اتىراۋ وبلىسى جايىق وزەنى جاعالاۋىنداعى جەر تەلىمدەرى كەيبىرەۋلەردىڭ الاياقتىق جولمەن اقشا تابۋ كوزىنە اينالعان. جەرگىلىكتى تابيعات قورعاۋ پروكۋراتۋراسى وبلىس ورتالىعى اۋماعىنداعى ەكى تەلىمدى, ياعني 7 گەكتارعا جۋىق جەردى زاڭسىز ساتىپ, ساۋدالاعان دەرەكتى اشكەرەلەدى. بۇل تۋرالى «استانا» تەلەارناسى حابارلادى.
اتالعان جەر تەلىمى قالانىڭ قاق ورتاسىندا قورعاۋعا الىنعان سۋ بەلدەۋىندە ورنالاسقان. پروكۋرورلاردىڭ دەرەگىنە جۇگىنسەك, جەر تەلىمى 2011-2012 جىلدارى اتىراۋ قالاسى اكىمىنىڭ شەشىمىمەن قۇرىلىس كومپانياسىنا بەرىلگەن ەكەن. مامانداندىرىلعان اۋدانارالىق ەكونوميكالىق سوت سول شەشىمدى زاڭسىز دەپ تاۋىپ وتىر. الايدا, سوعان قاراماستان اتالعان جاۋاپكەرشىلىگى شەكتەۋلى سەرىكتەستىك باسشىلىعى جالعان قۇجات جاساپ, جەر تەلىمىن ساتىپ جىبەرگەن. كەيىن دە جەر تەلىمىنىڭ يەسى بىرنەشە رەت وزگەرىپ, سوڭعى رەت وسى جىلدىڭ كوكتەمىندە ساۋدالانعان. ال جالعان قۇجاتتى ادىلەت باسقارماسى تىركەۋگە العان. قازىر وسى دەرەك بويىنشا قىلمىستىق ءىس قوزعالدى. بۇل بىلىققا قانداي مەملەكەتتىك ورگان ماماندارىنىڭ قاتىسى بارىن تەرگەۋ اشكەرەلەيدى.
«ايىپكەر زاڭسىز جەر تەلىمىن ساتۋ ارقىلى 90 ملن تەڭگە العان. جالپى,تەكسەرۋ بارىسىندا بۇل جەر تەلىمدەرىنىڭ اتىراۋ قالاسىنىڭ ادىلەت باسقارماسىندا تىركەلگەنى انىقتالدى. قازىرگى ۋاقىتتا قىلمىستىق ءىس بويىنشا تەرگەۋ امالدارى جۇرگىزىلۋدە»,-دەيدى اتىراۋ وبلىسى مامانداندىرىلعان تابيعات قورعاۋ پروكۋرورىنىڭ ورىنباسارى باحتيار توعىزباەۆ.
تەلەارنا جايىق وزەنى جاعالاۋىندا قورعاۋعا الىنعان سۋ بەلدەۋىندەگى جەر تەلىمىن ءۇندى ازاماتىنا زاڭسىز ساۋدالانىپ كەتكەنى جايلى دا حابارلاعان ەدى. نەگىزى, ەلىمىزدە 5 جىلعا ۋاقىتشا تۇرۋعا عانا رۇقساتى بار ءۇندى ازاماتىنا جەر تەلىمى زاڭسىز ساتىلعان كورىنەدى. وسى اقپاراتتان كەيىن تابيعات قورعاۋ پروكۋرورلارى وزەن جاعالاۋىنا تەكسەرىستى باستادى. 14 سوتىق جەردى بەرۋ تۋرالى شەشىمگە 2012 جىلدىڭ تامىزىندا قالانىڭ ەكس-اكىمى اسقار كەرىموۆ قول قويعان. ال شەتەلدىك قوناق ول جەرگە قوناق ءۇي مەن مەيرامحانا كەشەنىن تۇرعىزۋ ءۇشىن قورشاۋعا العان ەكەن. ەندى اتالمىش جەر ۋچاسكەسى مەملەكەتكە قايتارىلۋى بەك مۇمكىن. اتىراۋ قالاسىنىڭ اكىمى سەرىك ايداربەكوۆ شاھاردىڭ الەۋمەتتىك-ەكونوميكالىق دامۋىنا ارنالعان بريفينگ بارىسىندا تەلەارنانىڭ ايماقتاعى ءتىلشىسى ساۋالىنا وسىلاي دەپ جاۋاپ بەرىپتى.
باقىتبەك كەنەش ۇلى.
دەرەككوز: «استانا» تەلەارناسى