قاراعاندى وبلىسىندا جاڭا جىلدىڭ اۋىل حالقى ءۇشىن جاعىمدى جاڭالىقتارىمەن ەرەكشەلەنەتىن ءتۇرى بار. مىسالى, وڭىردە «اۋىل – ەل بەسىگى» اتتى مەملەكەتتىك باعدارلاما بيىل دا جالعاسىن تاۋىپ, اۋىلدىق جەرلەردى دامىتۋ بويىنشا تىڭ جوبالار قولعا الىنباقشى, دەپ حابارلايدى Egemen.kz. وبلىس اكىمىنىڭ ءباسپاسوز قىزمەتىنە سىلتەمە جاساپ.
اتالعان باعدارلاما 2027 جىلعا دەيىن ەسەپتەلىپ, وبلىستىڭ بارلىق تىرەك جانە سەرىكتەس اۋىلدارىن قامتيتىن بولادى. وڭىردەگى وساكاروۆ, اباي, اقتوعاي, بۇقار جىراۋ, قارقارالى, نۇرا جانە شەت اۋداندارىنداعى 11 ەلدى مەكەندە الەۋمەتتىك, قۇرىلىس جانە تۇرعىن ءۇي-كوممۋنالدىق سالالار بويىنشا 19 جوبانى جۇزەگە اسىرۋ جوسپارلانعان.
ناقتىراق ايتار بولساق, ەگىندىبۇلاق كەنتى تۇرعىندارىنىڭ وبلىس اكىمىنە بىرنەشە مارتە جولداعان ءوتىنىشى قاناعاتتاندىرىلىپ, بۇرىن اۋدان ورتالىعى بولعان بۇل ەلدى مەكەندە دەنە شىنىقتىرۋ-ساۋىقتىرۋ كەشەنى بوي كوتەرمەكشى. سونداي-اق نۇرا اۋدانىنداعى كەرتىندى اۋىلىندا فەلدشەرلىك-اكۋشەرلىك پۋنكت سالۋ دا جوسپاردا بار.
شەت اۋدانىنداعى اقادىر كەنتىندە 3,8 شاقىرىم بولاتىن كارىز جەلىلەرىنىڭ قۇرىلىسىنا جانە ولارعا قىزمەت كورسەتۋگە, سونداي-اق بەس شاقىرىمدىق سۋ قۇبىرىنىڭ رەزەرۆتىك جەلىسىنىڭ تارتىلۋىنا قوماقتى قارجى بولىنەدى. سونىمەن قاتار وساكاروۆ اۋدانىنداعى مولودەجنىي كەنتى مەن اقبۇلاق اۋىلىندا جەتى جوبا بويىنشا, اتاپ ايتقاندا, بىرنەشە مەكتەپ پەن اۋىل جولدارىن جوندەۋ جۇمىستارى ىسكە اسىرىلماقشى. جول دەمەكشى, جالپى «اۋىل – ەل بەسىگى» باعدارلاماسى اياسىندا وبلىستىڭ ءۇش اۋدانىندا 35 شاقىرىم بولاتىن اۋىلىشىلىك جولدار جوندەۋدەن وتەدى.
قاراعاندى وبلىسىنىڭ اكىمى جەڭىس قاسىمبەك بۇل باعدارلاما اياسىنداعى جۇمىستار وڭىردەگى بارلىق اۋدانداردى قامتۋى ءتيىس دەپ سانايدى.
– بۇل جوبانىڭ ارقاسىندا ەلدى مەكەندەردىڭ ينفراقۇرىلىمى جاقسارىپ, تىرەك جانە سەرىكتەس اۋىلداردا تۇراتىن تۇرعىنداردىڭ كاسىپكەرلىك بەلسەندىلىگى ارتىپ, تۇراقتى جۇمىس ورىندارىن قۇرۋدى قامتاماسىز ەتەتىنىن كورىپ وتىرمىز, – دەيدى ءوڭىر باسشىسى.
ەسكە سالار بولساق, وتكەن جىلى «اۋىل – ەل بەسىگى» مەملەكەتتىك باعدارلاماسىن قارجىلاندىرۋ ءتورت ەسەدەن استام ۇلعايىپ, سونىڭ ناتيجەسىندە 47 جوبا بويىنشا اۋقىمدى جۇمىس جۇرگىزىلدى. اتاپ ايتقاندا, جالپى ءبىلىم بەرەتىن توعىز مەكتەپ پەن ءبىر سپورت مەكتەبى جوندەۋدەن ءوتتى. ەكى اۋداندىق اۋرۋحانا مەن دارىگەرلىك امبۋلاتوريا عيماراتىنا جوندەۋ جۇمىستارى جۇرگىزىلدى. بۇدان بولەك, اۋىلدىق جەرلەردەگى 25 شاقىرىم سۋ قۇبىرى جەلىلەرى قايتا جاڭارتىلىپ, 70 شاقىرىم بولاتىن كەنتىشىلىك جولدارعا جوندەلدى.