وزبەكستاندا بۋكمەكەرلىك قىزمەت زاڭداستىرىلدى. بۇل تۋرالى «حابار 24» حابارلادى.
قازىر ەل بيلىگى سالانى رەتتەيتىن ءتيىستى نورماتيۆتىك بازانى قۇرىپ جاتىر. بۋكمەكەرلەر ەل قازىناسى جىل سايىن 150 ملن اقش دوللارى كولەمىندە قوسىمشا كىرىس اكەلەدى دەپ سەنەدى الا تاقيالى اعايىن.
«بۋكمەكەرلىك قىزمەتتىڭ ەكونوميكالىق تيىمدىلىگى جوعارى» دەگەن ۋاجبەن وزبەك بيلىگى جىل باسىنان سپورتتىق شارالارعا اقشا تىگۋدى زاڭداستىردى. پرەزيدەنتتىڭ وسىعان قاتىستى ءتيىستى جارلىعى شىقتى. وعان سايكەس ويىن-ساۋىق ورىندارى تاپقان پايدانىڭ بەلگىلى مولشەرىن سپورتتىڭ دامۋىنا جۇمساۋى ءتيىس.
«بۋكمەكەرلىك كەڭسەلەر تاپقان پايدانىڭ ءبىر بولىگىن ءبىر توقساندا ءبىر رەت, الدە ءار ايدا, نە جارتى جىل سايىن سپورتتىڭ دامۋىنا ءبولۋى ءتيىس. يا بولماسا بۇل اقشانى سالىقپەن قوسا ەل قازىناسى سالادى. بۇعان قاتىستى ناقتى تەتىكتەر ازىرگە ويلاپ تابىلعان جوق. دەگەنمەن پايدا تابۋدىڭ مۇنداي امالى قازاقستاندا دا, رەسەيدە دە بار. ماسەلەن, رەسەيدىڭ زاڭىندا تابىستىڭ بەلگىلى ءبىر مولشەرىن سپورتتىڭ دامۋىنا جۇمساۋ مىندەتتى دەگەن تارماق بار», دەيدى وزبەكستان فۋتبول قاۋىمداستىعىنىڭ زاڭگەرى ديلشود ناركوبيلوۆ.
كورشى ەلدىڭ ويىنقۇمار ازاماتتارى قازىر كولەڭكەلى مەكەمەلەردە ويناپ ءجۇر. ءتىپتى سپورتتىق شارالارعا ءباس تىگۋ ءۇشىن شەتەل اساتىندار دا بارشىلىق. وسىلايشا وزبەكستاندىق ويىنشىلاردىڭ جىلىنا 150 ملن اقش دوللارى وزگە بۋكمەكەرلەردىڭ قالتاسىنا كەتىپ وتىر دەپ ناليدى بيلىكتەگىلەر.