الماتى قالاسىندا جايمابازارلاردى رەتكە كەلتىرۋ ماسەلەسى قولعا الىندى. وسى باعىتتاعى جۇمىستار ەكى جىل كولەمىندە جۇزەگە اسىرىلۋى ءتيىس. بۇل تۋرالى Nur.kz حابارلادى.
«ءبىز جايمابازارلاردى رەتتەۋگە ارنالعان جوبانى ەكى جىل ىشىندە جۇزەگە اسىرۋىمىز كەرەك. ءبىرىنشى كەزەكتە سەۆەرنوە كولتسو كوشەسىن بوساتۋىمىز كەرەك. ءار بەيسەنبى سايىن «باراحولكا» قۇرىلىسىنا جاۋاپتى جەكە كاسىپكەرلەردى شاقىرىپ, كەلىسسوزدەر جۇرگىزۋدەمىز», - دەيدى ساۋلەت جانە قالا قۇرىلىسى باسقارماسىنىڭ باستىعى عابيت سادىرباەۆ.ونىڭ ايتۋىنشا, قازىرگى كەزدە «باراحولكا» اۋماعىنداعى الپىس ءتورت بازاردىڭ تورتەۋىنىڭ عانا («بولاشاق», «ساۋران», «ستروي-سيتي», «سالەم») جوبالىق جوسپارى بار. ال قىزىل لينيادا سالىنعان بازارلار بۇزىلاتىن بولادى. سونىمەن, جوسپارعا سايكەس, «قۇلاگەر» بازارى بۇزىلىپ, ورنى تازارتىلىپ جاتىر. سەبەبى, جاڭا جوبادا قىزىل سىزىقتىڭ بويىندا تۇرعان بازارلاردىڭ 130 مەترگە كەيىنگە شەگەرىلۋى كەرەكتىگى كورسەتىلگەن.
«سولتۇستىك اينالىمدا قىزىل سىزىقتا تۇرعان ايماقتى تازارتامىز. ورنىنا زاماناۋي ساۋدا ۇيلەرى سالىنادى. ءاربىر كەشەننىڭ جانىنان اشىق كولىك تۇراقتارى مەن سىيىمدىلىعى 21 مىڭ ورىندىق كوپقاباتتى پاركينگ سالىنباقشى. بۇل كەشەندەردىڭ جەرتولەسى پاركينگ جانە قويما رەتىندە پايدالانىلادى»,-دەدى سولتۇستىك اينالىم جوباسىنىڭ اۆتورى التاي ساتىبالديەۆ.
جوبادا قاراستىرىلعان جايلى كەشەننىڭ قۇرىلىسىنا ازىرگە بيۋدجەتتەن 14 ملن.تەڭگە ءبولىنىپتى. تالاپقا ساي كەلمەيتىن قالا ىشىلىك 34 ساۋدا ورنىن رەتكە كەلتىرۋ ءىسى دە كۇن تارتىبىندە تۇر. «قالا بويىنشا 74 ساۋدا ورنى بار. سونىڭ ىشىندە اۋەزوۆ اۋدانىندا 4, المالى اۋدانىندا 6, الاتاۋ اۋدانىندا 10, بوستاندىق اۋدانىندا 4, جەتىسۋدا 7, مەدەۋدە 1, تۇركسىبتە 2 ساۋدا ورنىنىڭ تۇرعان جەرى ءبىزدىڭ باس جوباعا سايكەس كەلمەيدى», – دەدى ءسوز ورايىندا قۇرىلىس جانە ساۋلەت باسقارماسىنىڭ باستىعى ع.سادىرباەۆ.
ءبىز جەرگىلىكتى بيلىك وكىلدەرىمەن اڭگىمەلەسۋ بارىسىندا سولتۇستىك اينالىمداعى «ادەم», «راحات», «ياليان» سياقتى سوڭعى جىلدارى سالىنعان بازارلار بۇزىلمايتىنىن بىلدىك. ولارعا كۇردەلى جوندەۋ جۇمىستارى جۇرگىزىلەدى ەكەن. جالپى, قالانىڭ سولتۇستىك بولىگىندەگى اينالما جولدى قالىپقا كەلتىرۋگە بار كۇش جۇمىلدىرىلادى.
باقىتبەك كەنەش ۇلى.
دەرەككوز: Nur.kz