2020 جىلدىڭ 12 ايىنىڭ قورىتىندىسى بويىنشا فارماتسەۆتيكا ونەركاسىبىندەگى ءوندىرىس كولەمى 47%-عا ءوستى. بۇعان وتاندىق كاسىپورىنداردا شىعارىلاتىن ءونىم كولەمىنىڭ ۇلعايۋى سەبەپ بولدى, دەپ حابارلايدى Egemen.kz.
مىسالى, «حيمفارم» اق شىعاراتىن ءونىم كولەمىن 2 ەسەگە ارتتىردى. بۇدان بولەك, كومپانيا سوڭعى 2 جىلدا ەكسپورت كولەمىن 2,5 ەسەگە ارتتىردى. بۇگىنگى تاڭدا كاسىپورىننىڭ دارىلىك زاتتارى ورتالىق ازيا جانە ەاەو نارىقتارىندا كەڭىنەن سۇرانىسقا يە. ونىمدەر تاجىكستان, تۇرىكمەنستان, موڭعوليا, رەسەي جانە قىرعىزستان سياقتى ەلدەرگە ەكسپورتتالادى.
سونىمەن قاتار بيىل وزبەكستان نارىعىن يگەرە وتىرىپ, ەكسپورتتى ەكى ەسەگە ارتتىرۋ جوسپارلانعان. بۇدان بولەك, ماڭىزدى باستامالاردىڭ ءبىرى ەۋروپالىق وداقتىڭ دارىلىك نارىعىنا شىعۋ كوزدەلگەن. وسىلايشا, 2023 جىلعا قاراي ەكسپورت كولەمىن 4 ەسەگە, ياعني 16 ملرد. تەڭگەگە دەيىن ۇلعايتۋ جوسپارلانىپ وتىر.
بۇگىندە كاسىپورىننىڭ 11 وندىرىستىك جەلىدە وندىرىلەتىن 9 ءتۇرلى نىسانداعى 120-دان استام دارىلىك زاتتاردىڭ اتاۋلارى بار, ال بۇل وتاندىق ءوندىرۋشىنىڭ وننان استام ەمدىك توپتاردا ۇسىنىلعانىنىڭ كورسەتكىشى بولىپ تابىلادى.
سونداي-اق Dolce-Pharm فارماتسەۆتيكالىق كومپانياسى دا جوعارى كورسەتكىشتەرگە قول جەتكىزدى. كاسىپورىن شىعارىلاتىن ءونىم كولەمىن 5 ەسەگە ارتتىردى. كاسىپورىن 1998 جىلى قۇرىلدى جانە 23 جىل ىشىندە ءبىر رەت قولدانىلاتىن ممب ءوندىرۋ سالاسىندا ۇلتتىق كوشباسشى اتاندى. بۇگىندە كومپانيا ءتۇرلى مەديتسينالىق ونىمدەردىڭ 200-گە جۋىق ءتۇرىن شىعارادى. وندىرىستىك كەشەن الماتى وبلىسىندا, ىنتىماق اۋىلىندا ورنالاسقان, وندا 450 ادام ەڭبەك ەتەدى. زاۋىتتا 6 وندىرىستىك تسەح بار.
وتكەن جىلدىڭ قورىتىندىسى بويىنشا «ابدي يبراگيم گلوبال فارم» جشس شىعارىلاتىن ءونىم كولەمىن 3% - عا ۇلعايتتى. قازىرگى ۋاقىتتا كومپانيانىڭ نەگىزگى ماقساتى قازاقستاننىڭ فارماتسەۆتيكالىق سالاسىن ودان ءارى دامىتۋ جانە يننوۆاتسيالىق ءونىمدى ساتۋ مەن جان-جاقتى ماركەتينگتى قالىپتاستىرۋ ارقىلى تمد ەلدەرى اراسىندا دارىلىك زاتتاردىڭ ەكسپورتى بويىنشا جەتەكشى ورىن الۋ بولىپ تابىلادى.
سونىمەن قاتار ءوسىم «سق-فارماتسيا» بىرىڭعاي ديستريبيۋتورى ارقىلى تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە دارىلىك زاتتاردى جەتكىزۋدىڭ ۇلعايۋىمەن, سونداي-اق كوروناۆيرۋستىق پاندەمياعا بايلانىستى دارىلىك زاتتار مەن مەديتسينالىق بۇيىمدارعا حالىقتىڭ جوعارى سۇرانىسىنا بايلانىستى بولشەك ساۋدادا وتكىزۋدىڭ ۇلعايۋىمەن قامتاماسىز ەتىلدى.
ەستەرىڭىزگە سالا كەتەيىك, وتكەن جىلدىڭ قازان ايىندا فارماتسەۆتيكالىق ونەركاسىپتى دامىتۋدىڭ 2020-2025 جىلدارعا ارنالعان كەشەندى جوسپارى بەكىتىلدى, ول 54 ءىس-شارا مەن 8 بولىمنەن تۇرادى.