مەنىڭ ويىمشا, «ەگەمەنگە» جازىلۋ كەرەك دەپ, وعان جارناما جاساۋدىڭ قاجەتى جوق. ەلىمىزدىڭ باس باسىلىمى مۇنداي جارناماعا ءزارۋ ەمەس دەپ سانايمىن. «ەگەمەن» ونسىز دا وقىلادى. ويتكەنى, مۇندا وقىماسا بولمايتىن, ءتىپتى وقىتپاسىڭا قويمايتىن ماتەريالدار جەتكىلىكتى.
مەنىڭ ويىمشا, «ەگەمەنگە» جازىلۋ كەرەك دەپ, وعان جارناما جاساۋدىڭ قاجەتى جوق. ەلىمىزدىڭ باس باسىلىمى مۇنداي جارناماعا ءزارۋ ەمەس دەپ سانايمىن. «ەگەمەن» ونسىز دا وقىلادى. ويتكەنى, مۇندا وقىماسا بولمايتىن, ءتىپتى وقىتپاسىڭا قويمايتىن ماتەريالدار جەتكىلىكتى.تاعى ءبىر باسىن اشىپ ايتاتىن ماسەلە «ەگەمەن» تەك بىرىڭعاي ەگدە تارتقان ادامداردىڭ وقيتىن گازەتى دەسەك, قاتەلەسەر ەدىك. بۇعان قوسا, بۇگىنگى جاستار دا گازەت بەتتەرىنەن وزدەرىنە قاجەتتى تانىمدىق جانە ساراپتامالىق تالداۋ تۇرعىسىنداعى سان الۋان ماتەريالدارمەن تانىسا الادى. ونىڭ ينتەرنەت-باسىلىمىنا ءۇڭىلىپ, الەمدە بولىپ جاتقان بىرقاتار وقيعالاردىڭ الدىن وراي وتىرىپ, شۇعىل تۇردە بەرىلگەن سايتتاعى سارابدال سوزىنە دە كوز جۇگىرتە الادى.
مەملەكەتتىك دەڭگەيدە جانە رەسپۋبليكا ايماقتارىندا تولعاعى جەتكەن ماسەلەلەردى تۇبىرىمەن كوتەرىپ, قوپارىپ جازىپ جۇرگەن ءبىر باسىلىم وسىنداي-اق بولار. «سىن تۇزەلمەي, ءمىن تۇزەلمەيدى» دەگەندەي, باس باسىلىمنىڭ وسىنداي پاراساتتى دا پايىمدى سىنىنان سوڭ جۇمىسىن شيراتقان, سىلبىرلىق پەن ەنجارلىقتان ارىلعان جەكە جانە زاڭدى تۇلعالار قانشاما؟ سونداي-اق, مۇندا وقىرماندار قىزىعىپ وقيتىن ماتەريالداردىڭ ءبىرى – جاھان جاڭالىقتارى دەگەن ويدامىن. ەگەر الداعى جىلدارى رەداكتسيا القاسى بۇل تاقىرىپتى ودان ءارى تەرەڭدەتە جازۋعا ءتيىستى قادامدار جاساسا, وقىرماندار اۋديتورياسى قازىرگىسىنەن دە كەڭەيە تۇسەدى دەمەكپىن.
كۇن سايىن 12-14 بەت كولەمى ۇلكەن پىشىممەن شىعاتىن «ەگەمەن قازاقستان» گازەتىنىڭ جازىلىم باعاسى ۇزاق جىلدار بويى وسىرىلمەي بۇرىنعى كۇيىندە قالدى. بۇعان ونىڭ تۇراقتى وقىرمانى رەتىندە ايعاق, كۋا بولا الامىن. قازىرگى باعاسى دا الدەقايدا از بەتپەن شىعاتىن كەيبىر رەسپۋبليكالىق جانە وبلىستىق باسىلىمدار باعاسىمەن ولشەگەندە ءبىرشاما ارزان. مەنىڭ ويىمشا, سالماقتى باسىلىمنىڭ باعاسى دا سالماقتى بولۋى كەرەك. «ارزاننىڭ تۇزى تاتىماس» دەمەي مە حالقىمىز.
ونىڭ ۇستىنە «ەگەمەن» رەسپۋبليكانىڭ بارلىق وبلىستارىندا باسىلاتىن بولعاندىقتان سول كۇنى تيەتىن, ال شالعايداعى اۋداندارعا ەرتەڭىنە جەتەتىن ەلدىڭ بىردەن-ءبىر باسىلىمى ەكەنىن ۇمىتپايىق. وسى ارقىلى كۇن سايىن قانشاما وزىمىزگە قاجەتتى اقپاراتتار الامىز. قانشاما وزەكتى دە كوكەيكەستى تاقىرىپتارمەن بەتپە-بەت كەلەمىز. تاعى دا قايتالاپ ايتامىن, مۇنداي باعا جەتپەس رۋحاني دۇنيەنى جازدىرىپ وقۋ – ءوزىن قازاقپىن دەگەن, انا ءتىلىن قۇرمەتتەگەن, ۇلتىنىڭ مۇددەسىن ءدىتتەگەن ءاربىر ازاماتتىڭ پارىزى.
ءبىرجان كۋحاەۆ,
«اقجايىق ورەندەرى» جاستار
قوعامدىق بىرلەستىگىنىڭ توراعاسى.
باتىس قازاقستان وبلىسى,
اقجايىق اۋدانى.