بۇگىن, ياعني 10 قاڭتار پارلامەنت ءماجىلىسىنىڭ جانە ءتۇرلى دەڭگەيدەگى ءماسليحاتتاردىڭ دەپۋتاتتارىن سايلاۋ كۇنى. ەلىمىزدىڭ ءاربىر ازاماتى ءوز تاڭداۋىن جاساۋعا قۇقىلى. بۇل رەتتە سايلاۋشىلار ءۇشىن بارلىق مۇمكىندىكتەر قاراستىرىلعان. ماسەلەن, تاراز قالاسى بويىنشا جالپى سانى 125 سايلاۋ ۋچاسكەسى بەلگىلەنگەن, دەپ حابارلايدى Egemen.kz
وبلىس ورتالىعىنداعى سايلاۋشىلار سانى 255 مىڭنان اسادى. تاراز قالاسى اكىمدىگىنىڭ مالىمەتىنشە, قازىرگى تاڭدا بارلىق سايلاۋ ۋچاسكەلەرى ساياسي ناۋقانعا ساقاداي-ساي. ۋچاسكەلەردە سانيتارلىق تالاپتار ساقتالىپ, قورعانىش قۇرالدارىمەن تولىق قامتاماسىز ەتىلگەن.
سونىمەن قاتار تارازدىقتاردىڭ سايلاۋ ۋچاسكەسىنە ەش كەدەرگىسىز جەتۋى جانە داۋىس بەرۋىنە قولايلى جاعداي جاساۋ ماقساتىندا بۇل كۇنى قالاداعى قوعامدىق كولىك جولاۋشىلاردى تەگىن تاسىمالدايدى. تاڭعى ساعات 07:00-دەن كەشكى ساعات 20:00-گە دەيىن قالالىق اۆتوبۋستار جولاۋشىلاردىڭ تەگىن تاسىمالىن جۇزەگە اسىرادى.
ايتا كەتۋ كەرەك, قوعامدىق كولىكتەر باعدارى قالىپتى كەستە بويىنشا قاتىنايتىن بولادى. ياعني ولاردىڭ قوزعالىس سىزباسىنا ەشقانداي وزگەرىستەر ەنگىزىلگەن جوق.
ايتكەنمەن, اۆتوبۋستار قىسقارتىلعان رەجيمدە جۇمىس ىستەيدى. ال, ەلدەگى ەپيدەميالىق جاعدايدى ەسكەرە وتىرىپ, قوعامدىق كولىك قىزمەتىن پايدالاناتىن ازاماتتاردىڭ مەديتسينالىق بەتپەردە تاعۋ رەجيمىن جانە الەۋمەتتىك قاشىقتىقتى ساقتاۋى قاتاڭ تالاپ ەتىلەدى.