بارلىق الەۋمەتتىك ماڭىزى بار باعىتتاردىڭ تەمىرجول بيلەتتەرى 1 ناۋرىزدان باستاپ قىمباتتايدى, دەپ حابارلايدى Egemen.kz railways.kz سايتىنا سىلتەمە جاساپ.
«تاسىمالداۋشىنىڭ الەۋمەتتىك ماڭىزى بار مارشرۋتتار بويىنشا جولاۋشىلاردى تاسىمالداۋعا بايلانىستى شىعىستارىن ۇزاق مەرزىمدى سۋبسيديالاۋعا ارنالعان كەلىسىمدەرگە سايكەس, 2021 جىلدىڭ 1 ناۋرىزىنان باستاپ جولاۋشىلاردى تەمىرجول كولىگىمەن تاسىمالداۋ قۇنىن ايماقارالىق جانە قالا ماڭى بايلانىستارىنداعى بارلىق الەۋمەتتىك ماڭىزدى باعىتتار بويىنشا 7% يندەكستەۋ جوسپارلانعان», - دەلىنگەن حابارلامادا.
ايتا كەتەيىك, 2018 جىلدان 2020 جىلعا دەيىن «جولاۋشىلار تاسىمالى» اق 159 ۆاگون ساتىپ العان. ولار كەلەسى باعىتتار بويىنشا جولاۋشىلار پويىزدارىن جاڭارتقانىن حابارلادى: الماتى - ماڭعىستاۋ, نۇر-سۇلتان - سارىاعاش, اتىراۋ - نۇر-سۇلتان, اتىراۋ - الماتى, نۇر-سۇلتان - ارقالىق, اتىراۋ - ماڭعىستاۋ, الماتى - جەزقازعان, نۇر-سۇلتان - سەمەي.