تۇركىستان قالاسىنداعى «حالىقتى جۇمىسپەن قامتۋ ورتالىعىندا» بۇعان دەيىن ۇزىن-سونار كەزەكتەن كوز سۇرىنەتىن. ورتالىق قىزمەتكەرلەرى دە, قىزمەت الۋعا كەلگەن حالىق تا جۇيكەلەرى شارشاپ, نارازى كەيىپپەن ءبىر-بىرىنە شاعىم ايتىپ جاتاتىن. ەندى ورتالىق تولىقتاي روبوت-بەينەكامەرالاردىڭ باقىلاۋىنا كوشكەن سوڭ ونىڭ كەڭ زالى قۇلاققا ۇرعانداي تىپ-تىنىش. كەزەك اتىمەن جوق. سەرۆيس قىزمەتكەرلەرى دە, تۇتىنۋشىلار دا ءبىر-بىرىمەن سىبىرلاسا سويلەسەدى. سەبەبى, ءسىزدى وسىنداعى ءار قىزمەتكەردىڭ الدىندا تۇرعان 18 كامەرا باقىلاپ وتىر. بۇل سىبايلاس جەمقورلىقتى, قىزمەت الۋشى مەن قىزمەت بەرۋشى اراسىنداعى جەڭ ۇشىنان جالعاسۋدى جويۋ ماقساتىندا اتقارىلىپ وتىرعان وڭدى شارا.
بايقاپ وتىرمىز, 15 مينۋتقا جەتپەي تۇتىنۋشى شارۋاسىن ءبىتىرىپ كەتىپ جاتىر. وسىنىڭ بارلىعىن باقىلاپ, قاداعالاپ وتىرعان – مەنەدجەردىڭ الدىنداعى جۇدىرىقتاي كامەرا. «اقىلدى» كامەرا ەكى جاقتىڭ دا بەينەاڭگىمەسىن ورتاق سەرۆەرگە تاسپالاپ جازىپ الۋدا. ءتىپتى, مۇنى سىزبەن ەرە كەلگەن تۋىسىڭىز http://www.turkistan2020.kz سايتى ارقىلى سول جەردە وتىرىپ-اق ءوز سمارتفونىنان تىكەلەي باقىلاي الادى.
قوسىلعانىنا 20 كۇننەن ەندى عانا اسقان جۇيەدە بۇگىنگە دەيىن 10 207 ءوتىنىش قابىلدانىپ, ونىڭ 10 141-ءى وڭ شەشىمىن تاۋىپتى. قالعان 66 ءوتىنىم بويىنشا ءتيىستى جۇمىستار جۇرگىزىلۋدە.
ءبىر قىزىعى, مۇندا مەنەدجەر قىزمەتى باقىلانىپ قانا قويماي, سيگنالدى داۋىس جازۋ قۇرىلعىسى ارقىلى مامانداردىڭ ءىس-ارەكەتىنە ءتيىستى ء«تارتىپ» ەنگىزىلىپ وتىرادى ەكەن. ماسەلەن, تۇتىنۋشى الدەبىر مەنەدجەردىڭ الدىندا 15 مينۋتتان ۇزاقتاۋ وتىرىپ قالسا, نە بولماسا قىزمەت كورسەتۋشى 15 مينۋتتان ارتىق جۇمىس ۇستەلىندە بولماي قالسا, بەينەكامەرا سيگنال بەرىپ, مەنەدجەر دەرەۋ باسقا قىزمەتكەرمەن الماستىرىلادى. ءتىپتى, كامەرا مەنەدجەردىڭ شارشاڭقى كوڭىل-كۇيىن دە «سەزىپ» وتىرادى ەكەن.
«قازىر ءبىر اي بويى وسىندا كەلگەن قىزمەت الۋشىلاردىڭ سانىن تىركەپ, «تۇتىنۋشى لەگى» ساراپتاما مونيتورينگىن جۇرگىزىپ جاتىرمىز, – دەيدى تۇركىستان قالالىق اكىمى اپپاراتىنىڭ جەتەكشىسى. – ەگەر قىزمەت الۋشىلار سانى ارتا باستاسا قوسىمشا قىزمەتكەرلەردى جۇمىسقا جۇمىلدىرۋ مەحانيزمى قاراستىرىلعان. سول سياقتى تۇتىنۋشىلار ازايا باستاسا, قىزمەتكەرلەر سانىن قىسقارتۋ ويلاستىرىلعان. بۇل كادرلىق شەشىم قابىلداۋعا وڭتايلى جۇيە بولعالى وتىر».
جاڭا تسيفرلىق جۇيە ورتالىققا كەلۋشى سانىن ساناۋ اناليتيكاسى, ءبىر جەردە كوپ شوعىرلانعان ادامداردى ىزدەۋ اناليتيكاسى, ۇمىتىلعان زاتتاردى تابۋ اناليتيكاسى, ءار قىزمەتكەردىڭ جۇمىس تيىمدىلىگىن ساناۋ اناليتيكاسى جانە كەزەك دەتەكتورى مەن سابوتاج دەتەكتورى سياقتى بىرنەشە قىزمەت تۇرلەرىن ءبىر ورتالىققا بىرىكتىرىپ وتىر.
ءبىر قىزىعى, وسى مالىمەتتەردىڭ بارلىعى تۇركىستان قالاسى بويىنشا «109» بىرىڭعاي بايلانىس ورتالىعىنىڭ تەلەگرامم-بوتىندا حابارلاما تۇرىندە تىركەلىپ, ورتالىق ساراپشىلارى تاراپىنان تۇراقتى قاداعالانىپ وتىرادى. مۇنىڭ ءوزى, ءبىر ەسەپتەن, اكىمشىلىك بولىمدەرىنىڭ, اكىم ورىنباسالارلارىنىڭ, اكىمنىڭ ءوزىنىڭ قىزمەت رەيتينگىن ساراپتاپ وتىرۋعا مۇمكىندىك بەرەتىن جاقسى ءبىر جۇيە.
قالا اكىمى راشيد ابات ۇلى الداعى ۋاقىتتا بۇل جۇيەنى بۇگىنگە دەيىن 60 مىڭنان استام قولدانۋشىنى جيناپ ۇلگەرگەن «Amazing Turkistan» انىقتامالىق ءموبيلدى قوسىمشاسىنا بىرىكتىرىپ, تۋريستەر ءۇشىن دە قولايلى ءبىر تسيفرلىق مۇمكىندىكتەردىڭ بولۋى قاراستىرىلىپ جاتقانىن ايتادى.
پرەزيدەنتىمىز ق. توقاەۆ تاپسىرعانداي, «حالىق ۇنىنە قۇلاق اساتىن مەملەكەت» تۇجىرىمداماسى اياسىندا اتقارىلىپ جاتقان تۇركىستان قالاسىنداعى «اشىق اكىمدىك» جۇيەسى, مىنە, وسىنداي.
بەكجىگىت سەردالى,
جۋرناليست
تۇركىستان قالاسى