترلىكتىڭ ءباسپاسوز قىزمەتى.
حابارلامادا ايتىلعانداي, وسىمدىكتەر كارانتينى جونىندەگى مەملەكەتتىك ينسپەكتورلار, سونداي-اق «فيتوسانيتاريا» رمك, «فيتوسانيتارلىق دياگنوستيكا جانە بولجامدار ادىستەمەلىك ورتالىعى» رمم جانە «رەسپۋبليكالىق وسىمدىكتەر كارانتينى ورتالىعى» مم ماماندارى پتر-تالداۋ جۇرگىزۋ ماقساتىندا سىنامالاردى الۋ ءۇشىن «Greenhouse-Qaztomat» جشس-دە كوميسسيالىق تەكسەرۋ جۇرگىزدى. تالداۋ ءۇشىن رەسەي فەدەراتسياسىنىڭ «بۇكىلرەسەيلىك وسىمدىكتەر كارانتينى ورتالىعىنىڭ» جەدەل تەستتەرى قولدانىلدى. ىقتيمال قاتەلەر مەن كەلىسپەۋشىلىكتەردى بولدىرماۋ ءۇشىن زەرتحانالىق تالداۋ ادىستەرى رەسەيلىك ۇيىمنىڭ ماماندارىمەن بىرگە جاسالدى. ساراپتاما قورىتىندىسى بويىنشا «Greenhouse-Qaztomat» جشس ونىمدەرىندە ToBRFV ۆيرۋستارى انىقتالماعان.
– سونداي-اق وبەكتيۆتىلىك ءۇشىن كومپانيا ءوز باستاماسى بويىنشا ءونىمنىڭ سىنامالارىن «Groen Agro Control» تاۋەلسىز زەرتحاناسىنا (نيدەرلاند) جىبەردى. قوسىمشا زەرتتەۋ ناتيجەلەرى بويىنشا جىلىجاي شارۋاشىلىعىندا ۆيرۋس انىقتالعان جوق. وسىنداي كوميسسيالىق تەكسەرۋلەر «Green Capital Kazakhstan» جانە «Green Land Alatau» جىلىجاي شارۋاشىلىقتارىندا جۇرگىزىلدى. ول جەرلەردە دە ۆيرۋس انىقتالمادى. رەسمي تەكسەرۋلەردىڭ ناتيجەلەرى ۆەتەرينارلىق جانە فيتوسانيتارلىق قاداعالاۋ جونىندەگى فەدەرالدىق قىزمەتكە حابارلاندى, – دەپ حابارلادى اۋىل شارۋاشىلىق مينيسترلىگى.
اگروونەركاسىپتىك كەشەندەگى مەملەكەتتىك ينسپەكتسيا كوميتەتى روسسەلحوزنادزوردىڭ ءىس-ارەكەتى ەاەو تۋرالى شارتتىڭ تالاپتارىن ورەسكەل بۇزادى جانە جاساندى كەدەرگى بولىپ تابىلادى دەپ ەسەپتەيدى. وسىعان بايلانىستى اۋىل شارۋاشىلىعى مينيسترلىگى ەۋرازيالىق ەكونوميكالىق كوميسسياعا جۇگىنۋگە نيەتتى.
سونىمەن قاتار اۋىل شارۋاشىلىعى مينيسترلىگى ۆيرۋستاردى انىقتاۋ فاكتىلەرىنىڭ دۇرىستىعىنا كۇمان كەلتىردى. سەبەبى روسسەلحوزنادزوردىڭ سۆەردلوۆ رەفەرەنتتىك ورتالىعى 2020 جىلعى 11 جەلتوقساندا «Greenhouse Kazakhstan» جشس ءونىمى قاۋىپتى دەپ قورىتىندى شىعارعان. الايدا كومپانيا 24 جەلتوقساندا سول پارتيادان سىنامالار الىپ, بۇكىلرەسەيلىك وسىمدىكتەر كارانتينى ورتالىعىنىڭ زەرتحاناسىندا قايتا ساراپتاما جۇرگىزۋدى تالاپ ەتكەننەن كەيىن, اتالعان ءونىمنىڭ تازالىعىن راستايتىن قورىتىندى العان.
قازاقستاندىق قىزاناق پەن بۇرىش ونىمدەرىنەن ۆيرۋس تارالادى دەگەن اقپاراتقا بايلانىستى اۋىل شارۋاشىلىعى مينيسترلىگى اگروونەركاسىپتىك كەشەندەگى مەملەكەتتىك ينسپەكتسيا كوميتەتى ەلىمىزدىڭ بارلىق جىلىجاي شارۋاشىلىقتارىنا جانە رەسپۋبليكا اۋماعىنا الىپ كەلەتىن قىزاناقتارعا كەشەندى تەكسەرۋ ۇيىمداستىردى. زەرتحانالىق سىناقتاردىڭ قورىتىندىسى بويىنشا جىلىجاي شارۋاشىلىقتارىندا ۆيرۋس انىقتالعان جوق.
دەسەك تە, 16 جاعدايدا ازەربايجاننان كەلگەن قىزاناقتان ۆيرۋس انىقتالعانىن ايتا كەتۋ كەرەك. قاۋىپتى ۆيرۋس جۇققان قىزاناق تيەلگەن بارلىق كولىك شەكارادان جۇك ەكسپورتتاۋشى ەلگە كەرى قايتارىلدى.