پارلامەنت ءماجىلىسى مەن ءماسليحات دەپۋتاتتارىن سايلاۋ ناۋقانى تۇستەن كەيىن قىزا ءتۇستى, دەپ حابارلايدى Egemen.kz
ماسەلەن, تاڭعى 7.00 مەن 13.00 ساعات ارالىعىندا الماتى وبلىسىنداعى سايلاۋشىلاردىڭ 30 پايىزى داۋىس بەرسە, ءتۇس اۋا بۇل كورسەتكىش 60 پايىزعا جەتكەن.
تۇسكە دەيىن سايلاۋشىلاردىڭ اراسىندا جاستار بەلسەندى بولسا, قازىر ورتا جاستاعى تۇرعىندار داۋىس بەرۋ ءۇشىن ۋچاسكەلەرگە كەلىپ جاتىر. ولاردىڭ قاتارىندا ۇيدەن داۋىس بەرگەن سوعىس جانە ەڭبەك ارداگەرلەرى دە بار.
ماسەلەن, اقسۋ اۋدانىندا تۇراتىن گاۆريل مويسەەۆ سول قاتاردان. ءبىر عاسىرعا جۋىق جاساعان قارت ايماقتاعى ساناۋلى سوعىس ارداگەرى رەتىندە ەل قۇرمەتىنە بولەنگەن. بۇگىن گاۆريل ستەپانوۆيچ تۇرعىلىقتى مەكەن جايى بويىنشا ۇيىنەن داۋىس بەردى. جالپى, اۋداندىق سايلاۋ كوميسسياسىنا ۇيدەن داۋىس بەرۋگە 86 ءوتىنىش كەلىپ تۇسكەن. وسى ساتكە دەيىن 24 609 ادام داۋىس بەرىپ ۇلگەردى.
سونداي-اق, پانفيلوۆ اۋدانىندا تۇراتىن ەڭبەك ارداگەرى, 101 جاستاعى اجە ناعيمان شالاباەۆا دا ءوز ۇيىندە داۋىس بەردى. 12 بالانى تاربيەلەپ, وسىرگەن كەيۋانا بۇگىنگى كۇنگە دەيىن قانشا رەت داۋىس بەرگەنىن بىلمەسە دە, ارقاشان ساياسي ناۋقاننان ەش قالعان ەمەس. جانە وسى وڭىردەگى ەڭبەك ارداگەرى, سوتسياليستىك ەڭبەك ەرى كۇلاش ايتجانوۆا اپا دا زاڭدى تاڭداۋ قۇقىعىن ۇيىندە جاسادى.
«بيىل ەرەكشە جىل بولدى. سايلاۋ كەزىندە كوپپەن بولۋشى ەدىم. ەندى ۇيدەن شىقپاي داۋىس بەردىم. ءار ازامات مىندەتتى تۇردە داۋىس بەرۋى كەرەك. بۇل ەلىمىزدىڭ بولاشاعىن تاڭداۋعا بەرىلگەن مۇمكىندىك», دەيدى ەڭبەك ەرى.