قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ گۆينەيا رەسپۋبليكاسىنىڭ كوناكري قالاسىندا وتكەن يسلام ىنتىماقتاستىق ۇيىمى سىرتقى ىستەر مينيسترلەر كەڭەسىنىڭ (يىۇ سىمك) مەرەيتويلىق 40-سەسسياسى جۇمىسىنا قاتىستى. اتاپ وتەتىن جايت, قازاقستان 1995 جىلدىڭ جەلتوقسان ايىندا وسى قالادا وتكەن سىمك 23-سەسسياسىنىڭ بارىسىندا يىۇ-عا مۇشەلىككە قابىلدانعان بولاتىن.
قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ گۆينەيا رەسپۋبليكاسىنىڭ كوناكري قالاسىندا وتكەن يسلام ىنتىماقتاستىق ۇيىمى سىرتقى ىستەر مينيسترلەر كەڭەسىنىڭ (يىۇ سىمك) مەرەيتويلىق 40-سەسسياسى جۇمىسىنا قاتىستى. اتاپ وتەتىن جايت, قازاقستان 1995 جىلدىڭ جەلتوقسان ايىندا وسى قالادا وتكەن سىمك 23-سەسسياسىنىڭ بارىسىندا يىۇ-عا مۇشەلىككە قابىلدانعان بولاتىن.
سىمك سەسسياسىندا سويلەگەن سوزىندە ە.ىدىرىسوۆ قازاقستاننىڭ يسلام مەملەكەتتەرىنە قاتىستى ءمان بەرەتىن ماسەلەلەردىڭ ماڭىزىن اتاپ كورسەتە كەلىپ, قازاقستاننىڭ 2011-2012 جىلدارداعى ۇيىمعا توراعالىعى باتىس ەلدەرى مەن مۇسىلمان الەمى اراسىنداعى ۇنقاتىسۋعا جاڭا سەرپىن بەرگەنىن جانە يسلاموفوبيامەن, سونداي-اق, انتيسلامدىق ستەرەوتيپتەرمەن كۇرەسكە ءوزىنىڭ ۇلەسىن قوسقانىن ايتىپ ءوتتى.
يىۇ سىمك بارىسىنداعى تالقىلانعان شەشۋشى تاقىرىپتار پالەستينا-يزرايل جانجالىن رەتتەۋ بويىنشا حالىقارالىق كۇش-جىگەرلەر, سيرياداعى جاعداي, يراننىڭ يادرولىق باعدارلاماسى, اۋعانستانعا ىقپال ەتۋ, ماليدەگى احۋالدى قالىپقا ءتۇسىرۋ, ت.ب. كوكەيكەستى ماسەلەلەر بولدى. اتالعان تاقىرىپتار قازاقستان سىرتقى ساياسات ۆەدومستۆوسى باسشىسىنىڭ سوزىندە دە كورىنىس تاپتى: «بىرىنشىدەن, ءبىز يىۇ-نىڭ سيرياداعى قانتوگىستى توقتاتۋعا شاماسى كەلمەي وتىرعانىن قينالا وتىرىپ مويىنداۋعا ءتيىسپىز. ويتكەنى, وكىنىشكە قاراي, سيريانىڭ ۇيىمعا مۇشەلىگى توقتاتىلعان بولاتىن... ەكىنشىدەن, اۋعانستانداعى جاعداي يىۇ كۇن تارتىبىندەگى اسا ماڭىزدى پۋنكتتەردىڭ ءبىرى بولىپ قالۋى ءتيىس... ۇشىنشىدەن, ۋمما جانە بۇكىل الەم ءۇشىن يراننىڭ يادرولىق باعدارلاماسى باسىم ماسەلە بولىپ قالىپ وتىر. قازاقستان ءبىزدىڭ يراندىق باۋىرلاردى قوسا العاندا, كەز كەلگەن ەلدىڭ ءوزىنىڭ بەيبىت اتوم ونەركاسىبىن ەكونوميكالىق قاجەتتىلىگىن قاناعاتتاندىرۋ ءۇشىن دامىتۋعا قۇقى بار ەكەنىن اركەز مويىنداپ كەلەدى. وسىعان بايلانىستى ءبىز جەنەۆادا يران مەن حالىقارالىق كەلىسسوزگە قاتىسۋشى «التىلىق» اراسىنداعى يراننىڭ يادرولىق باعدارلاماسى بويىنشا قول جەتكىزىلگەن ۋاعدالاستىقتاردى قۇپتايمىز», دەپ مالىمدەدى ە.ىدىرىسوۆ. قازاقستاندىق ديپلومات, سونىمەن قاتار, يىۇ-عا قاتىسۋشى ەلدەردى قازاقستانعا ەكسپو-2017 كورمەسىن وتكىزۋ قۇقىنا يە بولۋ جولىنداعى كۇرەستە قولداۋ كورسەتكەندەرى ءۇشىن ريزاشىلىعىن جەتكىزە كەلىپ, قازاقستاننىڭ 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە تاپسىرىسىنا دا وسىنداي دەڭگەيدە قولداۋ كورسەتىلەتىنىنە سەنىمىن ءبىلدىردى.
شارا شەڭبەرىندە يسلام ىنتىماقتاستىق ۇيىمىنىڭ ازىق-ت ۇلىك قاۋىپسىزدىگى جونىندەگى جارعىسىنا قول قويۋ سالتاناتى ءوتتى. شتاب-پاتەرى استانادا ورنالاساتىن ۇيىمنىڭ اتالعان جارعىلىق قۇجاتىنا قازاقستان جاعىنان اۋىل شارۋاشىلىعى ءمينيسترىنىڭ ورىنباسارى ءمۇسلىم ومىرياەۆ قول قويدى. حالىقارالىق جارعىلىق قۇجاتتاردى كەلىسۋدە قالىپتاسقان ۇزاق مەرزىمدى پىكىرتالاستارعا قاراماستان, يىۇ-عا مۇشە مەملەكەتتەردىڭ كوپتەگەن سىرتقى ىستەر مينيسترلەرى سىمك سەسسياسى بارىسىندا جاڭا ۇيىمنىڭ قۇجاتىنا قول قويىپ, قازاقستان باستاماسىنا ءبىراۋىزدان قولداۋ كورسەتتى.
بۇل ۇيىمدى قۇرۋ جونىندە قازاقستان باسشىسى 2011 جىلى استانادا وتكەن يىۇ سىمك-ءنىڭ 38-سەسسياسى بارىسىندا باستاما كوتەرگەنى بەلگىلى. اتالعان باستاما قازاقستاننىڭ حالىقارالىق ازىق-ت ۇلىك حابىنا دايەكتىلىكپەن ترانسفورماتسيالانۋىن كوزدەيدى.
قازاقستان باسشىسىنىڭ بۇل باستاماسىنا گۆينەيا رەسپۋبليكاسىنىڭ پرەزيدەنتى الفا كوندە دە وڭ باعاسىن بەردى. سىمك دەلەگاتتارىنا قۇتتىقتاۋ ءسوز ارناعان گۆينەيا پرەزيدەنتى ازىق-ت ۇلىك قاۋىپسىزدىگىن قامتاماسىز ەتۋ ۇدەرىسىن ينستيتۋتتاندىرۋ جونىندەگى قازاقستاندىق ۇسىنىستىڭ كوكەيكەستىلىگىن اتاپ وتە كەلىپ, قازاقستاننىڭ جانە ەلباسى نۇرسۇلتان نازارباەۆتىڭ جەكە ءوزىنىڭ جاپپاي قىرىپ جوياتىن قارۋدى تاراتپاۋ ءجونىندەگى جاھاندىق ۇدەرىستەرگە قوسىپ وتىرعان ۇلەسىن جوعارى باعالادى.
كوناكري قالاسىندا بولعان كەزىندە ە.ىدىرىسوۆ گۆينەيا پرەزيدەنتى الفا كوندەمەن, وسى ەلدىڭ سىرتقى ىستەر ءمينيسترى ليۋسەن فالمەن جۇزدەسىپ, ماروككو, مالي, يران, برۋنەي, كامەرۋن, نيگەر, ماۆريتانيا, سومالي, ليۆيا, بۋركينا-فاسو, گامبيا, سەنەگال, الجير, سەررا-لەونە, كومور ارالدارى جانە تاعى باسقا ەلدەردى قوسا العاندا, يىۇ-عا مۇشە ەلدەر دەلەگاتسيالارىنىڭ باسشىلارىمەن بىرقاتار ەكىجاقتى كەزدەسۋلەر وتكىزدى. قازاقستان سىرتقى ساياسات ۆەدومستۆوسى باسشىسىنىڭ يىۇ-عا قاتىسۋشى ەلدەر سىرتقى ىستەر مينيسترلەرىمەن كەلىسسوزدەرىندە تومەندەگىدەي ماڭىزدى ماسەلەلەر: ساۋدا-ەكونوميكالىق بايلانىستار, قازاقستان بيزنەسىنىڭ جاڭا رىنوكتارعا شىعۋىنىڭ ءمۇمكىندىكتەرى, حالىقارالىق ۇيىمدارداعى ىنتىماقتاستىق, سونداي-اق, قازاقستاننىڭ 2017-2018 جىلداردا بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە كانديداتۋراسىن قولداۋ سياقتى ماسەلەلەر قاراستىرىلدى.
يىۇ سىمك-ءنىڭ ەكى كۇندىك سەسسياسى اياقتالعان سوڭ ە.ىدىرىسوۆ ەفيوپياعا اتتانىپ كەتتى. وندا ول وسى ەل باسشىلىعىمەن جانە شتاب-پاتەرى ەفيوپيا استاناسى – ادديس-ابەبا قالاسىندا ورنالاسقان افريكا وداعى باسشىلىعىمەن كەزدەسىپ, كەلىسسوزدەر جۇرگىزەتىن بولادى.
ساۋلەبەك ءبىرجان.