جەتىسۋ جاستارى داۋىس بەرۋگە بەلسەندى قاتىسۋدا

ايتپاقشى, بۇل جولعى ساياسي شارادا وبلىس جاستارى الدىڭعى لەكتەن كورىندى. اسىرەسە كامەلەت جاسىنا ەندى تولعان بوزبالا مەن بويجەتكەندەر ءۇشىن سايلاۋدا داۋىس بەرۋ ءارى قىزىقتى,  ءارى جاۋاپتى مىندەت بولعانى انىق.  ماسەلەن, ءۇشارال قالاسىنداعى الاكول گۋمانيتارلىق-تەحنيكالىق كوللەدجىندە ورنالاسقان №49 سايلاۋ ۋچاسكەسىنىڭ تابالدىرىعىن اتتاعان جاس سايلاۋشى اسىلان ماحانوۆ داۋىس بەرەتىن كۇندى اسىعا كۇتىپ ءجۇرىپتى. ول ءوزى العاش رەت تاڭداۋ جاساعان پارتيا ەل بولشاعى ءۇشىن قىزمەت ەتەتىن زاڭداردىڭ قابىلداۋىنا كۇش سالادى دەگەن سەنىمدە.

- بولاشاق جاستاردىڭ قولىندا دەيمىز. سوندىقتان دا مەملەكەتىمىزدىڭ مىزعىماس ىرگەتاسىن قالاۋعا ءار قاتارلاسىم ءوز ۇلەسىن قوسۋى ءتيىس دەپ سانايمىن. بۇگىنگى سايلاۋ سونداي مۇمكىندىكتىڭ ءبىرى. سەبەبى, ءبىز ءوز داۋىسىمىز ارقىلى ەرتەڭگى كۇنگە جول قالاپ, باعىتىمىزدى ايقىنداۋعا سەپتىگىمىزدى تيگىزبەكپىز. ال مۇنداي تاعدىرشەشتى ساتتە ورتاق ىستەن شەت قالۋ ازاماتتىعىمىزعا سىن دەپ بىلەمىن. ويتكەنى, بۇگىنگى ءبىزدىڭ كىشكەنتاي قادامىمىز بولاشاقتاعى ۇلكەن جەتىستىكتەردىڭ باستاۋى بولماق. ءبىر قۋانتارلىعى, سايلاۋعا حالىق كوپتەپ قاتىسۋدا. ءوزىم داۋىس بەرگەننەن كەيىن دە سىرتتاي باقىلاپ تۇردىم. جاستار دا, قاريالار دا كەلىپ تاڭداۋلارىن جاساۋدا. ەڭ كوبى ورتا بۋىنداعى تۇرعىندار. وسى رەتتە جاستاردىڭ دا تاڭداۋ جاساۋعا دەگەن ىقىلاسى ارتا تۇسسە دەگەن نيەتتەمىن, - دەيدى الاكولدىك جاس سايلاۋشى, حالىقارالىق اقپاراتتىق تەحنولوگيالار ۋنيۆەرسيتەتى جۋرناليستيكا ماماندىعىنىڭ ستۋدەنتى اسىلان ماحانوۆ.

سونداي-اق تەكەلى قالاسىنداعى №1035 سايلاۋ ۋچاسكەسىندە ارايلىم دادانبەكوۆا دا العاش رەت سايلاۋعا قاتىسىپ, ءوز تاڭداۋىن جاسادى. ارايلىمنىڭ جاسى ون سەگىزدە ەكەن. ول تەكەلى قالاسىندا تۋىپ وسكەن, قازىر الماتىداعى تۇران ۋنيۆەرسيتەتىندە جۋرناليستيكا ماماندىعى بويىنشا ءبىلىم الۋدا.

- بۇگىن مەن ءۇشىن ماڭىزدى ءارى قۋانىشتى كۇن. العاش رەت ءماجىلىس جانە بارلىق دەڭگەيدەگى ءماسليحات دەپۋتاتتارىن كەزەكتى سايلاۋىنا قاتىسىپ, ءوز داۋىسىمدى بەردىم. بۇل مەنىڭ ازاماتتىق بورىشىم دەپ سانايمىن, - دەپ ءوزىنىڭ جۇرەكجاردى تىلەگىن جەتكىزدى ارايلىم.

ال جامبىل اۋدانىنداعى قاراقىستاق اۋىلىنىڭ تۇرعىنى دانا مەدەرحان سايلاۋ ۋچاسكەسىنە العاشقىلاردىڭ ءبىرى بولىپ كەلدى. دانا جاۇىندا عانا ون سەگىز جاسقا بولعان ەكەن. ياعن, بۇل ونىڭ العاشقى قاتىسقان ساياسي ناۋقانى.

- مەن تاۋەلسىز ەلىمىزدىڭ ەرتەڭى ءۇشىن داۋىس بەرۋگە كەلدىم. بۇل مەنىڭ العاشقى رەت سايلاۋعا قاتىسۋىم. بۇل سايلاۋ ماعان وتان الدىنداعى جاۋاپتى مىندەتىمدى سەزىندىردى, دەيدى دانا مەدەرحان.

بيىلعى سايلاۋداعى جاستاردىڭ بەلسەندىلىگىن شاراعا باقىلاۋشى بولىپ قاتىسقان جۋرناليست لينا كالەمحان دا بايقاعان ەكەن. ول تالدىقورعان قالاسىنا قاراستى مويناق اۋىلىنداعى سايلاۋ ۋچاسكەسىنە «جاستار ءۇنى» قوعامدىق بىرلەستىگىنىڭ اتىنان تاۋەلسىز باقىلاۋشى رەتىندە  قاتىستى.

- سايلاۋ ۋچاسكەسى ءوز ۋاقىتىندا اشىلىپ, جۇمىسىن بەكىتىلگەن ءتارتىپ بويىنشا باستادى. بۇل سايلاۋ ۋچاسكەسىنە 713 ازامات تىركەلىپ, 19 ادام ۇيدە داۋىس بەرۋگە ءوتىنىش بىلدىرگەن. شارا بارىسىندا ەشقانداي زاڭبۇزۋشىلىقتار تىركەلمەدى, تۇرعىندار قارقىندى تۇردە ءوز تاڭداۋىن جاسادى. اسىرەسە جاستاردىڭ سايلاۋعا قاتىسۋى ىنتاسى جوعارى بولدى, دەيدى لينا كالىمحان.