«استانا وپەرا» تەاترىنىڭ بالەت ترۋپپاسى 16 قاڭتار كۇنى كورەرمەن نازارىنا رەسەيدىڭ حالىق ءارتىسى التىناي اسىلمۇراتوۆانىڭ جەتەكشىلىگىمەن عالامات گالا-بالەت ۇسىنادى. مازمۇندى باعدارلاما اياسىندا تەاتردىڭ ۇلكەن زالى ساحناسىندا بالەت سوليستەرى سەرىك ناقىسپەكوۆ پەن دالەر زاپاروۆ ماريۋس پەتيپانىڭ حورەوگرافياسىنداعى ر.دريگونىڭ «تاليسمان» بالەتىنەن پا-دە-دە جانە ە.دەلدەۆەز, ل.مينكۋستىڭ «پاحيتا» بالەتىنەن گران-پا ءنومىرىن ورىندايدى.
– ر.دريگونىڭ «تاليسمان» بالەتىنەن پا-دە-دە الەم بويىنشا بالەتسۇيەر قاۋىم اراسىندا ۇلكەن اتاققا يە بولدى. ول بارلىق حالىقارالىق بالەت بايقاۋلارىنىڭ باعدارلاماسىنا جانە كوپتەگەن الەمدىك بالەت ترۋپپالارىنىڭ رەپەرتۋارىنا ەنگەن. وسىناۋ ءنومىردىڭ تاماشا سيۋجەتى بويىنشا الدىمىزدا ەجەلگى ءۇندىستاننىڭ تىلسىم الەمى اشىلادى. مەنىڭ ورىنداۋىمداعى جەل قۇدايى ۆايۋ اسپان رۋحتارى ءامىرشىسىنىڭ قىزى نيريتيمەن بىرگە بيلەيدى. م.پەتيپا مەن پ.گۋسەۆتىڭ حورەوگرافياسى ايرىقشا شەبەرلىگىمەن ءارى مانەرلىگىمەن وزگەشەلەنەدى. ءبىزدىڭ ورىنداۋىمىزداعى وسى كلاسسيكالىق جاۋھاردىڭ ينتەرپرەتاتسياسى ەلوردالىق كورەرمەننىڭ كوڭىلىنەن شىعادى دەگەن ۇمىتتەمىن, – دەپ وي ءبولىستى سەرىك ناقىسپەكوۆ.
ال تەاتردىڭ تالانتتى ءسوليسى دالەر زاپاروۆ بولسا بۇل كۇنى ە.دەلدەۆەز, ل.مينكۋستىڭ «پاحيتا» بالەتىنەن گران-پامەن دەبيۋت جاسايدى. سونىمەن بىرگە جاس بالەت ارتىستەرى سوفيا ءادىلحانوۆا, نۇراي نۇرسافينا, ەۆگەني رىبكين, دياس قۇرمانعازى, رۋستام چاحالوۆ وسى نومىردە العاش رەت ساحنا تورىنە شىعادى. دالەر زاپاروۆپەن جۇپتاسىپ تەاتردىڭ جەتەكشى ءسوليسى, قازاقستاننىڭ ەڭبەك سىڭىرگەن قايراتكەرى انەل رۇستەموۆا ونەر كورسەتەدى. ءساندى دە مەرەكەلىك گران-پا بالەت كەيىپكەرلەرىنىڭ سالتاناتتى ۇيلەنۋ تويىن بي تىلىندە بايان ەتەدى. ول بولشەكتەردىڭ مولدىعى, ناقىش, يسپاندىق تەمپەرامەنت جانە ۆارياتسيالاردىڭ سان الۋاندىعىمەن وزگەشەلەنەدى.
– مەنىڭ پىكىرىمشە, مەيلى العاشقى, پرەمەرالىق ورىنداۋ نەمەسە رەپەرتۋارلىق سپەكتاكل بولسىن, ارقاشان بارلىق ونەر كورسەتۋلەر وزىنشە ەرەكشە. قاي پارتيا بولسىن, ساحناعا شىققان سايىن ءارتىس رەتىندە ورىندالاتىن بەينەنىڭ جاڭا قىرلارىن, تىڭ دۇنيەلەر اشامىن. دەسە دە اتالعان گالا-بالەتتە ساحناعا شىعۋ مەن ءۇشىن وتە ماڭىزدى, سوندىقتان ەموتسيونالدىق جاعىنان كۇش-قۋاتىم ارتىپ, جاڭا جىلدى سۇيىكتى ساحنامدا جاقسىلىقپەن باستاۋعا قۇشتارلىعىم زور, – دەپ ءوز اسەرىن جەتكىزدى دالەر زاپاروۆ.
ەكى بولىمنەن تۇراتىن الۋان ءتۇرلى باعدارلاماعا تەاتر رەپەرتۋارىنداعى كلاسسيكالىق, نەوكلاسسيكالىق جانە زاماناۋي قويىلىمداردان ۇزىندىلەر ەندى. اتاپ ايتساق, ج.كوراللي مەن ج.پەررونىڭ حورەوگرافياسىنداعى ا.اداننىڭ «جيزەل» بالەتىنەن پا-دە-دە, ل.مينكۋستىڭ «بايادەركا» بالەتىنەن ءۇندى ءبيى, م.پەتيپانىڭ حورەوگرافياسىنداعى پ.چايكوۆسكيدىڭ «اققۋ كولى» بالەتىنەن پا-دە-دە جانە ت.ب. سونداي-اق بۇل كەشتە پاتريك دە بانانىڭ حورەوگرافياسىنداعى «دالا ءۇنى» بالەتىنەن دۋەت ورىندالاتىن بولادى. ەسكە سالار بولساق, وسىناۋ ۇلتتىق بالەتتىڭ الەمدىك پرەمەراسى مادەنيەت جانە سپورت مينيسترلىگىنىڭ قولداۋىمەن جەلتوقسان ايىندا ەلوردالىق كورەرمەنگە زور جەتىستىكپەن ۇسىنىلعان ەدى.
كلاسسيكالىق بي ونەرى ەلوردا تۇرعىندارى مەن قوناقتارىنا «استانا وپەرا» تەاترىنىڭ جەتەكشى سوليستەرى, قازاقستاننىڭ ەڭبەك سىڭىرگەن قايراتكەرلەرى ايگەرىم بەكەتاەۆا مەن ەركىن راحماتۋللاەۆ, ولجاس تارلانوۆ, بالەت ترۋپپاسىنىڭ ءسوليسى اناستاسيا زاكلينسكايا, بالەت ارتىستەرى ماريكو كيتامۋرا, ءمولدىر شاكىموۆا, ادەلينا تولەپوۆا, جانىبەك احمەديەۆ, جانسەرىك احمەتوۆ, بوستان قوجابەكوۆتىڭ ورىنداۋىندا ۇسىنىلاتىن بولادى. «استانا وپەرا» سيمفونيالىق وركەسترى ديريجەر ارمان ورازعاليەۆتىڭ جەتەكشىلىگىمەن ونەر كورسەتەدى.