ەلىمىزدەگى كوللەدجدەردىڭ ءبىلىم بەرۋ قىزمەتىنە قاتىستى جۇرگىزىلگەن مونيتورينگ قورىتىندىسى بويىنشا قر بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتى 196 كوللەدجدەن 500 ماماندىق پەن 738 بىلىكتىلىك بويىنشا ليتسەنزياعا قوسىمشالارىن قايتارىپ الدى, دەپ حابارلايدى Egemen.kz.
كوللەدجدەر بەلگىلى ءبىر ماماندىقتار بويىنشا ستۋدەنتتەردى وقىتقانىمەن, بەيىنى مەن ءبىلىم بەرۋ قىزمەتىنە قويىلاتىن بىلىكتىلىك تالاپتارىنا سايكەس بولماي شىقتى. وسىعان بايلانىستى بعم تاراپىنان ليتسەنزيالاردى قايتارۋ جۇمىستارى جۇرگىزىلدى.
ءبىلىم بەرۋ باعدارلامالارىنىڭ ساپاسى, پەداگوگيكالىق جانە وقىتۋشىلار قۇرامىنىڭ جەتكىلىكسىزدىگى, وقۋ ءۇردىسىن جۇزەگە اسىرۋ ءۇشىن قاجەت ماتەريالدىق-تەحنيكالىق بازانىڭ جانە وقۋ-زەرتحانالىق جابدىقتاردىڭ بولماۋى سىندى بۇزۋشىلىقتار دا ورىن العان.
بۇل كوللەدجدەردىڭ ستۋدەنتتەرى باسقا وقۋ ورىندارىنا اۋىستىرىلىپ, وقىتۋشىلار جۇمىسقا ورنالاستىرىلدى.
ء«بىز وسى باعىتتاعى جۇمىستى جوعارى وقۋ ورىندارىندا دا, كوللەدجدەردە دە جۇرگىزىپ جاتىرمىز. مەملەكەت باسشىسى ءبىلىم بەرۋ ساپاسىن ارتتىرۋ بويىنشا تاپسىرما بەرگەن بولاتىن. شىن مانىندە, ەلىمىزدە ساپالى ءبىلىم بەرەتىن كوللەدجدەر كوپ, بىراق ءبارى بىردەي ەمەس. وسى ورايدا جۇيەلى جۇمىس جۇرگىزىلىپ جاتىر, دەگەنمەن قاتاڭ شارالار دا قابىلدانادى. ەگەر مەديتسينالىق كوللەدج قارجىگەرلەردى, بۋحگالتەرلەر مەن پروگراميستەردى, ال اگروتەحنيكالىق كوللەدج – مەكتەپكە دەيىنگى ۇيىمداردىڭ تاربيەشىلەرىن, قۇرىلىس كوللەدجى – دەنە شىنىقتىرۋ مۇعالىمدەرىن جانە ت.ب. باعىتتار بويىنشا مامانداردى دايارلاسا, ساپالى ءبىلىم بەرۋ تۋرالى قالاي ايتۋعا بولادى؟ ءتىپتى بۇل وقۋ ورىندارىنىڭ قاجەت بازاسى, ءتيىستى كادرلارى مەن وقۋ ۇردىسىنە قاجەت جابدىقتارى دا جوق بولعانىن ايتا كەتكەن ءجون», – دەدى قر بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.